ទេសចរធម្មជាតិ: international

ចិន៖ គម្រោងខែលការពារជាតិ THAAD អាមេរិកនៅកូរ៉េខាងត្បូង ធ្វើឲ្យអស្ថិរភាពឧបទ្វីបកូរ៉េ

បើទោះបីជាក្រុងវ៉ាស៊ីនតោន បានអះអាងហើយថាការដំឡើងខែលការពារមីស៊ីល THAAD នៅកូរ៉េខាងត្បូង ដើម្បីតបត និងប្រឆាំងកូរ៉េខាងជើងតែមួយគត់ក៏ដោយ រដ្ឋាភិបាលក្រុងប៉េកាំង មិនសុខចិត្តឡើយ។ ក្រុងប៉េកាំង បានបង្ហាញគោលជំហរជំទាស់ជាថ្មី និងចាត់ទុកផែនការដំឡើងប្រព័ន្ធការពារធុនធំនោះ ថាជាការបំផ្លាញសន្តិសុខនៅក្នុងតំបន់។

រដ្ឋមន្ត្រីការពារជាតិអាមេរិកថ្មី លោក James Mattis នៅថ្ងៃទី០២ កុម្ភៈ បានបំពេញទស្សនកិច្ចទៅកាន់កូរ៉េខាងត្បូងជាលើកដំបូងក្នុងនាមជាប្រមុខការពារជាតិនៃរដ្ឋបាលថ្មីរបស់លោកប្រធានាធិបតី Donald Trump។ តាមរយៈដំណើរទស្សនកិច្ចនោះ លោករដ្ឋមន្ត្រី បានបញ្ជាក់ពីជំហរមិនប្រែប្រួលរបស់អាមេរិកមកកាន់ឧបទ្វីបកូរ៉េ និងការការពារសម្ព័ន្ធមិត្តរបស់ខ្លួន តាមរយៈគោលនយោបាយប្រឆាំងនឹងការអភិវឌ្ឍអាវុធនុយក្លេអ៊ែររបស់កូរ៉េខាងជើង។

ជាងនេះទៅទៀតនោះ ប្រមុខការពារជាតិដែលទើបស្បថកាន់តំណែងរូបនេះ ថែមទាំងផ្ញើសារដល់ប្រទេសក្នុងតំបន់ ដែលតែងតែបារម្ភពីវត្តមានរបស់ប្រព័ន្ធការពារមីស៊ីល THAAD នៅក្នុងទឹកដីកូរ៉េខាងត្បូងទៀតផង។ «ខែលការពារមីស៊ីល THAAD គឺសម្រាប់តែការពារប្រជាជននៃសម្ព័ន្ធមិត្តរបស់យើង និងទាហានរបស់យើង ដែលបានប្តេជ្ញាចិត្តចំពោះកិច្ចការការពាររបស់ពួកគេ ហើយប្រសិនបើកូរ៉េខាងជើង មិនបង្ហាញពីឥរិយាបថបង្ករឿងនោះទេ យើង ក៏មិនដំឡើងខែលការពារមីស៊ីលនៅទីនោះផងដែរ»។ នេះ គឺជាសេចក្តីថ្លែងការណ៍របស់លោករដ្ឋមន្ត្រីការពារជាតិ James Mattis។

លោករដ្ឋមន្ត្រីការពារជាតិ ក៏បានសង្កត់ធ្ងន់ទៀតថា ប្រទេសដទៃផ្សេងទៀត មិនចាំបាច់ព្រួយបារម្ភអំពីខែលការពារមីស៊ីលនេះឡើយ ដ្បិតខែលនោះ បំពាក់ឡើងដើម្បីឆ្លើយតបទៅនឹងសកម្មភាពកូរ៉េខាងជើងប៉ុណ្ណោះ។

មិនខុសពីពេលមុនឡើយ ក្រុងប៉េកាំង បានប្រតិកម្មខ្លាំងពីការផែនការដំឡើងនេះ។ ក្រុងប៉េកាំង តាមរយៈអ្នកនាំពាក្យក្រសួងបរទេសចិន នៅថ្ងៃទី ០៣ កុម្ភៈ បានហៅផែនការនោះ ថា «ជាការបំផ្លាញផលប្រយោជន៍យុទ្ធសាស្ត្រសន្តិសុខនៃប្រទេសក្នុងតំបន់ ដែលរាប់បញ្ចូលទាំងចិន និងមិនមានចរិកលក្ខណៈណាមួយជួយដល់សន្តិភាព និងស្ថិរភាពនៅឧបទ្វីបកូរ៉េឡើយ»។

អ្នកនាំពាក្យក្រសួងការបរទេសចិន លោក Lu Kang ក៏បានសង្កត់ធ្ងន់ទៀតថា៖«យើងទទូចឲ្យភាគីពាក់ព័ន្ធបញ្ចប់ផែនការដំឡើងប្រព័ន្ធការពារ និងបញ្ឈប់ធ្វើឲ្យស្ថានភាពកាន់តែអាក្រក់ទៅ»៕

ថ្មីៗ
អត្ថបទ : ទេព អ៊ីវិសាល

ចិន៖ គម្រោងខែលការពារជាតិ THAAD អាមេរិកនៅកូរ៉េខាងត្បូង ធ្វើឲ្យអស្ថិរភាពឧបទ្វីបកូរ៉េ

ចិន ក្តៅក្រហាយខ្លាំងនឹងសេចក្តីថ្លែងការណ៍រដ្ឋមន្ត្រីការពារជាតិអាមេរិករឿងអធិបតេយ្យប្រជុំកោះជម្លោះចិន-ជប៉ុន

រដ្ឋាភិបាលក្រុងប៉េកាំង នៅថ្ងៃទី០៤ កុម្ភៈ បានព្រមានរដ្ឋាភិបាលក្រុងវ៉ាស៊ីនតោន កុំឲ្យធ្វើឲ្យមានអស្ថិរភាពនៅក្នុងតំបន់អាស៊ីបូព៌ា។ ការព្រមាននេះ ធ្វើឡើងបន្ទាប់ពីរដ្ឋមន្ត្រីការពារជាតិថ្មីនៃរដ្ឋបាលប្រធានាធិបតី ដូណាល់ ត្រាំ បានអះអាងថា តំបន់វិវាទអធិបតេយ្យដែលចិន និងជប៉ុនបានទាមទារត្រួតស៊ីគ្នានោះ ស្ថិតក្រោមកិច្ចព្រមព្រៀងការពាររវាងអាមេរិក និងជប៉ុន។

« ខ្ញុំ បាននិយាយច្បាស់ហើយថា គោលនយោបាយរបស់យើងមិនប្រែប្រួលឡើយចំពោះតំបន់កោះ Senkaku ... អាមេរិក បន្តទទួលស្គាល់បណ្តុំកោះដែលគ្រប់គ្រងដោយរដ្ឋបាលរបស់ជប៉ុន ក៏ដូចជាប្រការប្រាំនៃសន្ធិសញ្ញាសម្ព័ន្ធមិត្តអាមេរិក-ជប៉ុន»។ នេះ គឺជាសេចក្តីថ្លែងការណ៍របស់រដ្ឋមន្ត្រីការពារជាតិអាមេរិក លោក James Mattis នៅក្នុងសន្និសីទសារព័ត៌មានថ្ងៃទី០៤ កុម្ភៈ ជាមួយនឹងរដ្ឋមន្ត្រីការពារជាតិជប៉ុន លោកស្រី Tomomi Inada។

ប្រការប្រាំនៃសន្ធិសញ្ញាសម្ព័ន្ធមិត្តអាមេរិក-ជប៉ុន បានបញ្ញត្តិថា អាមេរិក នឹងការពារអធិបតេយ្យក្រោមរដ្ឋបាលរបស់ជប៉ុន ដែលរាប់បញ្ចូលទាំងបណ្តុំកោះ Senkaku ដែលចិន បានហៅថា Diaoyu និងទាមទារផងដែរនោះ។

សេចក្តីថ្លែងការណ៍របស់រដ្ឋមន្ត្រីការពារជាតិរូបនេះ ប្រាកដណាស់ថា ធ្វើឲ្យចិន មិនសប្បាយចិនឡើយ។ « ប្រជុំកោះ Diaoyu និងតំបន់ក្បែរនោះ គឺជាផ្នែកមួយនៃអធិបតេយ្យចិនតាំងពីយូរយាណាស់់មកហើយ។ ហើយនេះ ក៏ជារឿងប្រវត្តិសាស្ត្រមួយដែលមិនមានការប្រែប្រួលផងដែរ។» នេះ គឺជាសេចក្តីថ្លែងការណ៍ប្រតិកម្មរបស់អ្នកនាំពាក្យក្រសួងការបរទេសចិន លោក Lu Kang ទៅនឹងសេចក្តីថ្លែងការណ៍របស់អាមេរិក។

អ្នកនាំពាក្យរូបនេះ បានបន្តទៀតថាយ៉ាងដូច្នេះថា៖« យើង ទទូចឲ្យភាគីអាមេរិកមានឥរិយាបថទទួលខុសត្រូវ បញ្ឈប់ការធ្វើអត្ថាធិប្បាយខុស និងចៀសឲ្យបានការធ្វើឲ្យបញ្ហាកាន់ស្មុគស្មាញ និងបង្កជាអស្ថិរភាពនៅក្នុងតំបន់»។

សូមជម្រាបផងដែរ លោករដ្ឋមន្ត្រីការពារជាតិថ្មីអាមេរិក James Mattis នៅសប្តាហ៍នេះ បានបំពេញទស្សនកិច្ចមកកាន់កូរ៉េខាងត្បូង និងជប៉ុន ជាលើកដំបូងក្នុងនាមជាប្រមុខការពារជាតិថ្មីនៃរដ្ឋបាលលោកប្រធានាធិបតី ដូណាល់ ត្រាំ។ ដំណើរទស្សនកិច្ចរបស់លោកប្រមុខការពារជាតិរូបនេះ ដើម្បីបង្ហាញពីជំហរមិនប្រែប្រួលរបស់អាមេរិកមកកាន់សម្ព័ន្ធមិត្តចាក់ទឹកមិនលិចរបស់ខ្លួនគឺ ជប៉ុន និងកូរ៉េខាងត្បូង។

អ្វីគួរកត់សម្គាល់នោះ ក្នុងវត្តមានរបស់លោកនៅក្នុងប្រទេសកូរ៉េខាងត្បូង ដែលជាចំណតទីមួយនៃដំណើរទស្សនកិច្ចនោះ បានធ្វើឲ្យចិន ក្តៅក្រហាយម្តងរួចទៅហើយ។ ក្តៅក្រហាយនោះ ក៏ព្រោះតែ ក្នុងពេលបំពេញទស្សនកិច្ចនៅទីនោះ លោកប្រមុខការពារជាតិ បានអះអាងជាថ្មីថា នឹងបំពាក់ប្រព័ន្ធការពារមីស៊ីល THAAD របស់អាមេរិក នៅក្នុងទឹកដីកូរ៉េខាងត្បូងនៅក្នុងឆ្នាំនេះ។ កន្លងមក ចិន តែងតែបង្ហាញជំហរជំទាស់ដាច់ខាតក្នុងការដំឡើងប្រព័ន្ធការពារនោះ ដ្បិត ចិន យល់ឃើញថា វា បំផ្លាញសន្តិសុខនៅក្នុងតំបន់ និងផលប្រយោនជ៍សន្តិសុខរបស់ចិនតែម្តង៕

ថ្មិៗ
អត្ថបទ : ទេព អ៊ីវិសាល

ចិន ក្តៅក្រហាយខ្លាំងនឹងសេចក្តីថ្លែងការណ៍រដ្ឋមន្ត្រីការពារជាតិអាមេរិករឿងអធិបតេយ្យប្រជុំកោះជម្លោះចិន-ជប៉ុន

មេបញ្ជាការកងទ័ពអ៉ីរ៉ង់៖ យើងនឹងប្រើមីស៊ីលបាញ់បំបែកក្បាលសត្រូវរបស់យើង !

(តេហេរ៉ង់)៖ មួយថ្ងៃប៉ុណ្ណោះ បន្ទាប់ពីត្រូវបានសហរដ្ឋអាមេរិកទះមួយកំផ្លៀង តាមរយៈការដាក់ទណ្ឌកម្មថ្មីបន្ថែម កងកម្លាំង ឆ្មាំបដិវត្តន៍អ៉ីរ៉ង់ បានដឹកនាំ ការធ្វើសមយុទ្ធ យោធាបាញ់គ្រាប់មីស៊ីលនៅក្នុងខេត្ត Semnan។ មិនតែប៉ុណ្ណោះមេបញ្ជាការកងទ័ពអ៉ីរ៉ង់ លោក អាមៀ អាលីហាជីសាដេស (Amir Ali Hajizadeh) ក៏បានព្រមានដែរថា ទីក្រុងតេហេរ៉ង់ នឹងប្រើប្រាស់មីស៊ីលទាំងនេះ បាញ់បំបែកក្បាលសត្រូវ។ នេះបើតាមទីភ្នាក់ងារសារព័ត៌មាន អ៊ីរ៉ង់ Tasnim ដកស្រង់ដោយសារព័ត៌មាន Sputnik នៅថ្ងៃអាទិត្យ ទី០៥ ខែកុម្ភៈ ឆ្នាំ២០១៧។

យោងតាមទីភ្នាក់ងារសារព័ត៌មាន Tasnim បើទោះជាលោក អាមៀ មិនបានបញ្ជាក់ថា សត្រូវនោះជានរណាឱ្យប្រាកដក៏ដោយ ក៏ប៉ុន្តែការធ្វើសមយុទ្ធយោធា កាលពីថ្ងៃសៅរ៍ ត្រូវបានធ្វើឡើងភ្លាមៗ ក្រោយរដ្ឋបាលលោក ដូណាល់ ត្រាំ សម្រេចដាក់ទណ្ឌកម្មថ្ មីប្រឆាំងនឹងអ៊ីរ៉ង់ សម្រាប់ការបាញ់សាកល្បងមីស៊ីលផ្លោង នាពេលថ្មីៗនេះ ហើយម្យ៉ាងវិញទៀត សត្រូវដ៏ធំនៅក្នុងកែវភ្នែក មេដឹកនាំអ៊ីរ៉ង់ ក៏គ្មាននរណាផ្សេងក្រៅពីសហរដ្ឋអាមេរិកនោះដែរ។ «បើសិនជាសត្រូវប្រព្រឹត្ត កំហុសឆ្គងនោះមីស៊ីល របស់យើង នឹងបាញ់បំបែកក្បាលរបស់ពួកគេ» នេះគឺជាសម្ដីរបស់មេបញ្ជាការកងទ័ពរបស់អ៉ឺរ៉ង់។

កាលពីថ្ងៃទី២៩ ខែមករាកន្លងទៅ អ៉ីរ៉ង់បានដឹកនាំការបាញ់សាកល្បងមីស៊ីលផ្លោងរយៈចំងាយមធ្យម ២២៥គីឡូម៉ែត្រ ពីទីក្រុង តេហេរ៉ង់ រីឯរដ្ឋមន្ត្រីការពារ ជាតិអ៊ីរ៉ង់លោក ហូសេន ដែសហាន់ (Hossein Dehghan) ក៏បានអះអាងផងដែរពីភាពជោគជ័យ នៃការបាញ់សាកល្បងនេះ។ តែជាការឆ្លើយតប សហរដ្ឋអាមេរិក បានសម្រេចចិត្តដាក់ទណ្ឌកម្មថ្មី បន្ថែមប្រឆាំងនឹង បុគ្គល១៣រូប ព្រមទាំងក្រុមហ៊ុនចំនួន១២ មានមូលដ្ឋាននៅក្នុងប្រទេសអ៊ីរ៉ង់ លីបង់ ចិន និងសហភាពអេមីរ៉ាតអារ៉ាប់ រួម សម្រាប់ការបាញ់ សាកល្បងមីស៊ីលផ្លោង និងការគំាទ្រក្រុមឧទ្ទាមហេសប៊ូលឡា ដែលត្រូវបានទីក្រុងវ៉ាស៊ីនតោន ចាត់ទុកថាជាអង្គការភេរវករ៕

Fresh News

មេបញ្ជាការកងទ័ពអ៉ីរ៉ង់៖ យើងនឹងប្រើមីស៊ីលបាញ់បំបែកក្បាលសត្រូវរបស់យើង !

BREAKING NEWS: តុលាការឧទ្ធរណ៍សហព័ន្ធអាមេរិកទាត់ចោលសំណើ លោក ដូណាល់ ត្រាំ ដែលចង់ដំណើរការឡើងវិញបទបញ្ជាស្ដីពីជនភៀសខ្លួន

(វ៉ាស៊ីនតោន)៖ តុលាការឧទ្ធរណ៍សហព័ន្ធអាមេរិក បានច្រានចោលសំណើររបស់រដ្ឋបាលលោក ដូណាល់ ត្រាំ ដែលចង់ដំណើរការឡើងវិញនូវបទបញ្ជាស្ដីពី ជនភៀសខ្លួន និងការហាមឃាត់ប្រជាជនមកពីប្រទេសមូស្លីមភាគច្រើនចំនួន៧ ចូលក្នុងសហរដ្ឋអាមេរិក បន្ទាប់ពីត្រូវបានចៅក្រមតុលាការកំពូលរាំងខ្ទប់ កាលពីថ្ងៃសុក្រ។ នេះបើតាមការចេញផ្សាយដោយសារព័ត៌មាន BBC នៅមុននេះបន្តិចនារសៀលថ្ងៃអាទិត្យ ទី០៥ ខែកុម្ភៈ ឆ្នាំ២០១៧។

តុលាការកំពូលអាមេរិក បានសម្រេចព្យួរ ឬផ្អាកបទបញ្ជារបស់លោក ដូណាល់ ត្រាំ ប្រធានាធិបតីអាមេរិក ដែលបានដាក់ការហាមឃាត់ការធ្វើដំណើរមកកាន់អាមេរិក ចំពោះប្រជាជនមកពីបណ្តាប្រទេសមូស្លីមចំនួន០៧ ដោយចាត់ទុកថា វាផ្ទុយទៅនឹងរដ្ឋធម្មនុញ និងជាការរើសអើង។ ប៉ុន្តែប្រធានាធិបតីថ្មីរូបនេះមិនបានយល់ស្របតាមនោះឡើយ ដោយលោកអះអាងថា នឹងយកការហាមឃាត់ដ៏ស្របច្បាប់នោះ ត្រឡប់មកអនុវត្តន៍ឲ្យបាន។ ជាងនេះទៅទៀតលោក ត្រាំ ថែមទាំង បានប្រើពាក្យសម្តីធ្ងន់ៗទៅលើលោក James Robart ដែលជាចៅក្រមតុលាការកំពូលម្នាក់ ហើយថាការសម្រេចចិត្តរបស់ចៅក្រមរូបនេះគឺជារឿង គួរឲ្យអស់សំណើច និងជាការអូសទាញអាមេរិកឲ្យកាន់តែឆ្ងាយពីការអនុវត្តច្បាប់ដ៏ត្រឹមត្រូវ។

គួរបញ្ជាក់ថា បន្ទាប់ពីមានសេចក្តីសម្រេចពីតុលាការកំពូលរបស់សហរដ្ឋអាមេរិក ក្រុមហ៊ុនអាកាសចរណ៍មួយចំនួនបានចាប់ផ្តើមអនុវត្តន៍តាមដោយអនុញ្ញាត ឲ្យបណ្តាជនជាតិមកពីប្រទេសទាំង០៧ដែលត្រូវបានហាមឃាត់ដោយលោក ត្រាំ អាចធ្វើដំណើរមកកាន់អាមេរិកវិញជាធម្មតា។ ប្រជាជនមកពីប្រទេសមូស្លីម ភាគ ច្រើន ដែលត្រូវលោក ដូណាល់ ត្រាំ ហាមជាបណ្ដោះអាសន្នមិនឱ្យចូលក្នុងសហរដ្ឋអាមេរិក រួមមាន អ៊ីរ៉ង់, អ៊ីរ៉ាក់, លីប៊ី, សូម៉ាលី, ស៊ូដង់, យេមែន និងស៊ីរី៕

Fresh News

BREAKING NEWS: តុលាការឧទ្ធរណ៍សហព័ន្ធអាមេរិកទាត់ចោលសំណើ លោក ដូណាល់ ត្រាំ ដែលចង់ដំណើរការឡើងវិញបទបញ្ជាស្ដីពីជនភៀសខ្លួន

របាយការណ៍UN៖ កងកម្លាំងមីយ៉ាន់ម៉ា បានដុតផ្ទះ រំលោភ និងសម្លាប់ជនជាតិរ៉ូហ៊ីងយ៉ាយ៉ាងព្រៃផ្សៃ

អង្គការសហប្រជាជាតិទទួលបន្ទុកសិទ្ធិមនុស្ស នៅថ្ងៃទី០៣ កុម្ភៈ បានចេញរបាយការណ៍មួយ ដែលបានរកឃើញថា មានការរំលោភសិទ្ធិមនុស្សយ៉ាងធ្ងន់ធ្ងរទៅលើជនជាតិភាគតិចរ៉ូហ៊ីងយ៉ាដោយកម្លាំងរដ្ឋាភិបាលមីយ៉ាន់ម៉ានៅក្នុងរដ្ឋ Rakhine។ របាយការណ៍ បានចាត់ទុកការបំពាននេះ ថា អាចក្លាយជាបទល្មើសប្រឆាំងមនុស្សជាតិបាន។

របាយការណ៍ដែលចេញផ្សាយដោយការិយាល័យនៃឧត្តមស្នងការទទួលសិទ្ធិមនុស្ស (OHCHR) ដែលយោងតាមកិច្ចសម្ភាសន៍ជាមួយនឹងប្រជាជនដែលភៀសខ្លួនពីមីយ៉ាន់ម៉ា ក្រោយការវាយប្រហារនៅដើមខែតុលាឆ្នាំមុន បានបង្ហាញថា មានការករណីរំលោភ សម្លាប់ ដែលរាប់បញ្ចូលទាំងទារក និងកុមារ ការធ្វើទារុណកម្មព្រៃផ្សៃ និងសកម្មភាពរំលោភសិទ្ធិមនុស្សផ្សេងទៀតទៅលើជនជាតិភាគតិចរ៉ូហ៊ីងយ៉ាដោយកងកម្លាំងសន្តិសុខមីយ៉ាន់ម៉ា។

តាមចម្លើយដែលផ្សាយចេញតាមរបាយការណ៍នោះ កងកម្លាំងមីយ៉ាន់ម៉ា មិនត្រឹមតែប្រព្រឹត្តបទល្មើសប៉ុន្មានខាងលើនោះទេ តែពួកគេ ក៏បានដុតផ្ទះសម្បែង សាលារៀន ផ្សារ វិហារ និងដីស្រែជនជាតិភាគតិចទាំងនោះ និងថែមទាំងមានឃាត់ក្រុមទាំងនោះនៅក្នុងផ្ទះ ហើយដុតសម្លាប់ពួកគេតែម្តង។

តាមចម្លើយក្នុងរបាយការណ៍ដដែលនោះ ស្ត្រីច្រើនជាងពាក់កណ្តាល ដែលបានផ្តល់កិច្ចសម្ភាសន៍នោះ បានអះអាងថា ពួកគេសុទ្ធសឹងតែរងការឈឺចាប់ដោយសារការរំលោភ និងហិង្សាផ្លូវភេទជាច្រើនទម្រង់ផ្សេងទៀត។

ជុំវិញចម្លើយរបាយការណ៍នេះ ប្រធានឧត្តមស្នងការសិទ្ធិមនុស្សអង្គការសហប្រជាជាតិ Zeid Ra'ad Al Hussein បានប្រតិកម្មយ៉ាងដូច្នេះថា៖«អំពើឃោរឃៅទៅលើកុមាររ៉ូហ៊ីងយ៉ា គឺជារឿងដែលមិនអាចអត់ឳនបានឡើយ។ នេះ គឺជារឿងដែលគួរឲ្យស្អប់ខ្ពើមដែលបុរស(កងកម្លាំង) ចាក់សម្លាប់ទារក ដែលកំពុងតែស្រែកយំដើម្បីបំបៅដោះម្តាយ ខណៈម្តាយដែលបានឃើញឃាតកម្មនោះ ត្រូវបានរំលោភដោយកងកម្លាំងនោះ»។

ជាមួយគ្នានេះ ប្រមុខសិទ្ធិមនុស្សអង្គការសហប្រជាជាតិ ក៏បានទទូចឲ្យរដ្ឋាភិបាលមីយ៉ាន់ម៉ា បញ្ឈប់សកម្មភាពប្រឆាំងប្រជាជនខ្លួនឯង ហើយជំនួសដោយការបដិសេធពីហេតុការណ៍ដែលកើតឡើងនៅទីនោះ រដ្ឋាភិបាល ហើយទទួលស្គាល់ពីការទទួលខុសត្រូវដើម្បីទទួលថាជនរងគ្រោះអាចទទួលបានយុត្តិធម៌ សុវត្ថិភាព និងការប៉ះប៉ូវឡើងវិញ៕

ថ្មីៗ
អត្ថបទ : ថ្មីៗ

របាយការណ៍UN៖ កងកម្លាំងមីយ៉ាន់ម៉ា បានដុតផ្ទះ រំលោភ និងសម្លាប់ជនជាតិរ៉ូហ៊ីងយ៉ាយ៉ាងព្រៃផ្សៃ

អស្ចារ្យមែន! កូរ៉េខាងត្បូង «ទទួលជោគជ័យលើការវះកាត់ប្តូរប្រអប់ដៃ» ជាលើកដំបូង!

(សេអ៊ូល)៖ ក្រុមគ្រូពេទ្យជំនាញវះកាត់របស់កូរ៉េខាងត្បូងមួយក្រុម បានសម្រេចនូវការវះកាត់ប្តូរប្រអប់ដៃ ជាលើកដំបូងទៅលើបុរសវ័យខ្ទង់ ៣០ឆ្នាំម្នាក់ ដែលវាជា ជោគជ័យទីមួយហើយសម្រាប់កូរ៉េខាងត្បូង ដែលបានសម្រេចចេញនូវលទ្ធផលបែបនេះក្នុងប្រទេសរបស់ខ្លួន។ នេះបើតាមការដកស្រង់ការផ្សាយដោយទីភ្នាក់ងារ ព័ត៌មានយ៉ុនហាប់ នារសៀលថ្ងៃសៅរ៍ ទី០៤ ខែមករា ឆ្នាំ២០១៧។ ក្រុមគ្រូពេទ្យខាងលើនេះមានសមាជិកសរុប ២៥នាក់ ដឹកនាំដោយលោក Woo Sang Hyun ប្រធានមន្ទីរពេទ្យ W Hospital បានសម្រេចចិត្តវះកាត់យកប្រអប់ដៃ ពីបុរសម្នាក់ដែលមានអាយុ ៤០ឆ្នាំ ដែលខួរក្បាលរបស់គាត់លែងដំណើរការទៅហើយ (ស្លាប់)។ ការវះកាត់ត្រូវបានចំណាយពេល ១០ម៉ោង នៅឯមជ្ឈមណ្ឌលវេជ្ជសាស្ត្រនៃសាកលវិទ្យាល័យ Yeungnam ទីក្រុងដេហ្គូ ភាគអាគ្នេយ៍ប្រទេសកូរ៉េខាងត្បូង។ គួរបញ្ជាក់ថាដៃដែលត្រូវបានវះកាត់យកមកផ្សាំឲ្យបុរសម្នាក់ទៀតខាងលើនេះ មានផ្នែកប្រអប់ដៃ និងកុំភួនដៃ។ ក្រោយការវះកាត់រួចរាល់ជាស្ថាពរកាលពីថ្ងៃសុក្រ ក្រុមគ្រូពេទ្យបានអះអាងថា បុរសដែលទទួលបានដៃថ្មីគឺមានស្ថានភាពសុខភាពល្អធម្មតា ប៉ុន្តែរាងកាយរបស់លោកត្រូវការពេលវេលាយូរ ដើម្បីកម្រើកជាធម្មតាឡើងវិញ ដោយសារតែបានចំណាយពេលវេលាយូរក្នុងការវះកាត់ប្តូរដៃ៕ Fresh News

អស្ចារ្យមែន! កូរ៉េខាងត្បូង «ទទួលជោគជ័យលើការវះកាត់ប្តូរប្រអប់ដៃ» ជាលើកដំបូង!

ប្រទេសចិនចេញមុខព្រមានអាមេរិក៖ «កុំក្រឡុកស្ថានការណ៍នៅអាស៊ីបូព៌ា, ឈប់លើកឡើងនូវអ្វីដែលខុសពីការពិត!»

(ប៉េកាំង)៖ ប្រទេសចិនបានព្រមានទៅសហរដ្ឋអាមេរិកថា កុំក្រឡុកស្ថានការណ៍នៅតំបន់អាស៊ីបូព៌ាតទៅទៀត ដែលការព្រមានធ្ងន់ៗនេះធ្វើឡើងបន្ទាប់ពីរដ្ឋមន្ត្រីការពារជាតិថ្មីរបស់អាមេរិក លោក Jim Mattis កំពុងបំពេញទស្សនកិច្ចនៅជប៉ុនបានលើកឡើងថា ប្រជុំកោះស៊ិនកាគុ (ចិនហៅតាវយុ) គឺត្រូវបានការពារដោយសន្ធិសញ្ញារវាងជប៉ុន-អាមេរិក។ នេះបើតាមការចេញផ្សាយនៅមុននេះបន្តិច ដោយ Channel News Asia ដកស្រង់ពីបណ្តាញ Reuters នារសៀលថ្ងៃសៅរ៍ ទី០៤ ខែកុម្ភៈ ឆ្នាំ២០១៧។ គួរបញ្ជាក់ថាប្រជុំកោះស៊ិនកាគុ ដែលចិនហៅថាតាវយុ និងកំពុងស្ថិតនៅក្រោមការគ្រប់គ្រងរបស់ជប៉ុននៅឡើយនោះ គឺជាទីតាំងប្រកបដោយសក្កានុពលមួយដែលអំណោយផលលើការនេសាទធនធានសមុទ្រ ដែលជប៉ុនទន្ទ្រានគ្រប់គ្រងនៅសម័យសង្គ្រាមលោក ប៉ុន្តែបើតាមភាពជាក់ស្តែងនៃតឹកតាងប្រវត្តិសាស្ត្រប្រទេសចិនធ្លាប់បានគ្រប់គ្រងលើប្រជុំកោះទាំងអស់នេះ អស់រាប់សតវត្សរ៍មកហើយ។ អ្នកនាំពាក្យក្រសួងការបរទេសចិន លោក លូ កាង បានលើកឡើងប្រាប់ស៊ិនហួរថា «ប្រជុំកោះតាវយុ និងតំបន់ព័ទ្ធជុំវិញគឺជាដែនដីប្រវត្តិសាស្ត្ររបស់ប្រទេសចិន តាំងពីបុរាណកាលមកម្ល៉េះ ដែលគ្មាននរណាម្នាក់ អាចប្រកែកពីការពិតជាប្រវត្តិសាស្ត្រនេះបានឡើយ។ យើងអំពាវនាវឲ្យភាគីអាមេរិកទទួលខុសត្រូវចំពោះឥរិយាបថរបស់ខ្លួន ហើយឈប់ធ្វើការលើកឡើងដោយខុសពីការពិត និងសូមឈប់ដុតរោលស្ថានការណ៍ឲ្យកាន់តែយ៉ាប់យឺនជាងនេះទៀតនៅក្នុងតំបន់»។ គួរបញ្ជាក់តាមសម្តីរបស់លោក Mattis នៅក្នុងជំនួបជាមួយរដ្ឋមន្ត្រីការពារជាតិជប៉ុនថា សហរដ្ឋអាមេរិករក្សាគោលនយោបាយឥតកែប្រែចំពោះជំហររបស់ខ្លួនលើបញ្ហាប្រជុំកោះ ស៊ិនកាគុ ហើយអាមេរិកបន្តគាំទ្រប្រទេសជប៉ុនក្នុងការគ្រប់គ្រងប្រជុំកោះនោះតទៅទៀត៕ Fresh News

ប្រទេសចិនចេញមុខព្រមានអាមេរិក៖ «កុំក្រឡុកស្ថានការណ៍នៅអាស៊ីបូព៌ា, ឈប់លើកឡើងនូវអ្វីដែលខុសពីការពិត!»

ក្តៅៗ! អ៊ីរ៉ង់កាន់តែផ្គើនអាមេរិក ដោយលើកនេះរៀបចំធ្វើ «សមយុទ្ធការពារដែនអាកាសទ្រង់ទ្រាយធំតែម្តង!»

(តេហេរ៉ង់)៖ កងកម្លាំងការពារបដិវត្តន៍អ៊ីរ៉ង់ (IRGC) បានរៀបចំធ្វើសមយុទ្ធការពារដែនអាកាសដ៏ធំមួយនៅថ្ងៃសៅរ៍នេះ ដែលមានការចូលរួមពីកងកម្លាំងយោធា និងសព្វាវុធទំនើបៗធ្វើការហ្វឹកហ្វឺននៅលើផ្ទៃដី ៣៥.០០០គីឡូម៉ែត្រក្រឡា។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ិនហួរ ដកស្រង់ពីសារព័ត៌មានអ៊ីរ៉ង់ IRNA នារសៀលថ្ងៃសៅរ៍ ទី០៤ ខែកុម្ភៈ ឆ្នាំ២០១៧។ គួរបញ្ជាក់ការធ្វើសមយុទ្ធខាងលើនេះ បានកើតឡើងបន្ទាប់ពីសហរដ្ឋអាមេរិកបានសម្រេចដាក់ទណ្ឌកម្មទៅលើប្រទេសអ៊ីរ៉ង់ ដោយសារតែការធ្វើតេស្តគ្រាប់មីស៊ីលកាលពីពេលថ្មីៗនេះ ដែលអាមេរិកចោទថាជាការរំលោភលើកិច្ចព្រមព្រៀងនុយក្លេអ៊ែរកាលពីឆ្នាំ២០១៥ ប៉ុន្តែអ៊ីរ៉ង់បានអះអាងជាច្រើនលើកហើយថា ខ្លួនមិនបានប្រព្រឹត្តខុសអ្វីឡើយ ហើយអាវុធមីស៊ីលនោះ ក៏មិនមែនជាប្រភេទដែលអាចបំពាក់គ្រាប់នុយក្លេអ៊ែរបាននោះដែរ។ សម្រាប់សមយុទ្ធនៅថ្ងៃសៅរ៍នេះ ប្រទេសអ៊ីរ៉ង់មានគោលដៅបង្កើនសមត្ថភាពដល់កងកម្លាំងរបស់ IRGC ទប់ទល់នឹងការគំរាមកំហែងនានា។ ប្រព័ន្ធរ៉ាដាចាប់សញ្ញាពីលើដី ការរៀបចំយុទ្ធសាស្ត្រនានា និងការគ្រប់គ្រងប្រព័ន្ធសព្វាវុធអេឡិចត្រូនិក ត្រូវបានដាក់បញ្ចូលទៅក្នុងការធ្វើសមយុទ្ធនោះ៕ Fresh News

ក្តៅៗ! អ៊ីរ៉ង់កាន់តែផ្គើនអាមេរិក ដោយលើកនេះរៀបចំធ្វើ «សមយុទ្ធការពារដែនអាកាសទ្រង់ទ្រាយធំតែម្តង!»

លោក ដូណាល់ ត្រាំ សម្រេចចិត្តប្ដឹងជំទាស់ ទៅនឹងការផ្អាកបទបញ្ជារបស់លោក ដោយចៅក្រមតុលាការកំពូលម្នាក់ ក្នុងទីក្រុង Seattle

(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានសម្រេចចិត្តប្ដឹងជំទាស់ហើយ ទៅនឹងការផ្អាកបទបញ្ជារបស់លោក ដោយចៅក្រមតុលាការកំពូលម្នាក់ ក្នុងទីក្រុង Seattle ស្ដីពីការហាមឃាត់ការធ្វើដំណើរមកកាន់អាមេរិក ចំពោះប្រជាជនមកពីបណ្តាប្រទេសមូស្លីមចំនួន០៧។ នេះបើតាមការចេញផ្សាយដោយសារ ព័ត៌មាន BBC ថ្ងៃអាទិត្យ ទី០៥ ខែកុម្ភៈ ឆ្នាំ២០១៧។ ជុំវិញបញ្ហានេះដែរ លោក ដូណាល់ ត្រាំ បានជះពាក្យសម្តីធ្ងន់ៗទៅលើលោក James Robart ដែលជាចៅក្រមតុលាការកំពូលថា «ជាការសម្រេចចិត្តដ៏គួរឲ្យអស់ សំណើចខ្លាំងណាស់ ដែលវាជាការអូសទាញអាមេរិកឲ្យកាន់តែឆ្ងាយពីការអនុវត្តច្បាប់ដ៏ត្រឹមត្រូវ។ បន្ថែមពីលើនេះ លោកត្រាំ ក៏បានតែងតាំងរដ្ឋមន្រី្តមហាផ្ទៃ លោក ចន ឃែលលី (John Kelly) និងរដ្ឋមន្ត្រីការបរទេសថ្មី លោក រិច ធីល្លឺសុន (Rex Tillerson) ជាតំណាងដើមបណ្ដឹង ដើម្បីប្ដឹងជំទាស់ទៅនឹងចៅក្រមរូបនេះ។ តែ ទោះជាយ៉ាណា សម្រាប់ លោក Robart ការហាមឃាត់ជនភៀសខ្លួនរបស់ លោកត្រាំ គឺមិនស្របតាមច្បាប់រដ្ឋធម្មនុញ្ញ ហើយម្យ៉ាងវិញទៀត បន្ទាប់ពីមានសេចក្តី សម្រេចពីតុលាការកំពូលរបស់សហរដ្ឋអាមេរិក ក្រុមហ៊ុនអាកាសចរណ៍មួយចំនួនបានចាប់ផ្តើមអនុវត្តន៍តាម ដោយអនុញ្ញាតឲ្យបណ្តាជនជាតិមកពីប្រទេសទាំង០៧ ដែលត្រូវបានហាមឃាត់ដោយលោក ត្រាំ អាចធ្វើដំណើរមកកាន់អាមេរិកវិញជាធម្មតា។ គួរបញ្ជាក់ថា ប្រជាជនមកពីប្រទេសមូស្លីមភាគច្រើន ដែលត្រូវលោក ដូណាល់ ត្រាំ ហាមជាបណ្ដោះអាសន្ន មិនឱ្យចូលក្នុងសហរដ្ឋអាមេរិក រួមមាន អ៊ីរ៉ង់,អ៊ីរ៉ាក់,លីប៊ី, សូម៉ាលី,ស៊ូដង់,យេមែន និងស៊ីរី៕ Fresh News

លោក ដូណាល់ ត្រាំ សម្រេចចិត្តប្ដឹងជំទាស់ ទៅនឹងការផ្អាកបទបញ្ជារបស់លោក ដោយចៅក្រមតុលាការកំពូលម្នាក់ ក្នុងទីក្រុង Seattle

រដ្ឋមន្រ្តីការពារជាតិអាមេរិកថ្លែងប្រាប់នាយករដ្ឋមន្រ្តីជប៉ុន៖ «អាមេរិកនៅតែប្តេជ្ញាយ៉ាងមុះមុតចំពោះសន្ធិសញ្ញាការពារជាតិរវាងភាគីទាំងពីរ»

(តូក្យូ)៖ រដ្ឋមន្រ្តីការពារជាតិរបស់ប្រធានាធិបតីអាមេរិកគឺលោក James Mattis នៅថ្ងៃសុក្រនេះបានធានាអះអាងសាជាថ្មីអំពីកាប្តេជ្ញាយ៉ាងមុតមាំរបស់ សហរដ្ឋអាមេរិក ចំពោះសន្ធិសញ្ញាការពារជាតិទ្វេភាគីជាមួយនឹងប្រទេសជប៉ុន នៅអំឡុងជំនួបពិភាក្សារវាងរូបលោក និងនាយករដ្ឋមន្រ្តីជប៉ុនលោក ស៊ីនហ្សូ អាបេ ក្នុងទីក្រុងតូក្យូ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅយប់ថ្ងៃសុក្រ ទី០៣ ខែកុម្ភៈ ឆ្នាំ២០១៧។

នៅក្នុងជំនួបពិភាក្សាខាងលើលោក James Mattis បានថ្លែងថា «ខ្ញុំចង់ធ្វើការបញ្ជាក់ឲ្យបានច្បាស់លាស់ថា មាត្រាទី៥នៃសន្ធិសញ្ញាការពារជាតិទ្វេភាគីរវាងប្រទេសយើងទាំងពីរ ត្រូវបានយល់យ៉ាងជាក់លាក់ និងឥតងាករេនោះឡើយ សម្រាប់ពួកយើងនៅថ្ងៃនេះ ដែលដូចនឹងឆ្នាំទៅ និងប្រាំឆ្នាំមុនអ៊ីចឹង ហើយវានឹងនៅបន្តយ៉ាងដូច្នេះមិនថា មួយឆ្នាំឬក៏១០ឆ្នាំទៅមុខទៀតនោះឡើយ»។ គឺតម្រូវឲ្យអាមេរិកមានកាតព្វកិច្ចធ្វើយ៉ាងណាការពាររាល់ទឹកដី ដែលស្ថិតក្រោមការគ្រប់គ្រងកាន់កាប់របស់ភាគីជប៉ុន។

ក្នុងឱកាសនោះដែរលោក ស៊ីនហ្សូ អាបេ បានបង្ហាញជំនឿជឿជាក់ថា ជាមួយលោក ដូណាល់ ត្រាំ និងលោក James Mattis សហរដ្ឋអាមេរិក និងប្រទេសជប៉ុន អាចបង្ហាញពីសម្ព័ន្ធភាពដ៏ស្អិតរមួត និងឥតងាករេរបស់ពួកគេឲ្យពិភពលោកឃើញបាន។

គួរបញ្ជាក់ថា ជប៉ុនពិតជាចង់ទទួលបានការអះអាងបញ្ជាក់យ៉ាងខ្លាំងថា រដ្ឋាភិបាលលោក ដូណាល់ ត្រាំ នឹងបន្តគោលនយោបាយរបស់ទីក្រុងវ៉ាស៊ីនតោន ដែលប្តេជ្ញាការពារប្រជុំកោះនៅតំបន់សមុទ្រចិនខាងកើត ដែលស្ថិតក្រោមការគ្រប់គ្រងរបស់រដ្ឋាភិបាលទីក្រុងតូក្យូ ប៉ុន្តែកំពុងមានជម្លោះ ដោយសារតែមានការ ទាមទារពីសំណាក់ប្រទេសចិន ត្បិតលោក ត្រាំ ធ្លាប់បាននិយាយថា កូរ៉េខាងត្បូងនិងជប៉ុន ទទួលបានផលចំណេញពីខែលការពារសន្តិសុខរបស់អាមេរិក ដោយមិនបានធ្វើការចំណាយថវិកាសមរម្យគ្រប់គ្រាន់នោះឡើយ៕

Fresh News

រដ្ឋមន្រ្តីការពារជាតិអាមេរិកថ្លែងប្រាប់នាយករដ្ឋមន្រ្តីជប៉ុន៖ «អាមេរិកនៅតែប្តេជ្ញាយ៉ាងមុះមុតចំពោះសន្ធិសញ្ញាការពារជាតិរវាងភាគីទាំងពីរ»

អូស្ត្រាលីថា អាមេរិកប្តេជ្ញាអនុវត្តនូវអ្វីដែលលោក ត្រាំ ហៅថាជាកិច្ចព្រមព្រៀងជនភៀសខ្លួន «ដែលមិនបានការ»

បន្ទាប់ពីសេចក្តីរាយការណ៍មួយអំពីការសន្ទនាតាមទូរស័ព្ទដ៏ចម្រូងចម្រាសរវាងនាយករដ្ឋមន្ត្រីអូស្ត្រាលី និងប្រធានាធិបតីអាមេរិក លោកនាយករដ្ឋមន្ត្រីអូស្ត្រាលី Malcolm Turnbull បានមានប្រសាសន៍កាលពីថ្ងៃព្រហស្បតិ៍ថា លោកប្រធានាធិបតីអាមេរិក ដូណាល់ ត្រាំ មិនបានដាក់ទូរស័ព្ទរបស់លោកចុះនោះទេ ហើយលោក ត្រាំ បានប្តេជ្ញាថានឹងបោះជំហានទៅមុខជាមួយនឹងកិច្ចព្រមព្រៀងមួយ ដែលនឹងផ្តល់ទីលំនៅដល់ជនភៀសខ្លួនមួយក្រុម ដែលត្រូវគេចាប់បានពេលព្យាយាមធ្វើដំណើរចូលទៅកាន់ប្រទេសអូស្ត្រាលី។

កិច្ចព្រមព្រៀងនេះត្រូវបានធ្វើឡើង ក្នុងអំឡុងពេលលោកអតីតប្រធានាធិបតីអាមេរិក បារ៉ាក់ អូបាម៉ា កាន់តំណែង។ លោក ត្រាំ បានចេញបទបញ្ជាប្រធានាធិបតីមួយ ដែលហាមឃាត់ជាបណ្តោះអាសន្នមិនឲ្យជនភៀសខ្លួនចូលមកកាន់សហរដ្ឋអាមេរិក ប៉ុន្តែបទបញ្ជាប្រធានាធិបតីនោះបានរួមបញ្ចូលមាត្រាមួយដែលផ្តល់ករណីលើកលែង «នៅពេលដែលបុគ្គលនោះអាចចូលមកកាន់សហរដ្ឋអាមេរិកដើម្បីអនុលោមទៅតាមកិច្ចព្រមព្រៀងអន្តរជាតិដែលមានស្រាប់មួយ»។

កាសែត The Washington Post បានរាយការណ៍ថា លោក ត្រាំ បានប្រាប់ដល់លោក Turnbull ថា កិច្ចព្រមព្រៀងនេះគឺជា «កិច្ចព្រមព្រៀងដ៏អាក្រក់បំផុត» ហើយប្រទេសអូស្ត្រាលីកំពុងតែព្យាយាមបញ្ជូនអ្នកបោកគ្រាប់អត្តឃាត ដូចនៅក្នុងហេតុការណ៍នៅទីក្រុង Boston ចេញពីប្រទេសខ្លួន។

សេតវិមានបានឲ្យដឹងថា ជនភៀសខ្លួនមួយក្រុមដែលមានគ្នាប្រមាណ១២០០នាក់ ភាគច្រើនមកពីប្រទេសអាហ្វហ្គានីស្ថាន អ៊ីរ៉ាក់ និងអ៊ីរ៉ង់ ត្រូវឆ្លងកាត់ការត្រួតពិនិត្យយ៉ាងហ្មត់ចត់ខ្លាំងបំផុត មុននឹងអនុញ្ញាតឲ្យចូលមកកាន់អាមេរិក។ លោក ត្រាំ បានបន្តរិះគន់កិច្ចព្រមព្រៀងនេះកាលពីល្ងាចថ្ងៃពុធ នៅក្នុងសារមួយដែលបង្ហោះលើបណ្តាញសង្គម Twitter។

លោកបានសរសេរថា «តើអ្នកជឿឬទេ? រដ្ឋបាលរបស់លោក អូបាម៉ា បានយល់ព្រមទទួលជនអន្តោប្រវេសន៍ខុសច្បាប់រាប់ពាន់នាក់ពីប្រទេសអូស្ត្រាលី។ ហេតុអ្វីបានជាដូច្នេះ? ខ្ញុំនឹងសិក្សាទៅលើកិច្ចព្រមព្រៀងដែលមិនបានការមួយនេះ!»៕

ថ្មីៗ
អត្ថបទ : ថ្មីៗ

អូស្ត្រាលីថា អាមេរិកប្តេជ្ញាអនុវត្តនូវអ្វីដែលលោក ត្រាំ ហៅថាជាកិច្ចព្រមព្រៀងជនភៀសខ្លួន «ដែលមិនបានការ»

ដូណាល់ ត្រាំ អរគុណនិងស្វាគមន៍ Samsung ដែលពិចារណាបើករោងចក្រនៅអាមេរិក

ប្រធានាធិបតីអាមេរិកលោក ដូណាល់ ត្រាំ បានអរគុណនិងស្វាគមន៍ការពិចារណារបស់ក្រុមហ៊ុនកូរ៉េខាងត្បូង Samsung ក្នុងការបើកក្រុមហ៊ុននៅអាមេរិក។ ការពិចារណានេះត្រូវបានធ្វើឡើងដោយសារតែក្រុមហ៊ុននេះបារម្ភពីការអនុវត្តគោលនយោបាយគាំពារនិយមរបស់លោក ដូណាល់ ត្រាំនៅពេលអនាគតនៅ។

«អរគុណ Samsung។យើងរីករាយណាស់ដែលមានអ្នក»។ នេះជាសាររបស់ប្រធានាធិបតីអាមេរិកលោក ដូណាល់ ត្រាំ ដែលបង្ហោះតាមគណនី Twitter ផ្លូវការរបស់ខ្លួនដើម្បីស្វាគមន៍ដែល Samsung កំពុងពិចារណាបើកក្រុមហ៊ុននៅទឹកដីអាមេរិកនោះ។

Thank you, @Samsung! We would love to have you! https://t.co/r5nxC9oOA4
— Donald J. Trump (@realDonaldTrump) February 2, 2017

ការផ្ញើសារស្វាគមន៍ក្រុមហ៊ុនគ្រឿងអេឡិចត្រូនិករបស់កូរ៉េខាងត្បូងនេះ កើតឡើងបន្ទាប់ពីទីភ្នាក់ងារព័ត៌មាន Reuters បានស្រង់សម្តីប្រភពដែលស្និទ្ធជាមួយក្រុមហ៊ុន Samsung។ ប្រភពនោះបានអះអាងថា ក្រុមហ៊ុន Samsung ពិចារណានិងវាយតម្លៃលើគម្រោងវិនិយោគនៅអាមេរិកនេះ ដើម្បីកំណត់ថាវាជារឿងចាំបាច់ពិតឬអត់។

ជារួមក្រុមហ៊ុន Samsung មិនទាន់អាចបញ្ជាក់បានថា ខ្លួននឹងត្រូវវិនិយោគលុយប៉ុន្មាន និង កំណត់បានថាតើរោងចក្ររបស់ខ្លួនអាចនឹងត្រូវកសាងនៅកន្លែងណាឲ្យជាក់ច្បាស់ឡើយ។

ការពិចារណាវិនិយោគលើការបើកក្រុមហ៊ុនថ្មីនៅអាមេរិកដើម្បីផ្គត់ផ្គង់ផលិតខ្លួននៅទីនោះ គឺដើម្បីឆ្លើយតបគោលនយោបាយគាំពារនិយមរបស់លោក ដូណាល់ ត្រាំ ដែលអាចនឹងត្រូវអនុវត្តនៅពេលខាងមុខនោះ។

យោងតាមទីភ្នាក់ងារព័ត៌មាន Reuters ដដែល ខណៈដែលក្រុមហ៊ុន Samsung កំពុងពិចារណាថាគួរបើករោងចក្រនៅអាមេរិកឬអត់ ក្រុមហ៊ុន LG អេឡិចត្រូនិកកំពុងស្វះស្វែងរកការសាងសង់រោងចក្រនៅTennessee។ ក្រុមហ៊ុននេះក៏ស្ថិតក្នុងដំណាក់កាលពិចារណា ដំឡើងរោងចក្រសាងសង់សម្ភារៈផ្ទះ និងទូទស្សន៍ជាដើមដូចគ្នា។ យ៉ាងណាក៏ដោយ អ្នកនាំពាក្យក្រុមហ៊ុននេះបដិសេធផ្តល់ព័ត៌បន្ថែមពាក់ព័ន្ធការសាងសង់រោងចក្រនេះ។

សូមបញ្ជាក់ថា ប្រធានាធិបតីអាមេរិកលោក ដូណាល់ ត្រាំ បានប្រកាសថា លោកនឹងតម្កល់ប្រយោជន៍អាមេរិកជាធំ ក្នុងពេលលោកស្បថចូលកាន់តំណែងកាលពីថ្ងៃ ២០មករា។ហើយលោកថែមទាំងសន្យាអនុវត្តគោលនយោបាយគាំពារនយោបាយដោយមានទាំងដកខ្លួនចេញពីទំនាក់ទំនងសេដ្ឋកិច្ចជាមួយប្រទេសដទៃ និងដំឡើងកម្រិតពន្ធសម្រាប់ទំនិញនាំចូលជាដើមផងដែរ៕

ថ្មីៗ
អត្ថបទ : ថ្មីៗ

ដូណាល់ ត្រាំ អរគុណនិងស្វាគមន៍ Samsung ដែលពិចារណាបើករោងចក្រនៅអាមេរិក

ទូតអាមេរិកនៅ UN៖ អាមេរិកមិនដកទណ្ឌកម្មទេ បើរុស្ស៊ីមិនប្រគល់ Crimea មកវិញ

បេសកជនពិសេសអាមេរិកប្រចាំអង្គការសហប្រជាជាតិ Nikki Haley បានប្រកាសប្រាប់ក្រុមប្រឹក្សាសន្តិសុខថា អាមេរិកនៅតែរក្សាទុកទណ្ឌកម្មដែលមានទាំងអម្បាម៉ានប្រឆាំងរុស្ស៊ីពាក់ព័ន្ធបញ្ហាអ៊ុយក្រែន។ដកទណ្ឌកម្មនេះនឹងត្រូវដកចេញ ដរាបណារុស្ស៊ីប្រគល់ទឹកដី Crimeaទៅឲ្យអ៊ុយក្រែនវិញ។

លោកស្រី Nikki Haley ឯកអគ្គរដ្ឋទូតអាមេរិកថ្មីប្រចាំអង្គការសហប្រជាជាតិបានថ្កោលទោសសកម្មភាពរុស្ស៊ីនៅភាគខាងកើតប្រទេសអ៊ុយក្រែន និងការបន្តកាន់កាប់ទឹកដី Crimea ដោយខុសច្បាប់។

សូមស្តាប់សំឡេង

យោងតាមសុន្ទរកថាដែលចុះផ្សាយក្នុងគេហទំព័របេសកកម្មសហរដ្ឋអាមេរិកប្រចាំអង្គការសហប្រជាជាតិ លោកស្រី Nikki Haley បានថ្លែងដូច្នេះថា៖«អាមេរិកនៅឈរជាមួយប្រជាជនអ៊ុយក្រែនដែលរងគ្រោះអស់ជិតបីឆ្នាំមកនេះដោយសារការកាន់កាប់និងអន្តរាគមន៍យោធារបស់រុស្ស៊ី។ យើងពិតជាចង់បានទំនាក់ទំនងល្អជាមួយរុស្ស៊ីប៉ុន្តែស្ថានភាពអាក្រក់នៅភាគខាងកើតអ៊ុយក្រែនបច្ចុប្បន្នវាទាមទារឲ្យមានការថ្កោលទោសសកម្មភាពរុស្ស៊ី»។

pic.twitter.com/VW4UTZjRXg
— Nikki Haley (@nikkihaley) February 2, 2017

ក្រៅពីនេះ បេសកជនរូបនេះពិសេសរូបនេះក៏បានបញ្ជាក់ផងដែរថា រុស្ស៊ីត្រូវបញ្ឈប់ការកាន់កាប់ទឹកដី Crimea។ អាមេរិកមិនដកទ័ណ្ឌកម្មប្រឆាំងរុស្ស៊ីឡើយ បើគ្មានការប្រគល់ទឹកដី Crimea ត្រឡប់មកអ៊ុយក្រែនវិញ។

«ឧបទ្វីប Crimea ជាផ្នែកមួយរបស់អ៊ុយក្រែន។ រាល់ទណ្ឌកម្មប្រឆាំងរុស្ស៊ីពាក់ព័ន្ធបញ្ហា Crimea នឹងត្រូវរក្សាទុក ទាល់តែរុស្ស៊ីព្រមផ្ទេរទឹកដីនេះត្រឡប់មកឲ្យអ៊ុយក្រែនវិញ»។ នេះជាការប្រកាសរបស់លោកស្រី Nikki Haley នៅចំពោះមុខក្រុមប្រឹក្សាសន្តិសុខ ។

ឯកអគ្គរដ្ឋទូតអាមេរិករូបនេះក៏បានឆ្លៀតអំពាវនាវឲ្យរុស្ស៊ីអនុវត្តកិច្ចព្រមព្រៀងសន្តិភាពទីក្រុង Minsk ឲ្យបានត្រឹមត្រូវនិងពេញលេញដើម្បីបញ្ចប់បញ្ហាប្រឈមទាំងឡាយណាដែលកើតឡើងនៅភាគខាងកើត។

ជម្លោះអ៊ុយក្រែនផ្ទុះឡើងនៅដើមឆ្នាំ ២០១៤ ក្រោយប្រជាជនគាំទ្រសហភាពអឺរ៉ុបនាំគ្នាធ្វើបដិវត្តគាស់រំលើងរបបដឹកនាំស្និទ្ធរុស្ស៊ីរបស់លោក Viktor Yanukovych។ ក្រោយបដិវត្តកើតឡើងរុស្ស៊ីបានចូលអន្តរាគមន៍ និងជួយរៀបចំប្រជាមតិនៅទឹកដី Crimea ដើម្បីផ្តាច់ខ្លួនចេញពីអ៊ុយក្រែនផង។ ហើយមិនត្រឹមតែប៉ុណ្ណោះរុស្ស៊ីក៏រងការចោទប្រកាន់ថា បានបន្តជួយជ្រោមជ្រែងកងកម្លាំងឧទ្ទាមដែលប្រឆាំងរដ្ឋាភិបាលនៅតំបន់ភាគខាងកើតដូចគ្នា។

យ៉ាងណាក៏ដោយចុះ ការលើកឡើងរបស់មន្ត្រីទូតជាន់ខ្ពស់អាមេរិកប្រចាំអង្គការសហប្រជាជាតិហាក់បីដូចជា ផ្ទុយជំហររបស់រដ្ឋបាលលោក ដូណាល់ ត្រាំ ដែលចង់បានទំនាក់ទំនងល្អជាមួយរដ្ឋាភិបាលក្រេមឡាំង។ គេធ្លាប់ឃើញ ការលើកឡើងពីការឈានទៅដកទណ្ឌកម្មប្រឆាំងរុស្ស៊ី និងទទួលស្គាល់ទឹកដី Crimea ជាផ្នែកមួយរបស់រុស្ស៊ីដូចគ្នាដែរ ដើម្បីត្រូសត្រាយផ្លូវសម្រាប់ស្តារចំណងការទូតឡើងវិញ៕

ថ្មីៗ
អត្ថបទ : ថ្មីៗ

ទូតអាមេរិកនៅ UN៖ អាមេរិកមិនដកទណ្ឌកម្មទេ បើរុស្ស៊ីមិនប្រគល់ Crimea មកវិញ

ប្រធានាធិបតី ដូណាល់ ត្រាំ ជួបពិភាក្សាការងារជាមួយនាយកក្រុមហ៊ុនធំៗលើបញ្ហាសេដ្ឋកិច្ចរបស់អាមេរិក

(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បានបើកកិច្ចជំនួបពិភាក្សាមួយជាមួយបណ្តានាយកក្រុមហ៊ុនធំៗរបស់សហរដ្ឋអាមេរិកនៅថ្ងៃសុក្រនេះ (កំពុងជួបម៉ោងក្នុងរដ្ឋធានីវ៉ាស៊ីនតោន)។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅយប់ថ្ងៃសុក្រ ទី០៣ ខែកុម្ភៈ ឆ្នាំ២០១៧។

សេតវិមានបានឲ្យដឹងនៅក្នុងសេចក្តីថ្លែងការណ៍ថា លោកប្រធានាធិបតី ដូណាល់ ត្រាំ យល់យ៉ាងជាក់ច្បាស់អំពីសារៈសំខាន់ នៃកិច្ចពិភាក្សាបើកទូលាយមួយ ជាមួយនឹងបណ្តាថ្នាក់ដឹកមុខជំនួញធំៗរបស់អាមេរិក ដើម្បីផ្តោះផ្តូរយោបល់គ្នា សំដៅរិះរកមធ្យោបាយធ្វើយ៉ាងណាឲ្យសេដ្ឋកិច្ចជាតិ របស់យើងមានភាពរឹងមាំបំផុតឡើងវិញ។

គួរបញ្ជាក់ថា CEO នៃក្រុមហ៊ុនធំៗរបស់អាមេរិកដូចជា Apple, Intel, Microsoft, Oracle, IBM, Google, Facebook, Ford Motor, Tesla Inc, General Motors, JPMorgan Chase, និង Cisco បានបង្ហាញវត្តមាននៅក្នុងជំនួបពិភាក្សាខាងលើនេះ។

នៅក្នុងជំនួបនោះលោកប្រធានាធិបតី ដូណាល់ ត្រំា បាននិយាយថា៖ «យើងចង់ឱ្យអ្នករាល់គ្នារក្សានូវគំនិតនៃការបង្កើតអ្វីដែលជាគំហើបថ្មីៗដែលគ្មាននរណា ម្នាក់ធ្វើបានដូចអ្នក នៅក្នុងពិភពលោកនេះ»៕

Fresh News

ប្រធានាធិបតី ដូណាល់ ត្រាំ ជួបពិភាក្សាការងារជាមួយនាយកក្រុមហ៊ុនធំៗលើបញ្ហាសេដ្ឋកិច្ចរបស់អាមេរិក

ទីបំផុតអាមេរិក សម្រេចដាក់ទណ្ឌកម្មបន្ថែមទៅលើអ៊ីរ៉ង់ ដើម្បីឆ្លើយតបការធ្វើតេស្តមីស៊ីលផ្លោងឆ្លងទ្វីប

(វ៉ាស៊ីនតោន)៖ សហរដ្ឋអាមេរិកនាថ្ងៃសុក្រសប្តាហ៍នេះ (ពេលវេលានៅរដ្ឋធានីវ៉ាស៊ីនតោន) បានសម្រេចដាក់ទណ្ឌកម្មទៅលើបុគ្គលចំនួន១៣រូប និងស្ថាប័នចំនួន១២ផ្សេងទៀតរបស់អ៊ីរ៉ង់ ដែលជាការដាក់ពិន័យបន្ថែមទៅលើរដ្ឋាភិបាលទីក្រុងតេហេរ៉ង់ បន្ទាប់ពីសេតវិមានបានចាត់ទុកប្រទេសតំបន់មជ្ឈឹមបូព៌ាមួយនេះ ទៅនៅក្នុងបញ្ជីឃ្លាំងមើលដោយការប្រុងប្រយ័ត្នខ្ពស់ ដោយសារតែការបាញ់សាកល្បងមីស៊ីលផ្លោងឆ្លងទ្វីប និងសកម្មភាពមួយចំនួនទៀត។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅយប់ថ្ងៃសុក្រ ទី០៣ ខែកុម្ភៈ ឆ្នាំ២០១៧។

យោងតាមសេចក្តីថ្លែងការណ៍នៅលើគេហទំព័ររបស់ក្រសួងរតនាគារជាតិអាមេរិក បុគ្គលនិងស្ថាប័នរបស់អ៊ីរ៉ង់ដែលបានទទួលការដាក់ទណ្ឌកម្មមួយចំនួនមានមូលដ្ឋាននៅក្នុង លីបង់ អេមីរ៉ាត់ អារ៉ាប់រួម និងចិន។ ការដាក់ទណ្ឌកម្មបន្ថែមថ្មីនេះ គឺស្ថិតក្នុងផ្នែកនៃកិច្ចខិតខំប្រឹងប្រែងឥតឈប់ឈររបស់សហរដ្ឋអាមេរិក ដើម្បីទប់ស្កាត់ចេតនាអាក្រក់របស់អ៊ីរ៉ង់នៅឯក្រៅប្រទេស ដែលហួសផុតពីដែនកំណត់នៃកិច្ចព្រមព្រៀងនុយក្លេអ៊ែរ រវាងរដ្ឋាភិបាលទីក្រុងតេហេរ៉ង់ និងបណ្តាប្រទេសមហាអំណាចពិភពលោក។

គួរបញ្ជាក់ថា កាលពីថ្ងៃទី២៩ ខែមករាកន្លងទៅថ្មីៗនេះដែលត្រូវនឹងថ្ងៃអាទិត្យសប្តាហ៍មុន រដ្ឋាភិបាលទីក្រុងតេហេរ៉ង់ បានធ្វើការបាញ់សាកល្បង មីស៊ីលផ្លោងឆ្លងទ្វីបចំនួនមួយគ្រាប់ និងមីស៊ីលដែលមានសមត្ថភាពបំពាក់ក្បាលគ្រាប់នុយក្លេអ៊ែរមួយគ្រាប់ផ្សេងទៀត ដោយជោគជ័យ ហើយអាមេរិកបានចាត់ទុកទង្វើនេះថា ជាការបំពានលើសេចក្តីសម្រេចរបស់ក្រុមប្រឹក្សាសន្តិសុខ នៃអង្គការសហប្រជាជាតិ ទោះបីជារដ្ឋមន្រ្តីក្រសួងការពារជាតិ អ៊ីរ៉ង់បានចេញមុខអះអាងថា ទង្វើទាំងនេះពុំបានរំលោភបំពានលើកិច្ចព្រមព្រៀងណាមួយយ៉ាងណាក្តី៕

Fresh News

ទីបំផុតអាមេរិក សម្រេចដាក់ទណ្ឌកម្មបន្ថែមទៅលើអ៊ីរ៉ង់ ដើម្បីឆ្លើយតបការធ្វើតេស្តមីស៊ីលផ្លោងឆ្លងទ្វីប

ប្រទេសរុស្ស៊ី «ព្រមានចាត់វិធានការទប់ទល់ អាមេរិក-កូរ៉េខាងត្បូង បើសិនជា THAAD ត្រូវបានដាក់ពង្រាយមែននោះ!»

(សេអ៊ូល)៖ បន្ទាប់ពីចិនឥឡូវដល់វេនរុស្ស៊ីវិញម្ដង ដែលចេញមុខព្រមាន ក៏ដូចជាសម្ដែងការជំទាស់ទៅនឹងប្រព័ន្ធខែលការពារមីស៊ីល THAAD ដោយអគ្គរដ្ឋទូតរុស្ស៊ីប្រចាំកូរ៉េខាងត្បូង បានបញ្ជាក់នៅថ្ងៃនេះថា ទីក្រុងមូស្គូអាចនឹងចាត់វិធានការទប់ទល់ ដើម្បីការពារសន្តិសុខជាតិរបស់ខ្លួន នៅក្នុងករណីដែលប្រព័ន្ធមីស៊ីលនេះ ត្រូវបានសហរដ្ឋអាមេរិកដាក់ពង្រាយនៅលើទឹកដីកូរ៉េខាងត្បូងមែននោះ។ នេះបើតាមការចេញផ្សាយដោយ ទីភ្នាក់ងារសារព័ត៌មានយ៉ុនហាប់ នៅល្ងាចថ្ងៃសុក្រ ទី០៣ ខែកុម្ភៈ ឆ្នាំ២០១៧។

យោងតាមអគ្គរដ្ឋទូតរុស្ស៊ី លោក អាឡិចសាន់ឌឺ ទីម៉ូនីន (Alexander Timonin) ការដាក់ពង្រាយប្រព័ន្ធមីស៊ីល THAAD នៅក្នុងតំបន់ឧបទ្វីបកូរ៉េ នឹងបង្កផលប៉ះពាល់ ដ៏គ្រោះថ្នាក់ដល់កិច្ចខិតខំប្រឹងប្រែងរក្សាសន្តិភាព និងស្ថេរភាពនៅក្នុងតំបន់ ហើយវាគឺជាការគម្រាមកំហែងមួយដល់សន្តិសុខជាតិរុស្ស៊ី បើទោះបីជាសហរដ្ឋអាមេរិក និងកូរ៉េខាងត្បូង ធ្លាប់បានអះអាងជាច្រើនដងរួចមកហើយថា THAAD មានគោលដៅតែមួយគត់លើកូរ៉េខាងជើងក៏ដោយ។

លោក អាឡិចសាន់ឌឺ បានបញ្ជាក់ដូច្នេះថា «យើងនឹងមិនមានជំរើសអ្វីផ្សេងទៀតនោះទេ ក្រៅតែពីការចាត់វិធានការទប់ទល់ ដើម្បីការពារសន្តិសុខជាតិ នៅក្នុងករណីប្រព័ន្ធមីស៊ីល THAAD ត្រូវបានដាក់ពង្រាយ តែខ្ញុំក៏ចង់បញ្ជាក់ដែរថា កិច្ចសហប្រតិបត្តិការសេដ្ឋកិច្ចទ្វេភាគីរុស្ស៊ី-កូរ៉េខាងត្បូង មានសារៈសំខាន់ដូចគ្នានឹងបញ្ហាប្រព័ន្ធមីស៊ីល THAAD ដែរ។ ក៏ប៉ុន្តែទោះបីជាវាសំខាន់យ៉ាងណា ក៏ប្រហែលជាមិនស្មើនឹងទំនាក់ទំនងទ្វេភាគីនេះដែរ»។

គួរបញ្ជាក់ថា ការលើកឡើងរបស់លោក អាឡិចសាន់ឌឺ ទីម៉ូនីន ត្រូវបានធ្វើឡើងក្នុងសន្និសីទសារព័ត៌មានមួយ នៅឯស្ថានទូតរុស្ស៊ីប្រចាំទីក្រុងសេអ៊ូល តែប៉ុន្មានម៉ោង ប៉ុណ្ណោះបន្ទាប់ពីរដ្ឋមន្ត្រីការពារជាតិអាមេរិកថ្មី លោក ជែម ម៉ាតធីស (Jame Mattis ) បានអះអាងថាប្រព័ន្ធខែលការពារមីស៊ីល THAAD នឹងត្រូវដាក់ពង្រាយនៅលើទឹកដីកូរ៉េខាងត្បូងក្នុងឆ្នាំ២០១៧នេះតែម្តង ដើម្បីការពារទីក្រុងសេអ៊ូលពីការគំរាមកំហែងរបស់កូរ៉េខាងជើង៕

Fresh News

ប្រទេសរុស្ស៊ី «ព្រមានចាត់វិធានការទប់ទល់ អាមេរិក-កូរ៉េខាងត្បូង បើសិនជា THAAD ត្រូវបានដាក់ពង្រាយមែននោះ!»

ក្រុមហ៊ុន Airbus នៅចិន គ្រោងដំឡើងយន្តហោះ A320neo ប្រភេទសន្សំសំចៃខ្ពស់ ឲ្យបាន០៤គ្រឿងក្នុងមួយខែ!

(ប៉េកាំង)៖ ក្រុមហ៊ុនតំឡើងយន្តហោះ Airbus (Tainjin) Final Assembly Co., Ltd មានមូលដ្ឋាននៅទីក្រុង Tianjin ប្រទេសចិន នឹងចាប់ផ្តើមធ្វើការដំឡើងយន្តហោះដឹកអ្នកដំណើរធុន Airbus A320neo ដំបូងបំផុតរបស់ខ្លួននៅខែកក្កដា ហើយបញ្ចេញជាផ្លូវការនៅខែកញ្ញាខាងមុខ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនារសៀលថ្ងៃសុក្រ ទី០៣ ខែកុម្ភៈ ឆ្នាំ២០១៧។

ក្រុមហ៊ុនដំឡើងយន្តហោះដឹកអ្នកដំណើរធុន A320 ដែលមានការចូលរួមពីសំណាក់ក្រុមហ៊ុន Airbus របស់ប្រទេសបារាំង ក្រុមហ៊ុនសាជីវកម្មឧស្សាហកម្មអាកាសចរណ៍ចិន និងតំបន់ពាណិជ្ជកម្មសេរី Tianjin ត្រូវបានបង្កើតឡើងនៅក្នុងទីក្រុង Tainjin ប្រទេសចិនកាលពីឆ្នាំ២០០៧។ ក្រុមហ៊ុននេះបានចាប់ផ្តើមប្រតិបត្តិការតាំងពីខែកញ្ញា ឆ្នាំ២០០៨ និងបានតំឡើងយន្តហោះ Airbus ធុន A320 មិនតិចជាង៣០០គ្រឿងនោះឡើយ ហើយចាប់ពីឆ្នាំ២០១៧នេះតទៅ ក្រុមហ៊ុនគ្រោងនឹងធ្វើការតំឡើងយន្តហោះធុន A320neo ចំនួនបួនគ្រឿងជារៀងរាល់ខែ។

គួរបញ្ជាក់ថាយន្តហោះដឹកអ្នកដំណើរប្រភេទ A320neo គឺជាសមាជិកដ៏ថ្មីសន្លាងបំផុតនៃត្រកូល Airbus A320 ហើយបើប្រៀបធៀបគ្នាជាមួយប្រភេទ A320 ដ៏ទៃទៀត យន្តហោះធុន A320neo នេះអាចសន្សំសំចៃប្រេងឥន្ធនៈបានពី១៥ ទៅ២០ភាគរយ៕

Fresh News

ក្រុមហ៊ុន Airbus នៅចិន គ្រោងដំឡើងយន្តហោះ A320neo ប្រភេទសន្សំសំចៃខ្ពស់ ឲ្យបាន០៤គ្រឿងក្នុងមួយខែ!

រដ្ឋបាលត្រាំ ប្តូរជំហរព្រមានអ៊ីស្រាអែលថា ការសង់លំនៅដ្ឋានថ្មីលើដីប៉ាឡេស្ទីនមិនបង្កើត សន្តិភាពឡើយ

ធ្លាប់តែសរសើរនិងការពាររដ្ឋាភិបាលអ៊ីស្រាអែលកន្លងមក រដ្ឋបាលលោកដូណាល់ ត្រាំ ស្រាប់តែប្តូរឥរិយាបទរបស់ខ្លួនភ្លាម ដោយរិះគន់កម្មវិធីសាងសង់លំនៅដ្ឋានថ្មីនៅលើទឹកដីប៉ាឡេស្ទីននៅសប្តាហ៍នេះ។ រដ្ឋបាលនេះព្រមានថា សកម្មភាពអ៊ីស្រាអែលលើដីប៉ាឡេស្ទីន មិនជួយកសាងសន្តិភាពសម្រាប់ភាគីទាំងពីរឡើយ។

ជារឿងខុសប្លែកពីសព្វមួយដង សហរដ្ឋអាមេរិកក្រោមរដ្ឋបាលលោក ដូណាល់ ត្រាំ ស្រាប់តែចាប់ផ្តើមរិះគន់ការសង់លំនៅដ្ឋានអ៊ីស្រាអែលថ្មីនៅលើទឹកដីប៉ាឡេស្ទីនបច្ចុប្បន្ននេះ។ រដ្ឋបាលអាមេរិកមើលឃើញថា ការបន្តសកម្មភាពអ៊ីស្រាអែលមិនជួយបង្កើតសន្តិភាពរវាងអ៊ីស្រាអែលនិងប៉ាឡេស្ទីន និងតំបន់ទាំងមូលឡើយ។

អ្នកនាំពាក្យសេតវិមាន Sean Spicer បានបញ្ជាក់ដូច្នេះថា៖« ខណៈយើងមិនជឿជាក់ថា សំណង់ដែលមានស្រាប់មិនមែនជាឧបសគ្គសម្រាប់ការកសាងសន្តិភាព សំណង់ផ្ទះសម្បែងថ្មីនិងការពង្រីកការសាងសង់លើសព្រំដែនបច្ចុប្បន្ននេះប្រហែលជាមិនជួយដល់ការសម្រេចបំណងបង្កើតសន្តិភាពឡើយ»។

ការលើកឡើងរបស់មន្ត្រីសេតវិមានរូបនេះកើតឡើងប៉ុន្មានថ្ងៃប៉ុណ្ណោះក្រោយក្រសួងការពារជាតិអ៊ីស្រាអែលប្រកាសដាក់គម្រោងសាសង់លំនៅដ្ឋានពលរដ្ឋអ៊ីស្រាអែលថ្មីចំនួន ៣ពាន់ខ្នងផ្សេងទៀតនៅលើទឹកដី West Bank។

តាមការលើកឡើងរបស់អ្នកនាំពាក្យប្រធានាធិបតីរូបនេះហាក់បង្ហាញឲ្យឃើញពីការផ្លាស់ប្តូរជំហរបន្តិចរបស់អាមេរិកចំពោះរដ្ឋាភិបាលអ៊ីស្រាអែល ជាពិសេសការបន្តបំពានច្បាប់អន្តរជាតិនោះ។ ថ្វីបើអាមេរិកជំទាស់ដំណោះស្រាយអង្គការសហប្រជាជាតិដែលថ្កោលទោសអ៊ីស្រាអែលក៏ដោយ អាមេរិកក៏មិនចង់ឲ្យអ៊ីស្រាអែលបានចិត្តបន្តសង់សំណង់រំលោភដីគេឯងមិនញញើតបែបនេះដែរ។

ត្រឡប់មកវិញ លោក Sean Spicer ក៏ប្រាប់អ្នកសារព័ត៌មានផងដែរថា លោក ដូណាល់ ត្រាំ នឹងចាប់ផ្តើមជជែកិជាមួយមេដឹកនាំអ៊ីស្រាអែលពីបញ្ហាកសាងសន្តិភាពជាមួយប៉ាឡេស្ទីន និងបញ្ហាប្រឈមទាំងអម្បាលម៉ាននៅចុងខែនេះ។

« ដូចដែលប្រធានាធិបតីបានលើកឡើងជាច្រើនដងមកហើយ, គាត់សង្ឃឹមថានឹងអាចបង្កើតសន្តិភាពបាននៅមជ្ឈិមបូព៌ា។ រដ្ឋបាលលោក ត្រាំ មិនមានជំហរផ្លូវការទេលើសកម្មភាពសង់ផ្ទះសម្បែងបច្ចុប្បន្ន និងរង់ចាំការជជែកពិភាក្សាជាមួយនាយករដ្ឋមន្ត្រីអ៊ីស្រាអែលនៅពេលដែលលោកមកទស្សនកិច្ចនៅអាមេរិកចុងខែនេះ»។ នេះជាការបញ្ជាក់របស់លោក Sean Spicer។

ថ្មីៗ
អត្ថបទ : ថ្មីៗ

រដ្ឋបាលត្រាំ ប្តូរជំហរព្រមានអ៊ីស្រាអែលថា ការសង់លំនៅដ្ឋានថ្មីលើដីប៉ាឡេស្ទីនមិនបង្កើត សន្តិភាពឡើយ

ការសិក្សាថ្មីបង្ហាញថា២ពាន់លានឆ្នាំមុន ភពព្រះអង្គារធ្លាប់មានសកម្មភាពភ្នំភ្លើងខ្លាំង!

(អវកាស)៖ ការសិក្សាស្រាវយ៉ាងដិតដល់ថ្មីមួយទៅលើដុំថ្មនៃភពអង្គារ ដែលត្រូវបានរកឃើញកាលពីឆ្នាំ២០១២ បានបង្ហាញឲ្យដឹងថា ប្រមាណជាពីរពាន់លានឆ្នាំមុន មានសកម្មភាពភ្នំភ្លើងនៅលើភពក្រហមមួយនេះ។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅមុននេះបន្តិចនារសៀលថ្ងៃសុក្រ ទី០៣ ខែកុម្ភៈ ឆ្នាំ២០១៧។

ពេលខ្លះរបកគំហើញផ្នែកវិទ្យាសាស្រ្តកើតឡើងមកពីគោលដៅ ដែលមិននឹកស្មានមិនដល់។ ចូរនាំគ្នាគិតមើលថាអ្វីម្យ៉ាងដែលនៅក្នុងករណីនេះជាថ្មដ៏ធំមហិមាមួយ បានទៅបុកនឹងភពអង្គារ៍ នៅក្នុងការប៉ះទង្គិចគ្នាយ៉ាងខ្លាំងក្លាបំផុតមួយរហូតទាល់តែ បំណែកផ្ទៃដីរបស់ភពនេះបានហោះខ្ទាតចាកចេញឆ្ងាយក្នុងល្បឿនដ៏លឿន ដែលគ្រប់គ្រាន់ក្នុងការគេចផុតពីទំនាញរបស់ភពអង្គារ។

ក្រោយមកគំនរនៃកម្ទេចកម្ទីទាំងអស់នោះបានធ្វើដំណើរឆ្លងកាត់គន្លងគោចររបស់ផែនដី ហើយខ្លះបានឈានចូលក្នុងបរិយាកាសនៃភពរបស់យើង ហើយជាសំណាងល្អថែមទៀតនោះបានធ្លាក់ទៅលើផ្ទៃដីមួយកន្លែងនៅទ្វីបអាហ្រ្វិកជាជាងទៅក្នុងសមុទ្រដែលគ្របដណ្តប់ជាង៧០ភាគរយ នៃផែនដីទាំងមូល។

មកដល់ឆ្នាំ២០១២ គឺប្រហែលជាមួយលានឆ្នាំក្រោយពេលចាកចេញពីភពកំណើតរបស់ពួកវា ថ្មទាំងនេះក៏ត្រូវបានរកឃើញដោយក្រុមអ្នកវិទ្យាសាស្រ្ត និងមួយដុំត្រូវបានដាក់ឈ្មោះឲ្យថា «Northwest Africa 7635» ហើយនាពេលនេះបំណែកថ្មដែលបានធ្វើដំណើរយ៉ាងវែងឆ្ងាយមកពីភពអង្គារអាចប្រាប់យើងអំពីភពកំណើតរបស់ពួកវាបានហើយ។

យោងតាមរបាយការណ៍សិក្សាស្រាវជ្រាវរបស់អ្នកវិទ្យាសាស្រ្តមួយក្រុមដឹកនាំដោយ លោក Tom Lapen នៃសាកលវិទ្យាល័យ Houston រដ្ឋតិចសាស ដុំថ្ម Northwest Africa 7635 ស្ថិតនៅក្នុងចំណោមអាចម៍ផ្កាយនៃភពអង្គារទាំង១១ដុំ ដែលត្រូវបានរកឃើញនៅលើផែនដី ហើយមានលក្ខណៈដូចគ្នា ទើបត្រូវបាគេសន្និដ្ឋានថាដុំថ្មទាំងអស់នេះ មកពីកន្លែងតែមួយនៃភពអង្គារ។ ប៉ុន្តែពួកវាបានកកើតឡើងនៅក្នុងពេលខុសៗគ្នា និងមានផ្ទុកសារធាតុរ៉ែភ្នំភ្លើង «Shergottite» ហើយ Northwest Africa 7635 មានវ័យកាលចំណាស់ជាងគេបង្អស់ ពោលគឺវាបានកកើតឡើងតាំងពីប្រមាណជា២.៤ពាន់លានឆ្នាំមុន ដែលប្រការនេះបានធ្វើឲ្យភ្នំមួយចំនួននៅលើភពអង្គារ ក្លាយជាភ្នំភ្លើងដែលមានអាយុវែងជាងគេបំផុតនៅក្នុងប្រព័ន្ធព្រះអាទិត្យ។ ក្រុមអ្នកវិទ្យាសាស្ត្រនៅតែបន្តការសិក្សាបន្ថែមទៀតជុំវិញដុំថ្ម ដែលត្រូវបានគេអះអាងថា មកពីភពអង្គារនោះ៕

Fresh News

ការសិក្សាថ្មីបង្ហាញថា២ពាន់លានឆ្នាំមុន ភពព្រះអង្គារធ្លាប់មានសកម្មភាពភ្នំភ្លើងខ្លាំង!

ក្រុមរដ្ឋអាជ្ញាកូរ៉េខាងត្បូង «ព្យាយាមសម្រុកចូលឆែកឆេរក្នុងវិមានប្រធានាធិបតី» តែមិនបានសម្រេច ពាក់ព័ន្ធរឿងអាស្រូវលោកស្រី ផាក គឺនហេ!

(សេអ៊ូល)៖ ក្រុមរដ្ឋអាជ្ញាពិសេសកូរ៉េខាងត្បូងដែលកំពុងធ្វើការស៊ើបអង្កេតដោយឯករាជ្យជុំវិញរឿងអាស្រូវនយោបាយរបស់លោកស្រី ផាក គឺនហេ នៅថ្ងៃសុក្រនេះបានព្យាយាមសំរុកចូលឆែកឆេរវិមានប្រធានាធិបតី Blue House ប៉ុន្តែក្រុមមន្រ្តីនៅទីនោះបានចេញមករារាំងការប៉ុនប៉ងនេះ ដោយសម្អាងលើហេតុផលថា អាចនឹងធ្វើឲ្យបែកធ្លាយព័ត៌មានសម្ងាត់ជាតិ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនារសៀលថ្ងៃសុក្រ ទី០៣ ខែកុម្ភៈ ឆ្នាំ២០១៧។

ក្រុមប្រឹក្សាឯករាជ្យខាងលើបានឲ្យដឹងថាខ្លួនបានសម្រេចឲ្យមានការឆែកឆេរ និងដីការឹបអូសលើវិមានប្រធានាធិបតីកូរ៉េខាងត្បូង នៅវេលាម៉ោងប្រមាណជា១០៖០០នាទីព្រឹកថ្ងៃសុក្រនេះ ហើយមិនបានរៀបរាប់លម្អិតនោះឡើយ ដោយរដ្ឋអាជ្ញាពិសេសបានព្យាយាមសំរុកចូលទៅក្នុងការិយាល័យនៃ វិមាន Cheong Wa Dae (Blue House) ក្នុងគោលបំណងរឹបអូសយកវត្ថុតាង រួមទាំងឯកសារទាំងឡាយណាដែលមានជាប់ពាក់ព័ន្ធជាមួយរឿងអាស្រូវដែលបាន និងកំពុងធ្វើឲ្យប្រទេសកូរ៉េខាងត្បូងរង្គោះរង្គើរជាខ្លាំង រហូតឈានដល់ការបោះឆ្នោតទម្លាក់លោកស្រី ផាក គឺនហេ ក៏ប៉ុន្តែការប៉ុនប៉ងនេះមិនបានសម្រេចដូចបំណងឡើយ ដោយក្រុមមន្រ្តីនៅវិមាន Cheong Wa Dae បានបដិសេធចំពោះការចុះឆែកឆេរនិងរឹបអូស ដោយលើកឡើងពីលទ្ធភាពនៃការបែកធ្លាយរបាយការណ៍សម្ងាត់។

គួរបញ្ជាក់ថា ដីការរឹបអូសនេះត្រូវបានដាក់ចេញដោយតុលាការទីក្រុងសេអ៊ូល នាថ្ងៃព្រហស្បតិ៍ម្សិលមិញនេះ ហើយសុពលភាពរយៈពេល០៧ថ្ងៃរបស់វាត្រូវបានអូសបន្លាយ ដើម្បីអនុញ្ញាតឲ្យក្រុមរដ្ឋអាជ្ញាពិសេសមានពេលវេលាគ្រប់គ្រាន់បន្ថែម ដើម្បីព្យាយាមធ្វើការចុះឆែកឆេរនិងរឹបអូសជាថ្មីម្តងទៀត៕

Fresh News

ក្រុមរដ្ឋអាជ្ញាកូរ៉េខាងត្បូង «ព្យាយាមសម្រុកចូលឆែកឆេរក្នុងវិមានប្រធានាធិបតី» តែមិនបានសម្រេច ពាក់ព័ន្ធរឿងអាស្រូវលោកស្រី ផាក គឺនហេ!

ច្បាស់ទែង! រដ្ឋមន្រ្តីការពារជាតិអាមេរិកធានាថា «ប្រព័ន្ធមីស៊ីល THAAD នឹងត្រូវដាក់នៅកូរ៉េខាងត្បូងក្នុងឆ្នាំនេះ ទោះបីមានការប្រឆាំងពីរុស្ស៊ីនិងចិន!»

(សេអ៊ូល)៖ រដ្ឋមន្រ្តីការពារជាតិអាមេរិកលោក Jame Mattis នៅថ្ងៃសុក្រនេះបានធានាអះអាងថា ប្រព័ន្ធខែលការពារមីស៊ីល THAAD នឹងត្រូវដាក់ពង្រាយនៅលើទឹកដីកូរ៉េខាងត្បូងនាឆ្នាំ២០១៧នេះតែម្តង ដើម្បីការពារសម្ព័ន្ធមិត្តដ៏ជិតស្និទ្ធមួយនេះ ព្រមទាំងកងកម្លាំងអាមេរិកដែលកំពុងឈរជើងនៅទីនោះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនារសៀលថ្ងៃសុក្រ ទី០៣ ខែកុម្ភៈ ឆ្នាំ២០១៧។

ការដាក់ពង្រាយប្រព័ន្ធ THAAD ដែលពោរពេញដោយភាពចម្រូងចម្រាស់នេះ បានទាក់ទាញការរិះគន់ធ្ងន់ៗ និងការជំទាស់ជាខ្លាំងពីសំណាក់ចិន និងរុស្ស៊ីដោយសារតែរ៉ាដា X-band របស់ប្រព័ន្ធមីស៊ីលការពារដែនអាកាសដ៏ទំនើបនេះ អាចជ្រៀតចូលបានយ៉ាងជ្រៅទៅក្នុងទឹកដីរបស់ប្រទេសទាំងពីរនេះ ដែលនឹងបំបែកតម្លាភាពយុទ្ធសាស្រ្ត ហើយថែមទាំងជំរុញឲ្យមានការប្រកួតប្រជែងផ្នែកសព្វាវុធនៅក្នុងតំបន់កាន់តែខ្លាំងថែមទៀត។

ថ្លែងក្នុងសុន្ទរកថានៅមុនជំនួបពិភាក្សាជាមួយលោក Han Min-Koo រដ្ឋមន្រ្តីការពារជាតិកូរ៉េខាងត្បូង លោក Jame Mattis បានលើកឡើងថា កូរ៉េខាងជើងកំពុងតែបន្តធ្វើការគំរាមកំហែងតាមរយៈពាក្យសម្តី និងសកម្មភាពផ្សេងៗដូចជា ការបាញ់សាកល្បងមីស៊ីលផ្លោង ព្រមទាំងការអភិវឌ្ឍនៃកម្មវិធីនុយក្លេអ៊ែររបស់ខ្លួន។ លោក Mattis បាននិយាយថាសហរដ្ឋអាមេរិកនៅក្នុងអាណត្តិថ្មីនេះ «នឹងចាត់វិធានការប្រកបដោយប្រសិទ្ធភាពពិតៗ» ប្រសិនបើរដ្ឋកុម្មុយនិស្តមួយនេះហ៊ានប្រើប្រាស់អាវុធនុយក្លេអ៊ែរ ដោយរួមបញ្ចូលទាំងការបំពាក់ប្រព័ន្ធប្រឆាំងមីស៊ីល THAAD នៅកូរ៉េខាងត្បូង ដើម្បីការពារកងទ័ពអាមេរិកនៅទីនោះ និងប្រជាជនកូរ៉េខាងត្បូង។

គួរបញ្ជាក់ថាលោក James Mattis បានមកដល់រដ្ឋធានីសេអ៊ូលនាថ្ងៃព្រហស្បតិ៍ម្សិលមិញនេះ នៅក្នុងដំណើរទស្សនកិច្ចនៅឯក្រៅប្រទេសលើកទីមួយរបស់ខ្លួន គិតចាប់តាំងពីបានឡើងកាន់តំណែងជារដ្ឋមន្រ្តីការពារជាតិអាមេរិកកាលពីសប្តាហ៍មុន។ បន្ទាប់មកលោក Mattis នឹងចាកចេញពីកូរ៉េខាងត្បូងហើយបន្តឆ្ពោះទៅបំពេញទស្សនកិច្ចរយៈពីរថ្ងៃថែមទៀតនៅប្រទេសជប៉ុន៕

Fresh News

ច្បាស់ទែង! រដ្ឋមន្រ្តីការពារជាតិអាមេរិកធានាថា «ប្រព័ន្ធមីស៊ីល THAAD នឹងត្រូវដាក់នៅកូរ៉េខាងត្បូងក្នុងឆ្នាំនេះ ទោះបីមានការប្រឆាំងពីរុស្ស៊ីនិងចិន!»

វិលមុខ! ប្រធានាធិបតីអាមេរិកលោក ដូណាល់ ត្រាំ ផ្ទុះសង្គ្រាមសម្តីជាមួយតារាហូលីវូដដ៏ល្បីគឺលោក អាណុល!

(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បានសំណូមពរអ្នកដែលអញ្ជើញទៅចូលពិធីសាសនាប្រចាំឆ្នាំ «National Prayer Breakfast» នៅព្រឹកថ្ងៃព្រហស្បតិ៍សប្តាហ៍នេះ (ម៉ោងនៅរដ្ឋធានីវ៉ាស៊ីនតោន) ឲ្យរួមគ្នាធ្វើការបួងសួងបែរបន់ដល់តារាភាពយន្តហូលីវូដដ៏ល្បីគឺលោក អាណុល (Arnold Schwarzenegger) ដែលបានជំនួសតំណែងរបស់លោកជាពិធីករនៃកម្មវីធីទូរទស្សន៍ NBC «The Celebrity Apprentice» ពីព្រោះតែប្រជាប្រិយភាពនៃកម្មវិធីនេះមានភាពធ្លាក់ចុះខ្លាំង មិនដូចកាលដែលលោក ត្រាំ នៅជាតារារបស់កម្មវីធីនេះនោះឡើយ។ នេះបើតាមការចេញផ្សាយដោយ CNN នៅរសៀលថ្ងៃសុក្រ ទី០៣ ខែកុម្ភៈ ឆ្នាំ២០១៧។

នាកិច្ចចាប់ផ្តើមនៃការថ្លែងសុន្ទរកថានៅក្នុងពិធីខាងលើលោក ដូណាល់ ត្រាំ បាននិយាយយ៉ាងដូច្នេះថា «នៅពេលដែលខ្ញុំបានឈរឈ្មោះដើម្បីប្រកួតប្រជែងយកតំណែងជាប្រធានាធិបតីអាមេរិក ខ្ញុំចាំបាច់ត្រូវចាកចេញពីកម្មវិធីទូរទស្សន៍ដ៏មានប្រជាប្រិយភាពនេះ ហើយពួកគេបានយកតារាភាពយន្តហូលីវូដដ៏ល្បីលោក អាណុល មកជំនួសតំណែងខ្ញុំ ប៉ុន្តែយើងទាំងអស់គ្នាដឹងច្បាស់ហើយថា តើវាបានក្លាយទៅជាយ៉ាងណានោះ គឺថាកម្រិតប្រជាប្រិយភាពបានធ្លាក់ចុះចូលបំពង់លូរតែម្តង... និយាយរួមវាជាមហន្តរាយសុទ្ធសាធ ដូច្នេះបើសិនជាអាច ខ្ញុំគ្រាន់តែមានបំណងចង់ធ្វើការបន់ស្រន់សម្រាប់លោក អាណុល ចំពោះកម្រិតប្រជាប្រិយភាពទាំងនោះ»។

ការអធិប្បាយនេះប្រហែលជាត្រូវបានធ្វើឡើងក្នុងគោលបំណងជារឿងកំប្លែងមួយតែប៉ុណ្ណោះ ប៉ុន្តែលោក អាណុល បានឆ្លើយតបទៅវិញភ្លាមៗតាមរយៈគណនីបណ្តាញសង្គម Twitter ដោយហៅលោកប្រធានាធិបតីអាមេរិកផ្ទាល់ចំៗថា «អេ! ដូណាល់... ខ្ញុំមានគំនិតល្អមួយគឺថាហេតុអ្វីក៏យើងមិនផ្លាស់ប្តូរការងារគ្នាវិញទៅ? ដោយអ្នកមកកាន់ការនៅផ្នែកកម្មវិធីទូរទស្សន៍ ព្រោះថាអ្នកមានជំនាញខ្លាំងណាស់ខាងរឿងការទាក់ទាញកម្រិតប្រជាប្រិយភាព ចំណែកខ្ញុំ... ខ្ញុំទៅបំពេញការងាររបស់អ្នកវិញ ដើម្បីអាចធ្វើឲ្យប្រជាពលរដ្ឋអាមេរិកទាំងអស់គ្នាអាចសម្រាន្តលង់លក់បានដោយស្ងប់សុខជាសាថ្មីម្តងទៀត»។

គួរបញ្ជាក់ថាលោក ដូណាល់ ត្រាំ បានចាកចេញពីកម្មវិធី «The Celebrity Apprentice» កាលពីឆ្នាំ២០១៥ នៅពេលដែលលោកងាកមកធ្វើការឃោសនារកសំឡេងឆ្នោត ដើម្បីប្រកួតប្រជែងយកតំណែងជាប្រធានាធិបតីអាមេរិក៕

Fresh News

វិលមុខ! ប្រធានាធិបតីអាមេរិកលោក ដូណាល់ ត្រាំ ផ្ទុះសង្គ្រាមសម្តីជាមួយតារាហូលីវូដដ៏ល្បីគឺលោក អាណុល!

អារ៉ាប់រួម៖ បទបញ្ជារបស់ត្រាំ ហាមប្រជាជនមកពីប្រទេស ៧ មិនប្រឆាំងម៉ូស្លីមទេ

ស្របពេលប្រទេសជាច្រើនតវ៉ាប្រឆាំងបទបញ្ជាលោក ដូណាល់ ត្រាំ រដ្ឋាភិបាលអារ៉ាប់រួមគាំទ្របទបញ្ជាដែលហាមប្រជាជនមកពីប្រទេសម៉ូស្លីម ៧ចូលដីអាមេរិកនេះ។ ប្រទេសនេះថា វាជាចំណាត់ការផ្ទៃក្នុងនិងសម្រេចដោយសិទ្ធិអធិបតេយ្យផ្ទាល់ខ្លួនដើម្បីការពារប្រយោជន៍អាមេរិក ហើយវាមិនប្រឆាំងសាសនាណាមួយឡើយ។

រដ្ឋមន្ត្រីការបរទេសអារ៉ាប់រួមលោក Sheikh Abdullah bin Zayed បានបញ្ជាក់ប្រាប់អ្នកសារព័ត៌មានថា បទបញ្ជាហាមប្រជាជនមកពីប្រទេសម៉ូស្លីម ៧ របស់ប្រធានាធិបតីអាមេរិក ដូណាល់ ត្រាំ មិនមានអ្វីខុសឆ្គងឡើយ ហើយវាជារឿងផ្ទៃក្នុងរបស់អាមេរិកសុទ្ធសាធ។

យោងតាមទីភ្នាក់ងារព័ត៌មាន Reuters ក្នុងសន្និសីទសារព័ត៌មានជាមួយសមភាគីរុស្ស៊ី លោក Sergei Lavrov នារាជធានី Abu Dhabi រដ្ឋមន្ត្រីការបរទេសអារ៉ាប់រួម Sheikh Abdullah bin Zayed ប្រកាសថា ការសម្រេចរបស់លោក ដូណាល់ ត្រាំ ជាសិទ្ធិអធិបតេយ្យរបស់អាមេរិក ហើយវាមិនប៉ះពាល់ឬមានគោលដៅប្រឆាំងសាសនាណាមួយឡើយ។

លោក Sheikh Abdullah បានបញ្ជាក់ដូច្នេះ៖ «អាមេរិកបានសម្រេចិត្តធ្វើបែបនេះស្ថិតក្រោមអធិបតេយ្យរបស់ខ្លួន។ វាមានការប៉ុនប៉ងចោទប្រកាន់ថា បទបញ្ជារបស់លោក ត្រាំ មានចរិតលក្ខណៈប្រឆាំងសាសនាមួយជាក់លាក់។ ប៉ុន្តែគ្រប់យ៉ាងបង្ហាញឲ្យឃើញច្បាស់ថា ការចោទប្រកាន់នេះមិនត្រឹមត្រូវឡើយ។ វាមិនមែនមានគោលដៅប្រឆាំងសាសនាណាមួយនោះឡើយ»។

សូមរម្លឹកបន្តិចដែរ កាលពីថ្ងៃសុក្រសប្តាហ៍មុន លោក ដូណាល់ ត្រាំ បានសម្រេចដាក់បទបញ្ជាមួយហាមឃាត់ប្រជាជនមកពីប្រទេសម៉ូស្លីម ៧ចូលទឹកដីអាមេរិកក្រោមហេតុផលការពារសន្តិសុខ។ ប៉ុន្តែការដាក់បទបញ្ជានេះបានធ្វើឲ្យមានការខឹងសម្បារខ្លាំង និងមានប្រតិកម្មតបពីសំណាក់ក្រុមសកម្មជនសិទ្ធិមនុស្ស, ប្រទេសសម្ព័ន្ធមិត្តអាមេរិក និងអង្គការអន្តរជាតិផ្សេងទៀតដែរ។ គេជឿជាក់ថា ការសម្រេចនេះមានគោលដៅប្រឆាំងអ្នកកាន់សាសនាឥស្លាម។

ក្រៅពីគាំទ្របទបញ្ជាប្រតិបត្តិរបស់ ដូណាល់ ត្រាំ ប្រមុខការទូតរដ្ឋអារ៉ាប់រូបនេះ បានប្រកាសស្វាគមន៍គំនិតបង្កើតតំបន់សុវត្ថិភាពនៅក្នុងទឹកដីស៊ីរី ដើម្បីអនុញ្ញាតឲ្យ ជនភៀសខ្លួនជ្រកកោននោះ។ អារ៉ាប់រួមគាំទ្រ ក្នុងករណីដែលវាជាតំបន់ដែលបង្កើតឡើងជាលក្ខណៈបណ្តោះអាសន្ននិងបម្រើប្រយោជន៍មនុស្សធម៌ហើយស្ថិតក្រោមការគ្រប់គ្រងរបស់សហគមន៍ អន្តរជាតិ។

ក្រុង Abu Dhabi ក៏ត្រៀមចាំស្តាប់មើលការបញ្ជាក់បន្ថែមពីក្រុងវ៉ាស៊ីនតោនសិនពាក់ព័ន្ធផែនការបង្កើតតំបន់សុវត្ថិភាពនេះ ព្រោះខ្លួនក៏មិនទាន់យល់ច្បាស់ពីគម្រោងនេះដែរ៕

ថ្មីៗ
អត្ថបទ : ថ្មីៗ

អារ៉ាប់រួម៖ បទបញ្ជារបស់ត្រាំ ហាមប្រជាជនមកពីប្រទេស ៧ មិនប្រឆាំងម៉ូស្លីមទេ

ជប៉ុន៖ អ្នករៀបចំអូឡាំពិកឆ្នាំ២០២០ ស្នើប្រជាជនបរិច្ចាគទូរសព្ទចាស់ៗដើម្បីយកធ្វើមេដាយ

អ្នករៀបចំព្រឹត្តិការណ៍អូឡាំពិកឆ្នាំ២០២០ និងបារ៉ាឡាំពិកឆ្នាំ២០២០ ដែលមានទីក្រុងតូក្យូធ្វើជាម្ចាស់ផ្ទះ បានស្នើឲ្យប្រជាជនរស់នៅជប៉ុនទាំងអស់បរិច្ចាគទូរសព្ទដែលលែងប្រើប្រាស់ ដើម្បីកែច្នៃជាមេដាយសម្រាប់អត្តពលិកចូលរួមព្រឹត្តិការណ៍ដ៍ធំទាំងពីរនេះ។ គោលដៅនៃការអំពាវនាវនេះ សំដៅជួយការពារបរិស្ថាន ស្របពេលដែលវត្ថុធាតុដើមសម្រាប់ធ្វើជាមេដាយក៏មិនសូវមានដូចមុនដែរ។

គណៈកម្មាធិការរៀបចំកីឡាអូឡាពិកឆ្នាំ២០២០ នៅថ្ងៃទី១ ខែកុម្ភៈ បានប្រកាសថា ខ្លួនសហការជាមួយក្រុមហ៊ុនទូរគមនគមន៍ NTT Docomo និងទីភ្នាក់ងារអនាម័យបរិស្ថានជប៉ុន ដើម្បីធ្វើយុទ្ធនាការប្រមូលទូរសព្ទចាស់ៗ ចាប់ពីខែមេសា។ គណៈកម្មាធិការនេះរំពឹងអាចប្រមូលលោហៈចំនួន៨តោនពីទូរសព្ទចាស់ៗ ដើម្បីចម្រាញ់ធ្វើមេដាយចំនួន៥ពាន់ សម្រាប់ត្រៀមកីឡាអូឡាំពិកឆ្នាំ២០២០ និងកីឡាប៉ារ៉ាឡាំពិកឆ្នាំ២០២០ ដូចគ្នា។

បើតាមសារព័ត៌មាន The Japan Times ប្រអប់បរិច្ចាគ នឹងត្រូវពង្រាយនៅតាមហាងច្រើនជាង២៤០០ របស់ក្រុមហ៊ុន NTT Docomo និងនៅតាមការិយាល័យសាធារណជាច្រើនកន្លែងទៀត។ គណៈកម្មាធិការរៀបចំអូឡាំពិក សង្ឃឹមថា ពួកគេអាចប្រមូលទូរសព្ទជាច្រើនលានគ្រឿង ដើម្បីទទួលបានសារធាតុលោហៈ៨តោន មុននឹងចម្រាញ់មកត្រឹម២តោន ក្នុងការផលិតមេដាយសម្រាប់អត្តពលិកទទួលជ័យជម្នះ។ យុទ្ធនាការនេះ នឹងត្រូវបញ្ចប់ពេលគណៈកម្មាធិការទទួលបានលោហៈ៨តោន។

នៅព្រឹត្តិការណ៍អូឡាំពិកលើកមុនៗ មេដាយសម្រាប់បំពាក់ឲ្យកីឡាករ ត្រូវបានផលិតចេញពីរបស់កែច្នៃដែរ។ ប៉ុន្តែសម្រាប់ព្រឹត្តិការអូឡាពិកក្រុងតូក្យូ គឺជាលើកទីមួយ ដែលមេដាយទាំងអស់ត្រូវបានផលិតចេញពីសម្ភារអេឡិចត្រូនិច។ អ្នករៀបចំព្រឹត្តិការណ៍នេះ បញ្ជាក់ថា មេដាយមាសទាំងអស់ នឹងត្រូវផលិតចេញពីសម្ភារកែច្នៃ១០០ភាគរយតែម្ដង។

ម្ចាស់មេដាយមាសអូឡាំពិកវិញ្ញាកាយវប្បកម្មបីជំនាន់ Kohei Uchimura បាននិយាយថា មេដាយកីឡាអូឡាពិកឆ្នាំ២០២០ និងកីឡាប៉ារ៉ាឡាំពិកឆ្នាំ២០២០ នឹងត្រូវផលិតចេញពីចិត្តរបស់ប្រជាជន ក្នុងការចៀសវាងផលិតកាកសំណល់។ លោកគិតថា សកម្មភាពនេះ ជាសារដ៏សំខាន់សម្រាប់មនុស្សជំនាន់ក្រោយ។

ទន្ទឹមគ្នានេះ អត្តពលិកអាមេរិក Ashton Eaton ដែលជាម្ចាស់មេដាយមាសពីរជំនាន់លើវិញ្ញាសា Decathlon ក៏បានបង្ហាញការយល់ស្របក្នុងការទាញយកវត្ថុកែច្នៃធ្វើជាមេដាយសម្រាប់កីឡាករជ័យលាភីដែរ។ លោកនិយាយថា៖ មេដាយដែលពាក់នៅលើក តែងតែមានអត្ថន័យខ្ពង់ខ្ពស់។ នៅពេលដែលអត្តពលិកណាមួយម្នាក់ឈ្នះមេដាយនៅតូក្យូ វាមិនមែនត្រឹមតែជាមេដាយមាស ប្រាក់ ឬសំរិទ្ធឡើយ តែជាមេដាយតំណាងជាតិទាំងមូល»៕

ថ្មីៗ
អត្ថបទ : តន ចាន់រិទ្ធារ៉ា

ជប៉ុន៖ អ្នករៀបចំអូឡាំពិកឆ្នាំ២០២០ ស្នើប្រជាជនបរិច្ចាគទូរសព្ទចាស់ៗដើម្បីយកធ្វើមេដាយ

ណាតូស្ទាក់ស្ទើរទទួល អ៊ុយក្រែន ព្រោះខ្លាចមានការប្រឈមមុខគ្នាជាមួយរុស្ស៊ី

រដ្ឋាភិបាលអ៊ុយក្រែនត្រៀមរៀបចំប្រជាមតិដើម្បីកំណត់សមាជិកភាពរបស់អ៊ុយក្រែននៅក្នុងបក្សសម្ព័ន្ធយោធាណាតូ។ ប្រធានាធិបតីអ៊ុយក្រែន Petro Poroshenko ប្រាប់អ្នកសារព័ត៌មានដើមសប្តាហ៍កន្លងទៅថា ប្រជាជនអ៊ុយក្រែន ៥៤ភាគរយគាំទ្រឲ្យអ៊ុយក្រែនចូលរួមជាមួយណាតូ ដែលវាកើនឡើងពីជាង៤០ភាគរយក្នុងរយៈពេល ៤ឆ្នាំចុងក្រោយនេះ។ ប៉ុន្តែគេដឹងច្បាស់ថា ការទទួលយកអ៊ុយក្រែនជាបញ្ហាធំរបស់ ណាតូ បង្កឲ្យបញ្ហាកាន់តែធំជាពិសេសការប្រឈមមុខគ្នារវាងក្រុមនេះជាមួយមហាអំណាចរុស្ស៊ីផ្ទាល់។ ដើម្បីបញ្ចៀសការប្រឈមមុខជាមួយរុស្ស៊ី ណាតូ ក៏សុខចិត្តឈប់ជជែកជាមួយអ៊ុយក្រែនពីគម្រោងដំឡើងប្រព័ន្ធការពារមីស៊ីលនៅអ៊ុយក្រែនដែរ។

សូមស្តាប់ការបកស្រាយរបស់លោក សៅ ផលនិស្ស័យ៖

ការបង្កើតទំនាក់ទំនងស្អិតល្មួតជាមួយលោកខាងលិចនិងឈានទៅក្លាយសមាជិកសហភាពអឺរ៉ុបជាអ្វីដែលអ៊ុយក្រែនចង់បានបំផុតចាប់ពីរបបដឹកនាំស្និទ្ធរុស្ស៊ីរបស់លោក Viktor Yanokvych ត្រូវបានគេគាស់រម្លើងចោលឆ្នាំ ២០១៤។ ប៉ុន្តែផ្លូវដើរកាន់តែរលាក់ ហើយក្តីស្រមៃរបស់អ៊ុយក្រែនឃ្លាតកាន់តែឆ្ងាយបន្តិចម្តងៗ។ ឃ្លាតឆ្ងាយនេះមាន័យថា ការឆ្ពោះទៅរួមរស់ជាមួយសហភាពអឺរ៉ុបនោះទំនងជាមិនអាចទៅរួចឡើយ។

ថ្វីបើការក្លាយជាសមាជិកសហភាពអឺរ៉ុបមិនអាចក្លាយជាការពិតក្តី រដ្ឋាភិបាលលោក Petro Poroshenko ជឿជាក់ថា អ៊ុយក្រែននៅតែអាចជ្រកក្រោមឆ័ត្រសន្តិសុខរបស់បក្សណាតូនិងគេចពីឥទ្ធិពលរុស្ស៊ីបាន។ ការក្រសោបយកទឹកដី Crimea ពីអ៊ុយក្រែនដើមឆ្នាំ ២០១៤ ជំរុញឲ្យអ៊ុយក្រែនងាកកាន់តែជ្រៅទៅរកជំនួយពីអឺរ៉ុបនិងអាមេរិក និងមានជម្លោះប្រដាប់អាវុធផង។ ហើយបញ្ហាជម្លោះនេះក៏បានបង្កឲ្យមានការប្រឈមមុខដាក់គ្នាជាបន្តបន្ទាប់ដែរដោយសារការកសាងកម្លាំងទ័ពរៀងៗខ្លួននៅតាមព្រំដែនរុស្ស៊ីនិងប្រទេសអឺរ៉ុបខាងកើត។

១.អ៊ុយក្រែនត្រៀមធ្វើប្រជាមតិថាគួរចូលបក្សសម្ព័ន្ធយោធាណាតូឬអត់

ប្រធានាធិបតីអ៊ុយក្រែន Petro Poroshenko បានប្រាប់អ្នកសារព័ត៌មាននៅថ្ងៃព្រហស្បតិ៍ទី ២មករានេះថា លោកនឹងបញ្ជាឲ្យគេរៀបចំប្រជាមតិដើម្បីស្ទង់មើល យោបល់ប្រជាជនអ៊ុយក្រែនថាគួរឲ្យអ៊ុយក្រែនចូលជាសមាជិកអង្គការបក្សសម្ព័ន្ធយោធាណាតូឬក៏អត់។ រយៈពេលប៉ុន្មានឆ្នាំចុងក្រោយនេះ ចរន្តនៃការគាំទ្រអ៊ុយក្រែនជាសមាជិកបក្សសម្ព័ន្ធយោធានេះកើនឡើងគួរឲ្យកត់សម្គាល់ ហើយប្រជាជនអ៊ុយក្រែនជឿជាក់ថា វាជាវិធានការតែមួយគត់ដែលអាចទប់ទល់ឥទ្ធិពលរុស្ស៊ីបាន។

យោងតាមទីភ្នាក់ងារព័ត៌មាន Reuters ប្រធានាធិបតីអ៊ុយក្រែនរូបនេះពន្យល់ថា៖« កាលពី ៤ឆ្នាំមុន ប្រជាជនអ៊ុយក្រែនត្រឹម ១៦ភាគរយប៉ុណ្ណោះ ដែលគាំទ្រអ៊ុយក្រែនឲ្យចូលរួមជាមួយណាតូ។តែឥឡូវនេះប្រជាជន ៥៤ភាគរយឯណោះដែលចង់ឲ្យអ៊ុយក្រែនក្លាយជាសមាជិកអង្គការនេះ។ ខ្ញុំនឹងរៀបចំប្រជាមតិមួយពាក់ព័ន្ធសមាជិកភាពអ៊ុយក្រែននេះ តាមការចង់បានរបស់ប្រជាជនខ្ញុំ»។

បើសិនជាមានប្រជាមតិមែន សំណួរមួយទៀតនឹងលេចឡើង ដែលវាទាក់ទង លទ្ធភាពនៃការឈានទៅចូលរួមជាសមាជិកអង្គការនេះ។ វាច្បាស់ណាស់ថា អ៊ុយក្រែនចង់ចូលរួមជាមួយណាតូ ប៉ុន្តែណាតូវិញមិនដឹងជាត្រៀមខ្លួនរួចរាល់ដើម្បីទទួលអ៊ុយក្រែនឬអត់ឡើយ។ ម្យ៉ាងនីតិវិធីដែលអ៊ុយក្រែនត្រូវបំពេញដើម្បីក្លាយជាសមាជិកពេញសិទ្ធិរបស់ណាតូ ក៏ស្មុគស្មាញដូចគ្នា។

ប្រធានាធិបតីដែលឡើងកាន់តំណែងក្រោយវិបត្តិអ៊ុយក្រែនផ្ទុះឡើងនេះហ៊ានសន្យាថា ដើម្បីក្លាយជាសមាជិកណាតូ ទោះផ្លូវរលាក់និងវែងឆ្ងាយយ៉ាងណាក៏ដោយ ក៏លោកមិនបោះបង់ដែរ។ «បើសិនជាប្រជាជនអ៊ុយក្រែនបោះឆ្នោតគាំទ្រ ខ្ញុំនឹងបំពេញការងារតាមអ្វីដែលខ្ញុំអាចធ្វើបានដើម្បីឲ្យអ៊ុយក្រែនក្លាយជាសមាជិកណាតូ» ។ នេះជាការបញ្ជាក់របស់លោក Poroshenko។

២.ការទទួលយកអ៊ុយក្រែនមិនមែនជាជម្រើសណាតូ នៅពេលនេះ

តាមពិតទៅ ណាតូ និងអ៊ុយក្រែនមានទំនាក់ទំនងជិតស្និទ្ធគ្នាតាំងពីដើមឆ្នាំ ១៩៩០ ក្រោយសហភាពសូវៀតរលំរលាយទៅ។ ទំនាក់ទំនងស្និទ្ធស្នាលនេះជំរុញឲ្យអ៊ុយក្រែនក្លាយជាដៃគូដ៏សំខាន់មួយរបស់បក្សសម្ព័ន្ធយោធានេះរហូតមក ខណៈដែលអ៊ុយក្រែនអាចរក្សាចំណងមិត្តភាពជាមួយរុស្ស៊ីបានល្អដែរ។ ប៉ុន្តែការរត់តម្រង់ទៅរកសហភាពអឺរ៉ុប បានបង្ខំឲ្យរុស្ស៊ីលូកដៃជ្រៅ និងបង្កជាជម្លោះអ៊ុយក្រែនរហូតមកដល់បច្ចុប្បន្ន។

ដូច្នេះក្នុងករណីដែលអ៊ុយក្រែន រត់ទៅចូលរួមជាមួយណាតូ រឹតតែធ្វើឲ្យរុស្ស៊ីនៅមិនសុខ ដេកមិនលក់បក់មិនល្ហើយថែមទៀត ហើយរុស្ស៊ីនឹងប្រតិកម្មបែបណានោះរឹតតែស្រពេចស្រពិលទៀត។

សម្រាប់រុស្ស៊ី វាជាគ្រោះថ្នាក់ធំសម្រាប់សន្តិសុខរបស់ខ្លួនផង និងវាប៉ះពាល់ដល់ការកសាងអនុត្តរភាពមហាអំណាចមួយនេះនៅអឺរ៉ុបខាងកើតផង។ ចង់មិនចង់ៗរុស្ស៊ីត្រូវប្រឹងបង្អាក់ដំណើរការនេះ ដោយប្រើធម៌ក្តៅផង និងត្រជាក់ផង។ ការបន្តគាំទ្រជម្លោះភាគខាងកើត ជាមធ្យោបាយមួយដែលរារាំងការជជែករឿងសមាជិកភាពអ៊ុយក្រែនជាមួយណាតូ ហើយការប្រើប្រាស់អំណាចយោធាដើម្បីកំញើញរដ្ឋអឺរ៉ុបជាយុទ្ធសាស្ត្រមួយដើម្បីពញ្ញាក់ក្រុមសមាជិកណាតូថា រុស្ស៊ីនឹងតបត បើហ៊ានយកអ៊ុយក្រែនមែន។

សមាជិកណាតូស្ទាក់ស្ទើរខ្លាំងរយៈពេលប៉ុន្មានឆ្នាំចុងក្រោយ ហើយក៏កាន់តែស្ទាក់ស្ទើរថែមទៀតនៅពេលដែល ដូណាល់ ត្រាំ ជាប់ឆ្នោតជាប្រធានធិបតីអាមេរិក។ នេះក៏ព្រោះថា អាមេរិកមិនមាននិន្នាការប្រឈមមុខជាមួយរុស្ស៊ីឡើយ ហើយរដ្ឋបាលអាមេរិកថ្មីក៏ចង់ស្តារទំនាក់ទំនងជាមួយរុស្ស៊ីឡើងវិញដូចគ្នា។

ចង់មិនចង់ណាតូ ត្រូវដើរដោយប្រុងប្រយ័ត្ន មិនឲ្យប៉ះពាល់ខ្លាំងដល់រុស្ស៊ីឡើយ និងដើម្បីទប់ស្កាត់ការធ្លាក់ចុះកាន់តែខ្លាំងនៃទំនាក់ទំនងទ្វេភាគីរវាងណាតូ និងរុស្ស៊ីតែម្តង។

៣.ណាតូ បញ្ឈប់ការជជែកពិភាក្សារឿងដាក់ខែលការពារមីស៊ីលនៅអ៊ុយក្រែន

កុំថាឡើយដល់ទទួលយកអ៊ុយក្រែន បច្ចុប្បន្ននេះណាតូ មិនទាំងហ៊ានជជែករឿងដំឡើងខែលមីស៊ីលនៅអ៊ុយក្រែនផង។ ដើម្បីការពារការធ្លាក់ចុះនៃទំនាក់ទំនងនិងមានការប្រឈមមុខគ្នារវាងណាតូ និងរុស្ស៊ី បក្សសម្ព័ន្ធយោធានេះបានសម្រេចបញ្ចប់ការជជែកពិភាក្សាគ្នាលើការពង្រាយប្រព័ន្ធការពារមីស៊ីលទៅកាន់ប្រទេសអ៊ុយក្រែន។

សារព័ត៌មាន Wall Street Journal បានស្រង់សម្តីអ្នកការទូតជាច្រើន ដែលបានបង្ហើបថា ការសុខចិត្តបញ្ឈប់ការចរចានេះដោយសារការពង្រាយខែលការពារមីស៊ីលនេះវាជាជំហានមួយដ៏គ្រោះថ្នាក់។ ប៉ុន្តែគេបញ្ជាក់ថា វាជាការផ្អាកបណ្តោះអាសន្នសិនប៉ុណ្ណោះមិនមែនការបិទផ្លូវសម្រាប់ការចរចាទៅមុខទៀតឡើយ។

វាជាឥរិយាបទមួយរបស់ណាតូ ក្នុងការបន្ធូរបន្ថយភាពតានតឹងរវាងភាគីទាំងពីរ និងបញ្ចៀសការប៉ះទង្គិចគ្នាផង។ ប៉ុន្តែណាតូនៅតែប្តេជ្ញាជួយដោះស្រាយបញ្ហាអ៊ុយក្រែននិងធ្វើយ៉ាងណាជំរុញឲ្យរុស្ស៊ីអនុវត្តកិច្ចព្រមព្រៀងសន្តិភាពក្រុង Minsk ឲ្យបានពេញលេញនិងត្រឹមត្រូវ។

ទំនាក់ទំនងនិងកិច្ចសហប្រតិបត្តិការរវាងណាតូ និងរុស្ស៊ីត្រូវបានព្យួរនៅឆ្នាំ ២០១៤នៅពេលដែលលោកខាងលិចនាំគ្នាចោទរុស្ស៊ីថា បានព្យាយាមលូកដៃនិងនៅពីក្រោយជម្លោះអ៊ុយក្រែន។ ណាតូក៏មិនទទួលស្គាល់ការក្រសោបយកទឹកដី Crimea របស់អ៊ុយក្រែននិងការបោះឆ្នោតទទួលយកទឹកដីនេះជាផ្នែកមួយរបស់រុស្ស៊ីដូចគ្នា៕

ថ្មីៗ
អត្ថបទ : សៅ ផលនិស្ស័យ

ណាតូស្ទាក់ស្ទើរទទួល អ៊ុយក្រែន ព្រោះខ្លាចមានការប្រឈមមុខគ្នាជាមួយរុស្ស៊ី

រដ្ឋបាលត្រាំ គំរាមចាត់វិធានការប្រឆាំងអ៊ីរ៉ង់រឿងបាញ់សាកល្បងមីស៊ីល

ទីប្រឹក្សាសន្តិសុខអាមេរិករបស់រដ្ឋបាលលោក ដូណាល់ ត្រាំ បញ្ជាក់ថា ខ្លួនសម្រេចដាក់អ៊ីរ៉ង់ស្ថិតក្រោមការត្រួតពិនិត្យក្រោយប្រទេសឥស្លាមមួយនេះសម្រេចបាញ់សាកល្បងមីស៊ីលបាលីស្ទិកជាថ្មី។ ស្ថាប័ននេះក៏ចោទប្រកាន់ថា អ៊ីរ៉ង់បានបន្តបង្កអស្ថិរភាពនៅក្នុងតំបន់មជ្ឈិមបូព៌ាមកដល់បច្ចុប្បន្ន ។ គេរំពឹងថា រដ្ឋបាលអាមេរិកថ្មីនឹងមានវិធានការរឹងត្អឹងដាក់សម្ពាធលើអ៊ីរ៉ង់ផងដែរ។

ទីប្រឹក្សាសន្តិសុខជាតិអាមេរិកបានចេញសេចក្តីថ្លែងការណ៍មួយថ្កោលទោស និងប្រកាសថា ខ្លួនដាក់អ៊ីរ៉ង់ស្ថិតក្រោមការត្រួតពិនិត្យក្រោយអ៊ីរ៉ង់បាញ់សាកល្បងមីស៊ីល។ ហើយរដ្ឋបាលលោក ដូណាល់ ត្រាំ នេះហាក់បង្ហាញចេតនាឆ្លើយតបសកម្មភាពបង្កបញ្ហារបស់អ៊ីរ៉ង់ ដោយអាចមានការដាក់ទណ្ឌកម្មនៅពេលខាងមុខផង។

សេចក្តីថ្លែងការណ៍ដែលត្រូវបានបង្ហោះតាមគណនីហ្វេសប៊ុកផ្លូវការរបស់លោក ដូណាល់ ត្រាំ បានចោទប្រកាន់ថា អ៊ីរ៉ង់បានបាញ់មីស៊ីល, វាយប្រហារលើនាវាអារ៉ាប៊ីសាអូឌីតក៏ដូចជាគាំទ្រក្រុម Houthi នៅយេម៉ែន ហើយទីប្រឹក្សានេះក៏ចាត់ទុកថា អ៊ីរ៉ង់កំពុងបំពានច្បាប់អន្តរជាតិ និងព្យាយាមបង្កើតអស្ថិរភាពនៅក្នុងតំបន់ថែមដែលប៉ះពាល់ប្រយោជន៍អាមេរិកនិងសម្ព័ន្ធមិត្តក្នុងតំបន់ទៀតផង។

សេចក្តីថ្លែងការណ៍នោះបានបញ្ជាក់ដូច្នេះ« ការបាញ់សាកល្បងមីស៊ីលរបស់អ៊ីរ៉ង់ ប្រឆាំងដំណោះស្រាយលេខ ២២៣១ របស់ក្រុមប្រឹក្សាសន្តិសុខអង្គការសហប្រជាតិ ដែលដំណោះស្រាយនេះទាមទារឲ្យអ៊ីរ៉ង់បញ្ឈប់រាល់សកម្មភាពទាំងឡាយណាដែលពាក់ព័ន្ធការបង្កើតកាំជ្រួចមីស៊ីលដែលអាចមានសមត្ថភាពបំពាក់ក្បាលគ្រាប់នុយក្លេអ៊ែរបាន រួមទាំងការបាញ់កាំជ្រួចមីស៊ីឆ្លងទ្វីបដែរ»។

ជារឿយៗ លោក ដូណាល់ ត្រាំ បន្តរិះគន់កិច្ចព្រមព្រៀងនុយក្លែរអ៊ីរ៉ង់ដែលបង្កើតឡើងរវាងអ៊ីរ៉ង់និងមហាអំណាចប្រាំ បួកមួយ ក្នុងជំនាន់រដ្ឋបាលលោក បារ៉ាក់ អូបាម៉ា កន្លងមកនិងគំរាមចរចាលើកិច្ចព្រមព្រៀងនេះឡើងវិញថែមទៀតផង។

ត្រឡប់មកវិញ សេចក្តីថ្លែងការណ៍ទីប្រឹក្សាសន្តិសុខអាមេរិកដដែលក៏បន្ទោសរដ្ឋបាលលោក បារ៉ាក់ អូបាម៉ា ដែលមានជំហរទន់ខ្សោយក្នុងការឆ្លើយតបសកម្មភាពរបស់អ៊ីរ៉ង់ ជាពិសេសការផ្ទេរអាវុធ, គាំទ្រក្រុមភេរវជននិងបំពានច្បាប់អន្តរជាតិជាដើមនោះ។ យ៉ាងណាមិញ សេចក្តីថ្លែងការណ៍នេះមិនបានបញ្ជាក់ឲ្យបានច្បាស់ទេថា រដ្ឋបាល ត្រាំ នឹងឆ្លើយតបបែបម៉េចចំពោះសកម្មភាពរបស់អ៊ីរ៉ង់នេះ៕

ថ្មីៗ
អត្ថបទ : ថ្មីៗ

រដ្ឋបាលត្រាំ គំរាមចាត់វិធានការប្រឆាំងអ៊ីរ៉ង់រឿងបាញ់សាកល្បងមីស៊ីល

ប្រធានាធិបតីហ្វីលីពីនអះអាងថា នឹងព្រលែងឱ្យយោធាចូលរួម នៅក្នុងសង្រ្គាមប្រយុទ្ធប្រឆាំងគ្រឿងញៀន!

(ម៉ានីល)៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតើតេ នៅថ្ងៃព្រហស្បតិ៍នេះបាននិយាយថា លោកមានបំណងចេញបទបញ្ជាថ្មីមួយសំដៅអនុញ្ញាត ឱ្យយោធាហ្វីលីពីនអាចចូលរួមនៅក្នុងសង្រ្គាមប្រយុទ្ធប្រឆាំងគ្រឿងញៀន ដែលលោកចាត់ទុកថា ជាការគំរាមកំហែងដ៏ធំដល់សន្តិសុខជាតិ ហើយទន្ទឹមគ្នានោះដែរ លោក ឌូតើតេ បានបញ្ជាក់ឡើងវិញថាលោកមិនចាំបាច់ត្រូវដាក់ចេញនូវច្បាប់អាជ្ញាសឹកនោះទេ បើទោះជាលោកធ្លាប់បានបង្ហាញពីចេតនាប្រកាសឱ្យប្រើច្បាប់នេះជាច្រើងដងក៏ដោយ។ នេះបើតាមការចេញផ្សាយដោយសារព័ត៌មាន Channel News Asia នៅល្ងាចថ្ងៃព្រហស្បតិ៍ ទី០២ ខែកុម្ភៈ ឆ្នាំ២០១៧។

ការថ្លែងបែបនេះរបស់លោក ឌូតើតេ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកបានបញ្ជាឲ្យស្ថាប័នប៉ូលិសទាំងអស់បញ្ឈប់សង្គ្រាមប្រឆាំងគ្រឿងញៀន ជាបណ្តោះអាសន្នដោយសារតែមានការចោទប្រកាន់ពីអំពើពុករលួយផ្ទៃក្នុងនៃស្ថាប័ននេះ ដែលបាននិងកំពុងរីករាលដាកាន់តែខ្លាំង។ តែទោះបីជាការ ប្រកាសផ្អាកជាបណ្តោះអាសន្នត្រូវបានធ្វើឡើងក៏ពិតមែន ក៏ក្រុមអ្នកឃ្លាំមើលបានអះអាងថា មនុស្សយ៉ាងហោចណាស់ជាង ៦,០០០នាក់ ត្រូវបានសម្លាប់នៅក្នុងរយៈពេល០៧ខែ នៃការឡើងកាន់អំណាចរបស់លោក ឌូតើតេ។

គួរបញ្ជាក់ថា បទបញ្ជារបស់លោក ឌូតើតេ ខាងលើនេះបានកើតឡើង បន្ទាប់ពីមានការចោទប្រកាន់ថា មន្ត្រីប៉ូលិសមួយចំនួនបានឆ្លៀតឱកាសពីសង្គ្រាម ប្រឆាំងគ្រឿងញៀនដ៏ក្តៅគគុក ដើម្បីប្រើប្រាស់គ្រឿងញៀនដោយខ្លួនឯង រួចឈានទៅដល់ការប្រព្រឹត្តអំពើ សម្លាប់រង្គាល ចាប់ជម្រិត ឆក់ប្លន់និងជម្រិត យកប្រាក់ជាដើម៕

Fresh News

ប្រធានាធិបតីហ្វីលីពីនអះអាងថា នឹងព្រលែងឱ្យយោធាចូលរួម នៅក្នុងសង្រ្គាមប្រយុទ្ធប្រឆាំងគ្រឿងញៀន!

Menu