ទេសចរធម្មជាតិ: sport

កងពលលេខ៣បំបាក់កងអង្គរក្ស៣សិតទល់សូន្យ មុនវិសាខាយកឈ្នះកំពង់ចាម៣សិត១

ក្រុមបាល់ទះកងពលធំអន្តរាគមន៍លេខ៣ បានបំបាក់ក្រុមបាល់ទះបញ្ជាការដ្ឋានអង្គរក្សក្នុងលទ្ធផល៣សិតទល់នឹងសូន្យ រីឯក្រុមបាល់ទះវិសាខាបានយកឈ្នះក្រុមសាលាខេត្តកំពង់ចាមក្នុងលទ្ធផល៣សិតទល់នឹង១ នាការប្រកួតបាល់ទះដណ្តើមពានរង្វាន់ក្របខ័ណ្ឌលីកកំពូលកម្ពុជាប្រចាំឆ្នាំ២០១៧ កាលពីថ្ងៃ សៅរិ៍។

នាការប្រកួតបាល់ទះវគ្គជម្រុះពានរង្វាន់លីកកំពូលកម្ពុជាឆ្នាំ២០១៧(Volleyball Cambodian League 2017) នៅវិមានពហុកីឡដ្ឋានជាតិកាលពីថ្ងៃទី៤ ខែកុម្ភៈ ក្រុមកងពលធំអន្តរាគមន៍លេខ៣ បានយកឈ្នះក្រុមបញ្ជាការដ្ឋានអង្គរក្ស៣សិតទល់នឹងសូន្យ។ ក្នុងនោះសិតទី១កងពលធំអន្តរាគន៍លេខ៣បានយកឈ្នះក្នុងលទ្ធផល ២៥-១៨, សិតទី២(២៥-១៦) និងសិតទី៣(២៥-២១)។

ចំណែកក្រុមបាល់ទះវិសាខាបានយកឈ្នះក្រុមសាលាខេត្តកំពង់ចាម៣សិតទល់នឹង១ ដោយសិតទីក្រុមវិសាខាបានយកឈ្នះក្នុងលទ្ធផល ២៥-២៣ រីឯសិតទី២ក្រុមសាលាខេត្តកំពង់ចាមបានយកឈ្នះវិសាខា ២៥-២១ ខណៈសិតទី៣វិសាខាបានយកឈ្នះវិញក្នុងលទ្ធផល ២៥-១៤ និងបន្តឈ្នះ ២៧-២៥ ក្នុងសិតទី៤ជាសិតជ័យជម្នះ៕

ថ្មីៗ
អត្ថបទ : សឿន វណ្ណឌេត

កងពលលេខ៣បំបាក់កងអង្គរក្ស៣សិតទល់សូន្យ មុនវិសាខាយកឈ្នះកំពង់ចាម៣សិត១

កីឡាប្រដាល់គុនខ្មែរ និងប្រដាល់សកលលែង ជ្រកក្រោមដំបូលសហព័ន្ធតែមួយ

ដើម្បីឆ្លើយតបទៅនឹងគោលការណ៍កំណែទម្រង់ស៊ីជម្រៅរបស់គណៈកម្មាធិការជាតិអូឡាំពិកកម្ពុជា(NOCC) និងក្រសួងអប់រំ យុវជន និងកីឡាក្នុងការត្រៀមស៊ីហ្គេមឆ្នាំ២០២៣ សហព័ន្ធកីឡាប្រដាល់កម្ពុជាបានប្រកាសបែងចែកសហព័ន្ធជាពីរដាច់ពីគ្នា គឺសហហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់សកលកម្ពុជា។ ថ្នាក់ដឹកនាំកីឡាប្រដាល់លើកឡើងថា បើពុំមានការបែងចែកទេនោះ សហព័ន្ធនឹងមិនមានកីឡាករដែលប្រកបដោយគុណភាពនោះឡើយ។

សហព័ន្ធកីឡាប្រដាល់កម្ពុជាកាលពីថ្ងៃទី១ ខែកុម្ភៈ បានរៀបចំហាសន្និបាតបូកសរុបការងារ និងដាក់ទិសដៅកំណែទម្រង់ឆ្ពោះទៅកាន់ស៊ីហ្គេមឆ្នាំ ២០២៣ នៅទីស្នាក់ការគណៈកម្មាធិការជាតិអូឡាំពិកម្ពុជា(NOCC)។ ក្នុងមហាសន្និបាតនោះ ថ្នាក់ដឹកនាំសហព័ន្ធ និងសមាជិកប្រតិបត្តិបានឯកភាពគ្នាបង្កើតសហព័ន្ធពីរដាច់ពីគ្នា គឺសហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់សកល។

ថ្នាក់ដឹកនាំសហព័ន្ធកីឡាប្រដាល់កម្ពុជាបានបញ្ជាក់ថា ការបែងចែកជាពីររវាងកីឡាប្រដាល់គុនខ្មែរ និងប្រដាល់សកលនេះ ដោយមានការឯកភាពផ្ទៃក្នុងពីសមាជិកសមាជិកាប្រតិបត្តិរបស់សហព័ន្ធ គឺពុំមានការល្អក់កករនឹងគ្នានោះឡើយ។ ម្យ៉ាងវិញទៀត ការបែងចែកសហព័ន្ធជាពីរនេះ ក៏ដើម្បីឆ្លើយតបទៅនឹងផែនការកំណែទម្រង់ស៊ីជម្រៅរបស់គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ដែលបានកណត់យកឆ្នាំនេះជាឆ្នាំកែទម្រង់សហព័ន្ធនីមួយៗ។

ការបែងចែកនេះធ្វើឡើងក្នុងគោលបំណង ដើម្បីបង្កភាពងាយស្រួលដល់ការគ្រប់គ្រង និងរៀបចំផែនការយុទ្ធសាស្ត្រក្នុងការអភិវឌ្ឍន៍វិស័យកីឡានេះឲ្យកាន់ល្អប្រសើរ។ លើសពីនេះ ដើម្បីជួយពង្រឹងបច្ចេកទេស និងសមត្ថភាពធនធានថ្នាលសម្រាប់ត្រៀមប្រកួតកីឡាស៊ីហ្គេមឆ្នាំ២០២៣។ ប៉ុន្តែបើពុំមានការកំណែទម្រង់បែបនេះ លោក តែម ម៉ឺន អតីតប្រធានសហព័ន្ធកីឡាប្រដាល់កម្ពុជា យល់ថា កម្ពុជានឹងពុំមានកីឡាករដែលមានសមត្ថភាពដើម្បីត្រៀមប្រកួតស៊ីហ្គេមគ្រប់គ្រាន់នោះឡើយ។

ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា នៅតែទទូចឲ្យបណ្តាសហព័ន្ធកីឡាជាតិទាំងអស់ ត្រូវធ្វើការកែទម្រង់ឲ្យស៊ីជម្រៅដើម្បីលុបបំបាត់វិវាទផ្ទៃក្នុង និងបង្កើនការឯកភាពគ្នាក្នុងការដឹកនាំ ដើម្បីជួយអភិវឌ្ឍន៍វិស័យកីឡាកម្ពុជាឲ្យកាន់តែរីកចម្រើន សម្រាប់ត្រៀមស៊ីហ្គេមឆ្នាំ២០២៣។

លោកបានបញ្ជក់ថា ៖«ដើម្បីឲ្យវិស័យកីឡារីកចម្រើន យើងត្រូវសហការរវាងក្រសួងអប់រំ យុវជន និងកីឡា NOCC និងសហព័ន្ធកីឡាជាតិ ព្រោះធាតុទាំងបីនេះ មិនអាចខ្វះគ្នាបានឡើយ។ ទន្ទឹមនឹងនេះ សហព័ន្ធកីឡាជាតិទាំងអស់ត្រូវរៀបចំផែនការ និងគោលដៅឲ្យច្បាស់លាស់ក្នុងការអភិវឌ្ឍ ដើម្បីត្រៀមប្រជែងដណ្តើមមេដាយក្នុងស៊ីហ្គេម»។

ទោះបីសហព័ន្ធត្រូវបានបែងចែកជាពីរក៏ដោយ ប៉ុន្តែថ្នាក់ដឹកនាំសហព័ន្ធថ្មី គឺជាមន្ត្រីមកពីសហព័ន្ធកីឡាប្រដាល់ចាស់ដដែល ពោលគឺគ្រាន់តែបន្ថែមតួនាទីប៉ុណ្ណោះ។ ក្នុងនោះលោក តែម ម៉ឺន ជាប្រធានសហព័ន្ធកីឡាប្រដាល់គុនខ្មែរ, លោក វ៉ា ស៊ិន ភិរម្យ អនុប្រធានទី១, លោកបណ្ឌិត ឆឹង យ៉ៅយ៉េន ជាអនុប្រធាន, លោក ម៉ិល កាដូ អគ្គលេខាធិការ និងអ្នកស្រី ប៉ឹង សំអាង ជាអគ្គហេរញ្ញិក។

ចំណែក សហព័ន្ធកីឡាប្រដាល់សកល គឺលោកបណ្ឌិត ឆឹង យ៉ៅយ៉េន ជាប្រធាន, លោក ស៊ិន ភិរម្យ, លោក ម៉ិល កាដូ និងលោក មាស វុទ្ធី ជាអនុប្រធាន, លោក ប៊ួយ សោភ័ណ្ឌ ជាអគ្គលេខាធិការ និងលោក និន វ៉ាន់ដា ជាអគ្គហេរញ្ញិក ព្រមទាំងសមាជិកប្រតិបត្តិចំនួន៩រូបផ្សេងទៀង។

យ៉ាងណាមិញ លោក វ៉ាត់ ចំរើន បានបញ្ជាក់ផងដែរថា ទោះបីសមាសភាពដែលដឹកនាំសហព័ន្ធទាំងពីរមកពីសហព័ន្ធចាស់តែមួយក៏ដោយ ប៉ុន្តែសហព័ន្ធកីឡាប្រដាល់គុនខ្មែរ និងសហព័ន្ធកីឡាប្រដាល់សកលជាសហព័ន្ធដាច់ដោយឡែកពីគ្នា ពោលគឺមិនអាចនៅជាមួយគ្នានោះឡើយ។ សហព័ន្ធនីមួយៗត្រូវស្វែងរកដៃគូសហការ និងអភិវឌ្ឍន៍រៀងៗខ្លួន៕

ថ្មិៗ
អត្ថបទ : សឿន វណ្ណឌេត

កីឡាប្រដាល់គុនខ្មែរ និងប្រដាល់សកលលែង ជ្រកក្រោមដំបូលសហព័ន្ធតែមួយ

លោក អេ ភូថង៖ ការធ្វើជាគ្រូបង្វឹកជម្រើសជាតិជាបំណងប្រាថ្នារបស់ខ្ញុំ

រូបភាពពីហ្វេសប៊ុកលោក អេ ភូថង

ក្រោយប្រកាសបែងចែកសហព័ន្ធជាពីរផ្សេងគ្នាកាលពីថ្ងៃទី១ ខែកុម្ភៈ សហព័ន្ធកីឡាប្រដាល់គុនខ្មែរបានបោះឆ្នោតជ្រើសតាំងលោក អេ ភូថង និងលោក ឈិត សារឹម ជាគ្រូបង្វឹកជម្រើសជាតិ ដើម្បីបង្វឹកកីឡាករត្រៀមស៊ីហ្គេមឆ្នាំ២០១៧នៅម៉ាឡេស៊ី។ តួនាទីជាគ្រូបង្វឹកជម្រើសជាតិនេះ លោក អេ ភូថង បញ្ជាក់ថា ជាបំណងប្រាថ្នារបស់លោកជាយូរមកហើយ។

កាលពីថ្ងៃទី៣ ខែកុម្ភៈ លោក អេ ភូថង និងលោក ឈិត សារឹម ត្រូវបានបោះឆ្នោតជ្រើសតាំងជាគ្រូបង្វឹកកីឡាគុនខ្មែរជម្រើសជាតិប្រចាំសហព័ន្ធកីឡាប្រដាល់គុនខ្មែរ។ ការបោះឆ្នោតជ្រើសតាំងនេះក្នុងគោលបំណងដើម្បីបង្វឹកកីឡាករជម្រើសជាតិកម្ពុជាត្រៀមចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ី នាថ្ងៃទី១៩ ខែសីហា ឆ្នាំ២០១៧ ខាងមុខនេះ។

ទោះបីបច្ចុប្បន្ន លោក អេ ភូថង ជាគ្រូបង្វឹកកីឡាប្រដាល់នៅក្លិប អេ ភូថង កីឡាក៏ដោយ ប៉ុន្តែសម្រាប់តួនាទីជាគ្រូបង្វឹកជម្រើសជាតិនេះ ជាក្តីស្រមៃដែលលោកបានប៉ងទុកជាយូរមកហើយ។ កីឡាករដែលចូលប្រឡូកក្នុងវិស័យកីឡាប្រដាល់តាំងពីក្មេងរូបនេះបានប្តេជ្ញាថា លោកនឹងខិតខំប្រឹងប្រែងឲ្យអស់ពីសមត្ថភាពតាមរយៈការយកបទពិសោធន៍ល្អៗ មកចែករំលែកក៏ដូចជាបង្វឹកដល់ក្មេងជំនាន់ក្រោយឲ្យរីកចម្រើនល្បីរន្ទឺលើកឆាកអន្តរជាតិ។

ថ្លែងប្រាប់សារព័ត៌មានថ្មីៗអតីតកីឡាករជើងខ្លាំងដើមកំណើតនៅខេត្តកោះកុងរូបនេះបានបញ្ជាក់យ៉ាងដូច្នេះថា៖«គោលបំណងរបស់ខ្ញុំគឺចង់ជួយជាតិ ពេលនេះគោលបំណងរខ្ញុំបានសម្រេចដូចក្តីស្រមៃហើយ។ ខ្ញុំមិននឹកស្មានថា ខ្លួនឯងបានក្លាយជាគ្រូបង្វឹកជម្រើសជាតិនោះទេ។ ខ្ញុំនឹងយកបទពិសោធន៍ដែលខ្ញុំមានមកបង្វឹកដល់ក្មេងៗជំនាន់ក្រោយឲ្យអស់ពីសមត្ថភាព។ ហើយខ្ញុំប្តេជ្ញា នឹងដឹកនាំកីឡាប្រដាល់សេរីឲ្យល្បីរន្ទឺលើឆាកអន្តរជាតិ»។

គួរបញ្ជាក់ថា ការបោះឆ្នោតជ្រើសតាំងគ្រូបង្វឹកជម្រើសជាតិមានបេក្ខភាពឈរឈ្មោះចំនួន៤៥នាក់ មកក្លិបដែលជាសមាជិករបស់សហព័ន្ធចំនួន៤៥។ ការបោះឆ្នោតដំណាក់កាលទី១ ក្នុងចំណោមបេក្ខជនទាំង៤៥នាក់ គឺជ្រើសរើសយកចំនួន៥នាក់។ បន្ទាប់មកបេក្ខជនទាំង៥នាក់ត្រូវឈរឈ្មោះឲ្យមន្ត្រីសហព័ន្ធបោះឆ្នោតបន្ត ដើម្បីជ្រើសរើសយកពីរនាក់មកធ្វើជាគ្រូបង្វឹកជម្រើសជាតិប្រចាំសហព័ន្ធ។

ការតែងតាំងគ្រូបង្វឹកជម្រើសជាតិប្រដាលគុនខ្មែរនេះ ធ្វើឡើងក្រោយសហព័ន្ធកីឡាប្រដាល់កម្ពុជាប្រកាសបែងចែកសហព័ន្ធជាពីរដាច់ពីគ្នានៅទីស្នាក់ការ NOCC កាលពីថ្ងៃទី១ ខែកុម្ភៈ នៅក្នុងមហាសន្និបាតបូកសរុបការងារប្រចាំឆ្នាំ និងដាក់ផែនការឆ្នាំ២០២៣។

ទន្ទឹមនឹងនេះ សហព័ន្ធកីឡាប្រដាល់សកលក៏បានបោះឆ្នោតជ្រើសតាំងគ្រូបង្វឹកជម្រើសជាតិរបស់ខ្លួនផងដែរក្នុងនោះលោក វ៉ែន សុផល និងលោក ហ៊ិន សៃហេង ជាគ្រូជម្រើសជាតិឈុតធំ និងលោក អាត់ សំរិទិ្ធ ព្រមទាំងលោក ឡុង ស៊ីលីន ជាគ្រូបង្វឹកយុវជនថ្នាល។

ក្រៅពីបោះឆ្នោតជ្រើសតាំងគ្រូជម្រើសជាតិប្រចាំសហព័ន្ធក៏មានការបោះឆ្នោតជ្រើសរើសកីឡាករជម្រើសជាតិចំនួន៦នាក់ ដើម្បីហ្វឹកហាត់ត្រៀមប្រកួតកីឡាស៊ីហ្គេមលើកទី២៩នៅម៉ាឡេស៊ីផងដែរ។ កីឡាករទាំងនោះរួមមាន កីឡាករ ឡៅ ចន្ទ្រា , ឡៅ ចិន្ត្រា, ម៉ន សាម៉េត, ឡុង សំណាង, ហ៊ឹម សេរី និងកីឡាករ ម៉ឺន សុភា៕

ថ្មីៗ
អត្ថបទ : សឿន វណ្ណឌេត

លោក អេ ភូថង៖ ការធ្វើជាគ្រូបង្វឹកជម្រើសជាតិជាបំណងប្រាថ្នារបស់ខ្ញុំ

Asia Club Pre-Season៖ ព្រះខ័នរាជស្វាយរៀង និងការពារជាតិប៉ះគ្នាបង្គ្រប់កិច្ច មុនជួបគ្នានៅវគ្គផ្តាច់ព្រ័ត្រ

ក្រុមក្របខ័ណ្ឌលីកកំពូលកម្ពុជាព្រះខ័នរាជស្វាយរៀង និងក្រសួងការពារជាតិ(ទ័ព)សុទ្ធតែដណ្តើមបានកៅអីក្នុងវគ្គផ្តាច់ព្រ័ត្រនៃពានរង្វាន់ Asia Club Pre-Season Championship 2017 ដូចគ្នា បន្ទាប់ពីក្រុមទាំងពីរបានយកឈ្នះក្រុមរបស់ម៉ាឡេស៊ី និងសិង្ហបុរីក្នុងវគ្គសន្សំពិន្ទុពីរប្រកួតជាប់គ្នារៀងៗខ្លួន។ ប៉ុន្តែក្រុមទាំងពីរត្រូវប្រជែងគ្នានៅថ្ងៃនេះ ដើម្បីដណ្តើមយកលេខ១ក្នុងវគ្គសន្សំពិន្ទុ ខណៈក្រុមរបស់ម៉ាឡេស៊ីជួបក្រុមសិង្ហបុរី។

ក្រុមព្រះខ័នរាជស្វាយរៀងក្រោយបំបាក់ក្រុមមកពីលីកកំពូលរបស់សិង្ហបុរី Warriors FC ៤-១ កាលពីម្សិលមិញ និងយកឈ្នះក្រុមមកពីលីកកំពូលម៉ាឡេស៊ី Petaling Jaya Rangers FC ៣-១ កាលពីថ្ងៃទី១ ខែកុម្ភៈ ក្នុងវគ្គវគ្គសន្សំពិន្ទុរួចមក។ ធ្វើឲ្យក្រុមនេះទទួលបានសិទ្ធឡើងទៅកាន់វគ្គផ្តាច់ព្រ័ត្រនៃពានរង្វាន់ Asia Club Pre-Season Championship 2017 ទោះបីនៅសល់មួយប្រកួតទៀតក៏ដោយ។

ជាមួយគ្នានេះ ក្រុមក្រសួងការពារជាតិ ក្រោយយកឈ្នះក្រុមមកពីសិង្ហបុរី ២-១ ក្នុងថ្ងៃទី១ និងយកឈ្នះក្រុមមកពីម៉ាឡេស៊ី ២-១ ក្នុងថ្ងៃទី២ នៃវគ្គសន្សំពិន្ទុកាលពីថ្ងៃទី២ ខែកុម្ភៈ ម្សិលមិញ។ ក្រុមនេះក៏ទទួលសិទ្ធឡើងទៅកាន់វគ្គផ្តាច់ព្រ័ត្រនៃពានរង្វាន់នេះផងដែរ។

អាស្រ័យហេតុនេះ ក្រុមព្រះខ័នរាជស្វាយរៀងត្រូវជួបប្រកួតជាមួយក្រុមក្រសួងការពារជាតិក្នុងវគ្គផ្តាច់ព្រ័ត្រដើម្បីដណ្តើមជើងឯកពានរង្វាន់មិត្តភាពបាល់ទាត់អាស៊ីឆ្នាំ២០១៧ នាថ្ងៃទី៥ ខែកុម្ភៈ ខាងមុននេះ។ ចំណែកក្រុមមកពីលីកកំពូលរបស់សិង្ហបុរី Warriors FC និងក្រុមមកពីលីកកំពូលរបស់ម៉ាឡេស៊ី Petaling Jaya Rangers FC ក្រោយចាញ់ទាំងពីរប្រកួតត្រូវប្រជែងគ្នាដណ្តើមយកចំណាត់ថ្នាក់៣ក្នុងថ្ងៃនោះផងដែរ។

ទោះបីជាយ៉ាងនេះក្តី នារសៀសថ្ងៃទី៣ ខែកុម្ភៈ នៅពហុកីឡដ្ឋានជាតិក្រុម Petaling Jaya Rangers FC របស់ម៉ាឡេស៊ី ត្រូវជួបប្រកួតបង្គ្រប់កិច្ច និងដណ្តើមយកចំណាត់ថ្នាក់លេខ៣ក្នុងវគ្គសន្សំជាមួយក្រុម Warriors FC នាវេលាម៉ោង៤រសៀល។ ចំណែក ព្រះខ័នរាជស្វាយរៀងត្រូវតទល់ជាមួយក្រសួងការពារជាតិ ដើម្បីដណ្តើមយកចំណាត់ថ្នាក់លេខ១ក្នុងវគ្គសន្សំពិន្ទុនាវេលាម៉ោង៧យប់៕

ថ្មីៗ
អត្ថបទ : សឿន វណ្ណឌេត

Asia Club Pre-Season៖ ព្រះខ័នរាជស្វាយរៀង និងការពារជាតិប៉ះគ្នាបង្គ្រប់កិច្ច មុនជួបគ្នានៅវគ្គផ្តាច់ព្រ័ត្រ

ខេត្តសៀមរាបមានក្លឹបបាញ់ធ្នូបុរាណសម្រាប់បម្រើសេវាកម្មភ្ញៀវទេសចរ

សៀមរាប៖ ក្នុងបំណងរួមចំណែកលើកកម្ពស់វិស័យកីឡាបាញ់ធ្នូខ្មែរឡើងវិញ ក្លឹបកីឡាបាញ់ធ្នូភូមិន្ទកម្ពុជា (Royal Archery Club Cambodia) ត្រូវបានបង្កើតឡើង។ នេះជាសេវាកម្មទេសចរណ៍ថ្មីទៀត សម្រាប់បម្រើដល់ភ្ញៀវទេសចរដែលមកកម្សាន្តក្នុងខេត្តសៀមរាប ដែលក្រៅពីទស្សនាប្រាង្គប្រាសាទ ពួកគេក៏អាចមានឳកាសរៀនបាញ់ធ្នូបុរាណ និងសម័យ នៅក្លឹបបាញ់ធ្នូភូមិន្ទកម្ពុជាដែរ។

ក្លឹបកីឡាបាញ់ធ្នូភូមិន្ទកម្ពុជា ត្រូវបានបង្កើតឡើងដោយយុវជនមួយក្រុម ដែលស្រឡាញ់ និងចូលចិត្តកីឡាបាញ់ធ្នូ។ ដោយការស្រឡាញ់ យុវជនទាំងនោះក៏មានបំណងលើកកម្ពស់វិស័យកីឡាធ្នូខ្មែរ ដែលកំពុងចាប់ផ្តើមងើបឡើងវិញ ក៏ដូចជាបង្ហាញដល់សាធារណជនឲ្យស្គាល់ពីកីឡាដ៏អស្ចារ្យរបស់ខ្មែរមួយនេះ។

លោក សា ឌីណា អគ្គនាយកនៃក្លឹបបាញ់ធ្នូភូមិន្ទកម្ពុជា បានប្រាប់សារព័ត័មានថ្មីៗថា៖« តាមពិតវាកើតឡើងដោយសារការស្រឡាញ់។ ខ្ញុំនិងមិត្តឯទៀត សុទ្ធតែចូលចិត្ត និងធ្លាប់ចូលរួមបាញ់ធ្នូកាលពីនៅក្មេង ហើយការបង្កើតនេះស្របពេលដែលសហព័ន្ធកីឡាបាញ់ធ្នូ ចាប់ផ្តើមមានសកម្មភាពឡើងវិញ»។ លោក ឌីណា បន្ថែមថា ក្លឹបបាញ់ធ្នូរបស់លោក ក៏នឹងត្រៀមខ្លួនដើម្បីប្រកួតប្រជែងនៅថ្នាក់ជាតិ ជាពិសេសសម្រាប់ចូលរួមប្រកួតស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

ក្លឹបកីឡាបាញ់ធ្នូភូមិន្ទកម្ពុជាសហការនិងអ្នកជំនាញលើវិស័យបាញ់ធ្នូ ក៏ដូចជាមានគ្រូបង្គោលដើម្បីបណ្តុះបណ្តាលជំនាញមួយនេះ។ អ្នកដែលអាចចូលបាញ់ធ្នូបាន គឺមិនគិតពីអាយុក្មេងចាស់នោះទេ សំខាន់ឲ្យតែពួកគេមានចំណាប់អារម្មណ៍ ស្រឡាញ់ ចូលចិត្ត ពិសេសមានកាយសម្បទារឹងមាំ។
តាមការបញ្ជាក់របស់លោក ឌីណា ក្លឹបរបស់លោកមានបង្ហាត់បាញ់ធ្នូបុរាណ និងសម័យ ទៅតាមចំណូលចិត្តរបស់ភ្ញៀវ។ លោក ឌីណា បន្ថែមថា៖« យើងមានដាក់សត្វសិប្បនិម្មិត គឺដូចសត្វព្រៃមែនទែនអ៊ីចឹង សម្រាប់ឲ្យភ្ញៀវបាញ់។ គោលបំណងរបស់យើង គឺចង់ផ្តាស់ប្តូរការគិតរបស់មនុស្សពីការបាញ់សត្តដែលវមានជីវិត មកបាញ់សត្វសិប្បនិម្មិត ព្រោះអាចបាញ់បានដូចគ្នា ហើយវាបានផ្តល់ជាការកម្សាន្តបានដូចគ្នា»។

ក្លឹបកីឡាបាញ់ធ្នូភូមិន្ទកម្ពុជា មានទីតាំងនៅបណ្តោយផ្លូវកូម៉ៃ ឫស្ថិតនៅខាងក្រោយសង្វៀនប្រដាល់ ស៊ីធីអិន ក្បែរសណ្ឋាគារ ស៊ូហ្វីតែល ភូគីត្រាអង្គរ។ តម្លៃសម្រាប់ភ្ញៀវទេសចរជាតិ ក្នុងម្នាក់ថ្លៃ ៧ដុល្លារ និងបរទេសថ្លៃ ១២ដុល្លារ ក្នុងរយៈពេល១ម៉ោងនិង៣០នាទី។ អំឡុងពេលនេះ លោកអ្នកនឹងទទួលបានការបញ្ចុះតម្លៃរហូតដល់ទៅ២៥%។ ក្លឹបកីឡាបាញ់ធ្នូភូមិន្ទកម្ពុជា ក៏មានដាក់លក់ទាំងធ្នូបុរាណ និងសម័យដ៏សម្បូរបែបផងដែរ។

សម្រាប់ភ្ញៀវទេសចរដែលចាប់អារម្មណ៍នឹងកីឡាបាញ់ធ្នូ លោកអ្នកអាចទាក់ទងមកកាន់ក្លឹបបាញ់ធ្នូភូមិន្ទកម្ពុជា តាមរយៈអាស័យដ្ឋានតាមហ្វេសប៊ុកផេកRoyal Archery Club - Cambodia គេហទំព័រ royalarcheryclub.com ឫតាមរយៈលេខទូរសព្ទ ០៧៧ ៩៩៦ ១៧២, ០៩៦ ៥៣៣ ៣៣៣ ៨, ០៨៨ ៥៣៣ ៣៣៣ ៨៕

ថ្មីៗ
អត្ថបទ : ទេព ម៉ាន់នី

ខេត្តសៀមរាបមានក្លឹបបាញ់ធ្នូបុរាណសម្រាប់បម្រើសេវាកម្មភ្ញៀវទេសចរ

ព្រះខ័នរាជស្វាយរៀងស្វាគមន៍ក្រុមមកពីសិង្ហបុរីមុនទ័ពតទល់ជាមួយក្រុមមកពីម៉ាឡេស៊ី

ការប្រកួតបាល់ទាត់ដណ្តើមពានរង្វាន់មិត្តភាពបាល់ទាត់អាស៊ី២០១៧(Asian Club Pre-Season Championship 2017)នៅពហុកីឡដ្ឋានជាតិនារសៀលថ្ងៃទី២ ខែកុម្ភៈ នេះ មានការប្រកួតចំនួនគូ ក្នុងនោះព្រះខ័នរាជស្វាយរៀង ជួបជាមួយក្រុម Warriors របស់សិង្ហបុរី។ ចំណែកក្រសួងការពារជាតិតទល់ជាមួយក្រុម Petaling Jaya Rangers របស់ម៉ាឡេស៊ីនា។

ក្រោយបំបាក់ក្រុមមកពីលីកកំពូលរបស់ម៉ាឡេស៊ី Petaling Jaya Rangers ៣-១ ក្នុងថ្ងៃបើកឆាកកាលពីម្សិលមិញ ព្រះខ័នរាជស្វាយរៀងត្រូវទទួលស្វាគមន៍ក្រុម Warriors របស់សិង្ហបុរីក្នុងទី២នៃវគ្គសន្សំពិន្ទុពានរង្វាន់មិត្តភាពបាល់ទាត់អាស៊ី២០១៧ នាវេលាម៉ោង៤រសៀលថ្ងៃទី២ ខែកុម្ភៈ នៅពហុកីឡដ្ឋានជាតិ។ ចំណែកក្រសួងការពារជាតិត្រូវតទល់ជាមួយក្រុមមកពីម៉ាឡេស៊ី Petaling Jaya Rangers នាវេលាម៉ោង៧យប់។

គួរបញ្ជាក់ថា សម្រាប់ការប្រកួតបើកឆាកនៅថ្ងៃទី១ ខែកុម្ភៈ ក្រុមព្រះខ័នរាជស្វាយរៀងបានលត់ក្រុម Petaling Jaya Rangers មកពីម៉ាឡេស៊ី ៣-១ រីឯក្រសួងការពារជាតិយកឈ្នះក្រុម Warriors មកពីសិង្ហបុរី ២-១។ តើសម្រាប់ការប្រកួតលើកទី២នៅថ្ងៃនេះក្រុមកម្ពុជាទាំងពីរអាចរក្សាជ័យជម្នះបានឬយ៉ាងណា?

កម្មវិធីប្រកួតពានរង្វាន់ ACC នៅពហុកីឡដ្ឋានជាតិថ្ងៃទី២ ខែកុម្ភៈ
- ម៉ោង៤:០០នាទី៖ ព្រះខ័នរាជស្វាយរៀង ជួប ក្រុម Warriors របស់សិង្ហបុរី
- ម៉ោង៧:០០នាទី៖ ក្រសួងការពារជាតិ ជួប ក្រុម Petaling Jaya Rangers របស់ម៉ាឡេស៊ី

ថ្មីៗ
អត្ថបទ : សឿន វណ្ណឌេត

ព្រះខ័នរាជស្វាយរៀងស្វាគមន៍ក្រុមមកពីសិង្ហបុរីមុនទ័ពតទល់ជាមួយក្រុមមកពីម៉ាឡេស៊ី

បឹងកេតអង្គរប្រើសមាជិកតែ៩អ្នកអាចទប់ស្មើ ១-១ ជាមួយ Lao Toyota

ឃួន ឡាបូរ៉ាវី បានស៊ុតបាល់បញ្ចូលទីបើកឆាកឲ្យបឹងកេត មុនពេលក្រុមបាត់សមាជិកពីរនាក់។ រូបថត MYTV

ទោះបីបាត់បង់សមាជិក២រូបក្នុងតង់ទី១ក៏ដោយ ប៉ុនែ្តក្រុមបឹងកេតអង្គរនៅតែអាចរក្សាលទ្ធផលស្មើ ១-១ ជាមួយក្រុម Lao Toyota នាការប្រកួតវគ្គជម្រុះជើងទី១ពានរង្វាន់ AFC Cup 2017 ដែលធ្វើឡើងនៅពហុកីឡដ្ឋានជាតិកាលពីយប់ថ្ងៃទី៣១ ខែមករា។ ក្រុមទាំងពីរនឹងជួបប្រកួតគ្នាម្តងទៀតនាថ្ងៃទី៧ ខែកុម្ភៈ នៅលើទឹកដីឡាវ។

ខ្សែប្រយុទ្ធ ឃួន ឡាបូរ៉ាវី បានរកគ្រាប់បាល់នាំមុខ ១-០ លើក្រុម Lao Toyota ជូនក្រុមបឹងកេតអង្គរនៅនាទី១៧ ប៉ុន្តែកីឡាករ Sayoulasouk Vongdalasane បានរកគ្រាប់តាមស្មើ ១-១ ជូនក្រុម Lao Toyota នៅនាទី២៣។ កីឡាករ ខៀវ វិបុល ត្រូវបានប្តូរចេញភ្លាមៗជំនួសដោយអ្នកចាំទី គឹម មករា ក្រោយអ្នកចាំទីដៃទី១របស់បឹងកេតអង្គរ ស៊ូ យ៉ាទី ត្រូវបានអាជ្ញាកណ្តាលពិន័យកាតក្រហមក្រោយធ្វើឲ្យកីឡាករ Kazuo Homma ដួលនៅនាទី២៩។

បន្ទាប់មកបឹងកេតអង្គរបានបាត់បង់សមាជិកជាលើកទី២នៅនាទី៤២ ក្រោយខ្សែការពារ ស៊ុន សុវណ្ណរិទ្ធី ទទួលបានកាតលឿងពីរដងបន្ទាប់ពីធ្វើឲ្យ Kazuo Homma ដួលពីរដងនៅនាទី៣៥ និង៤២។ ក្នុងន័យនេះមានន័យថា កីឡាករ Kazuo Homma រូបនេះបានធ្វើឲ្យអាជ្ញាកណ្តាលចាយកាតក្រហមអស់ពីរលើកីឡាករបឹងកេត។

ចូលដល់វគ្គទី២ក្រុម Lao Toyota ដែលមានសមាជិករហូតដល់១១នាក់បានបង្កើនការវាយសម្រុកយ៉ាងខ្លាំងមកលើក្រុមបឹងកេតអង្គរដែលមានសមាជិកតែ៩នាក់។ ហើយក្រុមនេះបានបង្កើតឱកាសយ៉ាងច្រើនក្នុងតំបន់គ្រោះថ្នាក់របស់បឹងកេតអង្គរ តែត្រូវបានជួយសង្គ្រោះដោយខ្សែការពារ និងអ្នកចាំទីរបស់បឹងកេត។

កីឡាករ ចាន់ វឌ្ឍនាកា ត្រូវបានដូរចូលជំនួសកីឡាករ Maycon Silva នៅនាទី៦៥។ ប៉ុន្តែសម្រាប់ការបង្ហាញខ្លួនជាលើកចុងក្រោយក្នុងក្រុមបឹងកេតអង្គរ វឌ្ឍនាកា ហាក់ដូចជាគ្មានឱកាសក្នុងការទម្លុះសំណាញ់ទីក្រុម Lao Toyota នោះឡើយ។ ខ្សែប្រយុទ្ធដ៏ឆ្នើមរបស់បឹងកេតអង្គររូបនេះ នឹងចូលរួមជាមួយក្លិប Fujieda MYFC នៃក្របខណ្ឌ J3 League ជប៉ុន ក្រោមលក្ខខណ្ឌខ្ចីជើង១រដូវកាល។

ទោះបីបឹងកេតអង្គរបានបាត់បង់សមាជិកពីរនាក់តាំងពីវគ្គទី១ក៏ដោយ ប៉ុន្តែក្រុមនេះបានបង្ហាញទម្រង់លេងយ៉ាងល្អជាមួយសមាជិក៩នាក់ក្នុងការទប់ស្មើ ១-១ ជាមួយក្រុម Lao Toyota រហូតចប់វគ្គទី២។ ការប្រកួតវគ្គជម្រុះជុំទី១នៃពានរង្វាន់ AFC Cup 2017 ធ្វើឡើងកាលពីថ្ងៃទី៣១ ខែមករា នៅពហុកីឡដ្ឋានជាតិ ហើយក្រុមទាំងពីរនឹងជួបគ្នាម្តងទៀតនាថ្ងៃទី៧ ខែកុម្ភៈ នៅទឹកដីក្រុម Lao Toyota នាប្រទេសឡាវ៕

ថ្មីៗ
អត្ថបទ : សឿន វណ្ណឌេត

បឹងកេតអង្គរប្រើសមាជិកតែ៩អ្នកអាចទប់ស្មើ ១-១ ជាមួយ Lao Toyota

“អ៊ុំ ថារ័ត្ន” កីឡាការិនីល្បុកតោ ពោរពេញដោយសមត្ថភាពខ្ពស់

ខ្សែភាពយន្តលំដាប់ហូលីវូដមួយ មានចំណងជើងថា “Jail Break” នឹងចាប់ផ្ដើមចាក់បញ្ចាំងនៅតាមរោងភាពយន្តនានា ក្នុងព្រះរាជាណាចក្រកម្ពុជានៅថ្ងៃទី៣១ ខែមករា ឆ្នាំ២០១៧នេះហើយ។ អ្វីដែលគួរឲ្យកត់សម្គាល់បំផុតនោះ គឺមានការចូលរួមបង្ហាញវត្តមានដោយ កញ្ញា អ៊ុំ ថារ័ត្ន កីឡាការិនីក្បាច់គុណល្បុក្កតោ ប្រកបដោយទេពកោសល្យម្នាក់របស់កម្ពុជាយើង។

ចង់ដឹងថា តើក្នុងដំណើរជីវិតសង្ខេបរបស់ កីឡាការិនីក្បាច់គុណល្បុក្កតោយើង បានជួបបទពិសោធន៍យ៉ាងណាខ្លះ! ខាងក្រោមនេះជាបទសម្ភាសន៍ ជុំវិញព័ត៌មានមួយចំនួន ទាក់ទងទៅនឹងការសម្ដែង ក៏ដូចជាការបង្ហាញ នូវបទពិសោធន៍ខ្លះក្នុងអាជីពការងាររបស់កញ្ញា ដែលមានអត្ថន័យនឹងខ្លឹមសារដូចខាងក្រោម៖

អ៊ុំ ថារ័ត្ន បានរំលឹកប្រាប់ថា នាងមានស្រុកកំណើតនៅជុំរុំសាយធូ ប៉ុន្តែក្រោយមកនាង និងគ្រួសារបានផ្លាស់ទីលំនៅ មករស់នៅទីក្រុងភ្នំពេញ តាំងពីនាងនៅជាកុមារភាពម្ល៉េះ។ ដោយមានលោកឪពុកជាអ្នកនិពន្ធបទចម្រៀង និងជាអ្នកតន្ត្រីវីយូឡុង ក្នុងកំឡុងទ.សទី៦០ គឺលោក អ៊ុំ តារា ដែលរូបគាត់ហាក់ផ្ទុយស្រឡះពី ថារ័ត្ន ដែលជាកីឡាការិនីល្បុកត្តោទៅវិញ។

“រំលឹកពីដើមចមដែលខ្ញុំ(ថារ័ត្ន) បានចូលហាត់ក្បាច់គុណល្បុក្កតោនេះ គឺតាំងពីអាយុ១៧ឆ្នាំ ពោលគឺដោយសារតែមើលឃើញ មិត្តភក្តិប្រកួតក្បាច់គុណល្បុក្កតោ ក៏បានបង្កើតចិត្តខ្ញុំឲ្យចាប់អារម្មណ៍លើកីឡាមួយនេះ ព្រមជាមួយនឹងការយល់ដឹងពីអត្ថប្រយោជន៍ នៃក្បាច់គុណមួយនេះ បានជំរុញឲ្យខ្ញុំមានចិត្តស្រលាញ់ នឹងបានទៅសុំលោកគ្រូ សាវ គឹមសៀ ដើម្បីធ្វើការហ្វឹកហាត់ពីជំនាញមួយនេះ។

កាលនោះប៉ាម៉ាក់មិនបានគាំទ្រ ឲ្យខ្ញុំរៀនវិជ្ជាមួយនេះទេ ថែមទាំងប្រឆាំងដាច់ខាតថែមទៀត។ ខ្ញុំទៅរៀនជាមួយលោកគ្រូ គាត់មិនបានយកកម្រៃអ្វីពីខ្ញុំទេ ព្រោះគាត់មើលឃើញនូវការតាំងចិត្ត នឹងសេចក្តីស្រលាញ់របស់ខ្ញុំ ដែលមានទៅលើកីឡាមួយនេះ អ្វីដែលសំខាន់ជាងនេះគឺ ខ្ញុំអាចចូលរួមថែរក្សាមរតកវប្បធម៌បុរាណមួយនេះ ហើយគាប់ជួនខ្ញុំជាមនុស្សស្រីថែមទៀត” នេះជាសម្តីរបស់កញ្ញា អ៊ុំ ថារ័ត្ន អ្នកប្រដាល់ក្បាច់គុណល្បុក្កតោស្រី ដែលនៅពេលនេះមានវ័យ ២៦ឆ្នាំហើយ។

ថារ័ត្ន បានចាប់ផ្តើមហាត់រៀនកីឡាមួយនេះ កាលពីចុងឆ្នាំ២០០៧ ហើយ ថារ័ត្ន បានឈានជើងចេញទៅប្រកួត នៅប្រទេសកូរ៉េខាងត្បូងកាលពីចុងឆ្នាំ២០១០ ចេញទៅប្រកួតជាក្រុមក្នុងកម្មវិធី “ប្រកួតក្បាច់គុណយុទ្ធសីលប្រចាំប្រទេសនីមួយៗ” សម្រាប់តំណាងឲ្យប្រទេសរបស់ខ្លួន ក្នុងនោះផងដែរវាជាលើកទី១សម្រាប់ប្រទេសកម្ពុជា ក្នុងការចូលរួមប្រកួត ប៉ុន្តែជាលទ្ធផលយើងទទួលបាន ចំណាត់ថ្នាក់លេខ២។

បន្ទាប់ពីនោះមក ដោយសារតែសមត្ថភាពប្រកបដោយទេពកោសល្យខ្ពស់ ថារ័ត្ន បានទទួលការប្រកួតជាបន្តបន្ទាប់ នៅក្រៅប្រទេសជាញឹកញាប់មានដូចជា ប្រទេសកូរ៉េខាងត្បូងបានចំនួនបីឆ្នាំជាប់គ្នា ប្រកួតនៅប្រទេសវៀតណាមបានចំនួន២ដង ហើយបានទទួលការអញ្ជើញជាកិត្តិយស ពីសាធារណរដ្ឋឆែក និងជប៉ុន ក្នុងការបង្ហាញពីក្បាច់គុណល្បុក្កតោ លើឆាកអន្តរជាតិឲ្យគេបានស្គាល់ផងដែរ។

ទាំងនេះ បានធ្វើឲ្យក្រុមគ្រួសាររបស់ ថារ័ត្ន មានមោទនភាពមកលើ ថារ័ត្ន ព្រមទាំងឈប់គិតអវិជ្ជមានលើរូបនាង ជាមួយក្បាច់គុណល្បុក្កតោនេះ។ នេះជាមោទនភាពមួយរបស់ ថារ័ត្ន ដែលបានបង្ហាញក្បាច់គុណបុរាណនេះ ក្នុងនាមខ្លួនជាស្ដ្រី ហើយបានពាំនាំមកនូវភាពជោគជ័យ និងមោទភាពមួយសម្រាប់ប្រទេសកម្ពុជា។ លើសពីនេះទៅទៀតនោះ ថារត្ន័ ក៏បានចូលរួមក្នុងកម្មវិធីមិត្តភាពរវាងកម្ពុជា និងជប៉ុន ៦០ឆ្នាំថែមទៀតផង។

ដោយឡែក ក្នុងឆ្នាំ២០១២ កញ្ញាបានធ្វើដំណើរទៅប្រទេសវៀតណាម ដើម្បីសម្តែងពីក្បាច់គុណល្បុក្កតោ និងបានធ្វើការប្រកួតដើរបង្ហាញម៉ូតដែលកម្មវិធីនោះ បង្កើតទ្បើងក្នុងគោលបំណងចង់បង្ហាញថា ស្ត្រីក៏អាចធ្វើកិច្ចដែលបុរសធ្វើបានដូចគ្នា តាមរយៈអង្គការដើម្បីភាពញញឹមនៃកុមារ ដោយទទួលបានចំណាត់ថ្នាក់លេខ១ (បម្រុង)។ កញ្ញាក៏ធ្លាប់បានទៅប្រកួត នៅប្រទេសកូរ៉េខាងត្បូងម្តងទៀត កាលពីឆ្នាំ២០១៥ ដោយទទួលបានមេដាយប្រាក់ ហើយអ្វីដែល ថារត្ន័ និងមិត្តរួមក្រុមសប្បាយចិត្តបំផុតនោះ គឺកម្ពុជាយើងបានឈ្នះពិន្ទុលើប្រទេស ដែលតែងតែឈ្នះយើងជារៀងរាល់ឆ្នាំ។ ហើយកាលពីខែតុលា ឆ្នាំ២០១៦នេះ កញ្ញាបានធ្វើដំណើរទៅប្រយុទ្ធ នៅប្រទេសជប៉ុនក្នុងកម្មវិធីកីឡាលើឆ្នេរខ្សាច់ (Asian Beach Game) តំណាងឲ្យប្រទេសកម្ពុជា ដោយទទួលបានមេដាយសម្រិត។

ថារ័ត្ន មិនមែនត្រឹមតែជា កីឡាការិនីក្បាច់គុណល្បុក្កតោតែប៉ុណ្ណោះទេ ថារ័ត្នក៏បានប្រទ្បូកចូលទៅក្នុងវិស័យភាពយន្តផងដែរ ដែលក្នុងនោះកញ្ញាថតបាន៥រឿងហើយ ក្នុងចំណោមរឿងទាំង៥នោះ គឺមានរឿង២ដែលកញ្ញាមានអារម្មណ៍ថារំភើប និងមានមោទភាពជាខ្លាំងដែលបានរួមចំណែកក្នុងការសម្តែង។ ក្នុងនោះដែរគឺរឿង “មុនដំបូងខ្មែរក្រហមសម្លាប់ឪពុកខ្ញុំ” និងរឿង “Jailbreak”។

បើសិនជាក្រឡេកមកមើលផលលំបាក ក្នុងវិស័យការងារទាំងពីរនេះ កញ្ញាបានរៀបរាប់ថា សម្រាប់កីឡាក្បាច់គុណល្បុក្កតោ ដំបូងឡើយវាពិតជាមានផលលំបាកជាខ្លាំង ដោយសារគ្មានការជ្រោមជ្រែង និងមានការជំទាស់ពីអ្នកផ្ទះ។ ប៉ុន្តែកញ្ញាតែងតែព្យាយាមពន្យល់បង្ហាញពីអត្ថប្រយោជន៍ និងខ្លឹមសារនៃក្បាច់គុណមួយប្រភេទនេះ ទៅដល់គ្រួសាររបស់កញ្ញា ដើម្បីឲ្យគាត់បានយល់ពីអត្ថប្រយោជន៍ ដែលក្បាច់គុណមួយនេះមាន។ ចំពោះការហាត់សមវិញ កញ្ញាត្រូវប្រើកម្លាំងដើម្បីហ្វឹកហាត់ ហើយពេលហាត់ត្រូវបានហាត់ជាមួយមនុស្សប្រុសទៀត ដែលវាបណ្តាលឲ្យពេលខ្លះ កញ្ញាមានការឈឺចាប់ផ្នែកកាយសម្បទាយ៉ាងខ្លាំង។

រីឯការសម្តែងខ្សែភាពយន្តវិញ ក៏មានផលលំបាកមិនចាញ់ការហាត់ក្បាច់គុណល្បុក្កតោប៉ុន្មានដែរ ព្រោះត្រូវចំណាយពេលច្រើនលើកច្រើនសារ ក្នុងការរៀបចំឈុតឆាកជាមួយការសម្តែងទម្រាំថតត្រូវមួយប្លង់។

បច្ចុប្បន្ននេះ ថារត្ន័ បានចូលទៅក្នុងក្រុមជម្រើសជាតិល្បុក្កតោ ដែលមានសមាជិកសរុប៨នាក់ ហើយនៅក្នុងនោះមានស្រី២នាក់។ ទៅថ្ងៃអនាគត នៅពេលដែលកញ្ញាលែងមានកម្លាំងក្នុងការលេងកីឡាល្បុក្កតោ កញ្ញានឹងធ្វើជាគ្រូបង្ហាត់ដល់ក្មេងជំនាន់ក្រោយ ដើម្បីជួយត្រួសត្រាយផ្លូវ និងចែករំលែកនូវបទពិសោធន៍ដែលខ្លួនធ្លាប់ឆ្លងកាត់ ពីមុនមកជូនដល់ក្មេងៗជំនាន់ក្រោយ ដែលគាត់ស្រឡាញ់នូវកីឡាមួយនេះ។

គួររំលឹកផងដែរថា បើទោះបី ថារ័ត្ន មិនមានឧបនិស្ស័យខាងផ្នែកសិល្បៈដូចលោកឪពុកក៏ពិតមែន ប៉ុន្តែនាងហាក់មានទឹកដមសំនៀងពីធម្មជាតិ ដោយនាងបានបង្ហើបឲ្យដឹងថា “ខ្ញុំបានប្រឡងជាប់ចំណាត់ថ្នាក់លេខ ១ ក្នុងការប្រឡងកម្មវិធីចម្រៀងរបស់ Hauwei ដែលកាលណោះ ខ្ញុំគ្រាន់តែចង់បានរង្វាន់តូចទេ ព្រោះមិននឹកស្មានថា ខ្លួនឯងអាចប្រឡងជាប់ចំណាត់ថ្នាក់បែបនេះឡើយ។

ជាចុងក្រោយកញ្ញា ក៏សូមធ្វើការផ្ដាំផ្ញើទៅកាន់យុវវ័យថា សូមចំណាយពេលក្នុងការសិក្សាឲ្យបានច្រើន ហើយបើមានពេលទំនេរ គួរតែងាកមកហាត់កីឡាទើបជាការប្រសើរ ជៀសជាងយកពេលវេលាដែលមានតម្លៃ ទៅធ្វើរឿងអបាយមុខដែលនាំឲ្យសង្គមស្អប់ខ្ពើម៕

កម្ពុជាថ្មី

“អ៊ុំ ថារ័ត្ន” កីឡាការិនីល្បុកតោ ពោរពេញដោយសមត្ថភាពខ្ពស់

AFC Cup៖ ភ្នំពេញក្រោន ប៉ះក្រុមសិង្ហបុរី Home United ម៉ោង ៦ល្ងាចនេះ នៅកីឡដ្ឋាន RSN

(ភ្នំពេញ)៖ ក្រុមបាល់ទាត់ភ្នំពេញក្រោនរបស់កម្ពុជា នឹងបើកទ្វារកីឡដ្ឋាន RSN របស់ខ្លួនទទួលក្រុម Home United របស់សិង្ហបុរី នាវេលាម៉ោង៦ល្ងាចនេះ នៅក្នុងជំនួបវគ្គជម្រុះ Play-Off ជើងទី១ នៃពានរង្វាន់បាល់ទាត់ជើងឯកអាស៊ី AFC Cup 2017 ហើយក៏មានការផ្សាយផ្ទាល់លើកញ្ចក់ទូរទស្សន៍ BTV-News ផងដែរ។

លោក សែម សំណាង គ្រូបង្វឹកក្រុមភ្នំពេញក្រោន បានថ្លែងក្នុងសន្និសីទមុនការប្រកួតពីម្សិលមិញថា ជំនួបជើងទី១ ល្ងាចនេះ អាចនឹងមានផលវិបាកខ្លាំង សម្រាប់កូនក្រុមរបស់ខ្លួន ដោយសារ Home United គឺជាក្រុមមានបទពិសោធន៍ខ្ពស់ និងមានកីឡាករល្អៗច្រើន ខណៈភ្នំពេញក្រោនបណ្ដុំដោយកីឡាករក្មេងៗច្រើន។

គ្រួបង្វឹកសញ្ញាតិខ្មែររូបនេះបន្ដថា មួយរយៈពេលចុងក្រោយនេះ ភ្នំពេញក្រោនទទួលលទ្ធផលមិនសូវល្អពីការប្រកួតមិត្តភាពនោះទេ ប៉ុន្ដែវាគឺជាបទពិសោធន៍ដ៏ល្អ សម្រាប់កីឡាករវ័យក្មេងរបស់ខ្លួន ពិសេសពេលជួបក្រុមខ្លាំងថៃ Buriram តែម្ដង។ ចំណែកការជួបក្រុម Home United ល្ងាចនេះ ក៏ជាបទពិសោធន៍ដែរ ប៉ុន្ដែលទ្ធផលយ៉ាងណាមិនទាន់ប្រាកដនោះទេ ទាល់តែចប់ការប្រកួតពេញម៉ោងទើបដឹង។

រីឯលោក Aidil Sharin គ្រូបង្វឹកក្រុម Home United បានថ្លែងថា ទោះបីភ្នំពេញក្រោន មានកីឡាករក្មេងៗច្រើនក្ដី ក្រុមលោកនៅតែបង្កើនការប្រុងប្រយ័ត្នខ្ពស់ជានិច្ច ពិសេសគឺកីឡាករ កែវ សុខផេង, ខ្សែប្រយុទ្ធសញ្ជាតិនីហ្សេរីយ៉ា Shane Booysen និងកីឡាករអ៊ុយក្រែន Volodymyr Ordynskyi ដែលជាឧបសគ្គរបស់ខ្លួនតែម្ដង។ លោកបន្ដថា ការប្រកួតក្រៅដី គឺជាការលំបាក តែលោករឹតតែត្រូវការឈ្នះ ដើម្បីងាយស្រួលជួបគ្នាជើងទី២ លើទឹកដីខ្លួនវិញ នៅថ្ងៃទី៧ ខែកុម្ភៈ ឆ្នាំ២០១៧ខាងមុខ៕

Fresh News

AFC Cup៖ ភ្នំពេញក្រោន ប៉ះក្រុមសិង្ហបុរី Home United ម៉ោង ៦ល្ងាចនេះ នៅកីឡដ្ឋាន RSN

ទិដ្ឋភាពប្រកួតដែលមានការចូលរួមពីកីឡាករ តារាកំប្លែង តារាចម្រៀង និងថ្នាក់ដឹកនាំស.ស.យ.ក

ជំនួបសប្បុរសធម៌ដើម្បីស្វែងរកថវិកាជួយមន្ទីរពេទ្យគន្ធបុប្ផារវាងក្រុមកីឡាបាល់ទាត់ ប្រាក់ មុន្នីឧត្តម All Star និងក្រុម ចាន់ វឌ្ឍនាកា All Star បានប្រព្រឹត្តទៅកាលពីរសៀលថ្ងៃទី២៦ ខែមករា នៅពហុកីឡដ្ឋានជាតិ ដោយបញ្ចប់ក្នុងលទ្ធផលស្មើ ៤-៤ ។

ការប្រកួតនេះដោយមានការចូលរួមពីសំណាក់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យក) តារាកំប្លែង តារាចម្រៀង តារាសម្តែង និងកីឡាករបាល់ទាត់ជាច្រើនរូបទៀត។ ការប្រកួតនេះមិនត្រឹមតែដើម្បីមនុស្សធម៌ប៉ុណ្ណោះទេ ថែមទាំងដើម្បីអបអរការប្រកួតពានរង្វាន់ Soccer League ប្រចាំឆ្នាំ២០១៧ ទៀតផង។

សម្រាប់ក្រុម ចាន់ វឌ្ឍនាកា All Star គ្រាប់បាល់ស៊ុតបញ្ចូលទីសម្រេចបានដោយ ចាន់ វឌ្ឍនាកា នាយក្រឹម អ្នកចម្រៀង ខេម និងមង្គល ទីណា ដែលក្នុងនោះ លោក ហ៊ុន ម៉ានី ក៏បានរួមចំណែកបញ្ជូនឲ្យវឌ្ឍនាកា ស៊ុតគ្រាប់បើកឆាកផងដែរ។ រីឯក្រុម ប្រាក់ មុន្នីឧត្តម All Star គ្រូបង្វឹកក្រុមជម្រើសជាតិកម្ពុជា លោក Lee Tae Hoon បោះឲ្យ ឧត្តម ស៊ុតគ្រាប់ដំបូង ហើយកីឡាករដែលធ្វើបានសម្រេចជាបន្តបន្ទាប់រួមមាន ទិត្យ ឌីណា នាយគ្រឿន និងសុជាតិភ្លេងខ្មែរ៕

ថ្មីៗ
អត្ថបទ : សឿន វណ្ណឌេត

ទិដ្ឋភាពប្រកួតដែលមានការចូលរួមពីកីឡាករ តារាកំប្លែង តារាចម្រៀង និងថ្នាក់ដឹកនាំស.ស.យ.ក

ក្រុមខណ្ឌពោធិ៍សែនជ័យលើកពាន Soccer League ក្រោយយកឈ្នះកំចាយមារ ៥-០

ក្រុមបាល់ទាត់យុវជនសាលាខ័ណ្ឌពោធិ៍សែនជ័យបានក្លាយជាម្ចាស់ជើងឯកពានរង្វាន់ Soccer League ប្រចាំឆ្នាំ២០១៧ ក្រោយយកឈ្នះក្រុមយុវជនស.ស.យ.កស្រុកកំចាយមារ ៥-០ ក្នុងវគ្គផ្តាច់ព្រ័ត្រកាលពីល្ងាចថ្ងៃទី២៦ ខែមករា នៅពហុកីឡដ្ឋានជាតិ។ ជាមួយគ្នានេះ ថវិកាដែលទទួលបានពីជើងឯក និងប្រាក់ឧបត្ថម្ភពីក្រុមហ៊ុនផ្សេងៗចំនួន១៨លានរៀលបានបរិច្ចាកជូនមន្ទីរពេទ្យគន្ធបុប្ផា។

ក្រុមយុវជនសាលាខ័ណ្ឌពោធិ៍សែនជ័យបានលត់ក្រុមយុវជនស.ស.យ.កស្រុកកំចាយមារ ៥-០ ក្នុងវគ្គផ្តាច់ព្រ័ត្រកាលពីល្ងាចថ្ងៃទី២៦ ខែមករា នៅពហុកីឡដ្ឋានជាតិ ដើម្បីលើកពាន Soccer League ប្រចាំឆ្នាំ២០១៧ និងប្រាក់រង្វាន់លើកទឹកចិត្ត១២លានរៀល។ ប្រាក់រង្វាន់ទាំងនេះរួមទាំងប្រាក់ឧបត្ថម្ភពីក្រុមហ៊ុនផ្សេងៗសរុបទាំងអស់១៨លានរៀលត្រូវបានក្រុមម្ចាស់ជើងឯកមួយនេះបរិច្ចាកជូនមន្ទីរពេទ្យមន្ទីរពេទ្យគន្ធបុប្ផា។

ក្រោយចាញ់ក្រុមយុវជនខ័ណ្ឌពោធិ៍សែនជ័យធ្វើឲ្យក្រុមយុវជនស.ស.យ.កស្រុកកំចាយមារទទួលបានចំណាត់ថ្នាក់លេខ២ និងប្រាក់រង្វាន់លើកទឹកចិត្តចំនួន៨លានរៀល។ រីឯក្រុមការពារជើងឯកអាណាចក្របៃតងទទួលបានចំណាត់ថ្នាក់លេខ៣ និងប្រាក់រង្វាន់៤លានរៀល ខណៈក្រុមឆន្ទៈកីឡាទទួលបានចំណាត់ថ្នាក់លេខ៤ និងប្រាក់រង្វាន់ ២លានរៀល។

ដោយឡែក ក្រុមឆន្ទៈកីឡាបានជាប់ជាក្រុម Fair Play ប្រចាំព្រឹត្តិការណ៍ Soccer League ឆ្នាំ២០១៧ រីឯកីឡាករ វ៉ែន វិចិត្រ ទទួលបានស្បែងជើងមាសក្រោយរកគ្រាប់បាល់២១គ្រាប់ម្នាក់ឯង ខណៈអ្នកចាំទីរបស់យុវជនខ័ណ្ឌពោធិ៍សែនជ័យទទួលបានពានជាអ្នកចាំទីល្អ។ ចំណែកលោក ទៀង ទិនី គ្រូបង្វឹករបស់ក្រុមយុវជនសាលាខ័ណ្ឌពោធិ៍សែនជ័យទទួលពានជាគ្រូបង្វឹកល្អ។ ក្រៅពីពានទាំងនេះក៏ទទួលបានប្រាក់រង្វាន់លើកទឹកចិត្តម្នាក់១លានរៀលបន្ថែមផងដែរ៕

ថ្មីៗ
អត្ថបទ : សឿន វណ្ណឌេត

ក្រុមខណ្ឌពោធិ៍សែនជ័យលើកពាន Soccer League ក្រោយយកឈ្នះកំចាយមារ ៥-០

កីឡាការិនី Samontha ក្មួយរបស់ កែវ រំចង់ ចាញ់ថៃក្នុងជំនួបដែលគិតថាសំខាន់ក្នុងជីវិត

កីឡាការិនីកូនកាត់ខ្មែរ-អាមេរិក Samontha Stephenson ដែលត្រូវជាក្មួយរបស់កីឡាករ កែវ រំចង់ បានប្រកួតចាញ់កីឡាការិនីថៃ ដោយពិន្ទុកាលពីយប់ថ្ងៃទី២៤ ខែមករា នៅខេត្តឈៀងម៉ៃប្រទេសថៃ។ ការចាញ់នេះបានធ្វើឲ្យ Samontha ខកបំណងដែលខ្លួនបានប៉ងមុនថ្ងៃឡើងប្រកួត។

ក្រោយប្រកួតយ៉ាងស្វិតស្វាញអស់រយៈពេល៣ទឹកពេញកីឡាការិនីកូនកាត់ខ្មែរ-អាមេរិក Samontha ដែលជាក្មួយរបស់កីឡាករជើងខ្លាំង កែវ រំចង់ ត្រូវបានអាជ្ញាកណ្តាលថៃកាត់ក្តីឲ្យចាញ់កីឡាការិនីថៃ Farmongkol Petcharern ដោយពិន្ទុ។ ការបរាជ័យនេះក្នុងជំនួបកាលពីយប់ថ្ងៃទី២៤ ខែមករា នៅខេត្តឈៀងម៉ៃប្រទេសថៃ។

ក្នុងជំនួបរវាងកីឡាការិនីដែលមានម្តាយជាខ្មែរឪពុកជាជនជាតិអាមេរិក Samontha និងកីឡាការិនីថៃ គេឃើញកីឡាជើងខ្លាំងរបស់កម្ពុជា កែវ រំចង់ ជាអ្នកឲ្យទឹកកីឡាការិនី Samontha ជំនួបមួយនេះ។ មិនត្រឹមតែប៉ុណ្ណោះ រំចង់ ក៏ជាអ្នកបង្វឹក សាម៉ុនថា មុនការប្រកួតនៅប្រទេសថៃផងដែរ។

ការបរាជ័យនេះហាក់ដូចធ្វើឲ្យ Samontha ខកបំណងដែលខ្លួនបានប៉ងមុនពេលប្រកួត ព្រោះរូបគេបានចាត់ជំនួបនេះជាជំនួបមួយដ៏សំខាន់ក្នុងជីវិតរបស់គេ។«ខ្ញុំគិតថា នេះជាការប្រកួតមួយដ៏សំខាន់ក្នុងជីវិតរបស់ខ្ញុំ ការប្រកួតនេះខ្ញុំសូមផ្ញើជូនម្តាយរបស់ខ្ញុំ គ្រូបង្វឹករបស់ខ្ញុំ ជាពិសេសពូ កែវ រំចង់ ដែលបានមកជួយមើលការហ្វឹកហាត់របស់ខ្ញុំដល់ប្រទេសថៃ ហើយមួយទៀតសូមអរគុណទស្សនិកជននៅស្រុកខ្មែរដែលគាំទ្រខ្ញុំ»។ នេះជាសំដីរបស់ សាម៉ុនថា មុនការប្រកួតមកដល់។

កីឡាការិនីវ័យ១៤ឆ្នាំរូបនេះបានបញ្ជាក់ថា រូបនាងបានធ្វើការហ្វឹកហាត់យ៉ាងខ្លាំងដើម្បីត្រៀមការប្រកួតមួយនេះ ដោយហ្វឹកហាត់៥ថ្ងៃក្នុងមួយសប្តាហ៍ ហើយក្នុងមួយថ្ងៃនាងរត់៣០នាទីដើម្បីយកកម្លាំង។ នេះជាបរាជ័យលើកទី២ហើយរបស់ Samontha ក្នុងជំនួប១០លើក៕

ថ្មីៗ
អត្ថបទ : សឿន វណ្ណឌេត

កីឡាការិនី Samontha ក្មួយរបស់ កែវ រំចង់ ចាញ់ថៃក្នុងជំនួបដែលគិតថាសំខាន់ក្នុងជីវិត

បីប្រកួតក្នុងពានសម្តេច ហ៊ុន សែន នាថ្ងៃនេះ ខណៈតាកែវឡើងទៅវគ្គបន្តក្រោយកំពង់ស្ពឺដកខ្លួន

ក្រុមចំនួន៦ ត្រូវប្រជែងគ្នាក្នុងសប្តាហ៍ទី២ដំណាក់កាលទី១នៃពានរង្វាន់សម្តេច ហ៊ុន សែន នៅថ្ងៃទី២៥ ខែមករា នេះ ក្នុងនោះ ខេត្តព្រៃវែងជួបម្ចាស់ផ្ទះខេត្តត្បូងឃ្មុំ ម្ចាស់ផ្ទះបាត់ដំបងស្វាគមន៍ខេត្តប៉ៃលិន និងខេត្តស្ទឹងត្រែងធ្វើដំណើរទៅជួបម្ចាស់ផ្ទះខេត្តមណ្ឌលគីរី។ ចំណែកខេត្តតាកែវឡើងទៅឈរចាំនៅដំណាក់កាលទី២តំណាងពូល A ក្រោយខេត្តកំពង់ស្ពឺសុំដកខ្លួន។

ក្រុមខេត្តព្រៃវែងក្រោយលត់ខេត្តកណ្តាល ៧-៣ ដើម្បីឈរកំពូលតារាងប្រចាំពូល B កាលពីសប្តាហ៍ទី១ ត្រូវបន្តប្រជែងជាមួយម្ចាស់ផ្ទះខេត្តត្បូងឃ្មុំ នាវេលាម៉ោង៣:៣០នាទីរសៀលថ្ងៃទី២៥ ខែមករា។ រីឯម្ចាស់ខេត្តបាត់ដំបងត្រូវទទួលស្វាគមន៍ខេត្តប៉ៃលិនក្នុងពូល D នាវេលាម៉ោង៣:០០នាទីរសៀល ស្របពេលខេត្តស្ទឹងត្រែងធ្វើដំណើរទៅជួបម្ចាស់ផ្ទះខេត្តមណ្ឌលគីរី ក្នុងពូល F នាវេលាម៉ោង៣រសៀលនេះ។

ដោយឡែកពូល A ដែលមានតែពីរក្រុម គឺខេត្តកំពង់ស្ពឺ និងខេត្តតាកែវ ក្រោយខេត្តកំពង់ស្ពឺសុំដកខ្លួនធ្វើឡើងខេត្តតាកែវឡើងទៅឈរចាំក្នុងដំណាក់ទី២នៃវគ្គជម្រុះតាមពូលដោយស្វ័យប្រវត្តិ ដូចខេត្តកំពតដែលមានតែមួយក្រុមតំណាងឲ្យពូល E៕

ការប្រកួតពានរង្វាន់សម្តេច ហ៊ុន សែន ប្រចាំថ្ងៃទី២៥ ខែមករា ឆ្នាំ២០១៧
- ម៉ោង៣:៣០នាទី៖ ខេត្តព្រៃវែង ជួប ខេត្តត្បូងឃ្មុំ នៅកីឡដ្ឋានខេត្តត្បូងឃ្មុំ
- ម៉ោង៣:០០នាទី៖ ខេត្តបាត់ដំបង ជួប ខេត្តប៉ៃលិន នៅកីឡដ្ឋានខេត្តបាត់ដំបង
- ម៉ោង៣:០០នាទី៖ ខេត្តមណ្ឌលគីរី ជួប ខេត្តស្ទឹងត្រែង នៅកីឡដ្ឋានខេត្តបាត់ដំបង

ថ្មីៗ
អត្ថបទ : សឿន វណ្ណឌេត

បីប្រកួតក្នុងពានសម្តេច ហ៊ុន សែន នាថ្ងៃនេះ ខណៈតាកែវឡើងទៅវគ្គបន្តក្រោយកំពង់ស្ពឺដកខ្លួន

ឡៅ ចន្ទ្រា និង ផល សោភ័ណ្ឌ ផ្តួលថៃឲ្យសន្លប់ដូចគ្នាតែរយៈពេលខុសគ្នា

អ្នកលេងគុនខ្មែរជើងខ្លាំងជួរមុខរបស់កម្ពុជា ឡៅ ចន្ទ្រា និង ផល សោភ័ណ្ឌ បានផ្តួលកីឡាករថៃឲ្យសន្លប់ដោយប្រើស្នៀតពិសេសដូចគ្នាក្នុងជំនួបមិត្តភាពអន្តរជាតិនៅលើសង្វៀនបាយ័នស្ទឹងមានជ័យកាលពីយប់ថ្ងៃទី២២ ខែមករា។ ប៉ុន្តែកីឡាករ ចន្ទ្រា ប្រើរយៈពេលតិចជាង សោភ័ណ្ឌ ក្នុងជំនួបមួយនេះ។

អ្នកលេងគុនខ្មែរជួរមុខកម្ពុជាមកពីក្លិបកងពលតូចឆ័ត្រយោង៩១១ ឡៅ ចន្ទ្រា បានចំណាយពេលត្រឹមតែពីរទឹកប៉ុណ្ណោះដើម្បីផ្តួលអ្នកលេងគុនថៃ Fashootsai Cnneangmaipanuyutm ឲ្យសន្លប់។ ការផ្តួលកីឡាករថៃនេះ កើតឡើងនៅពេលដែលអ្នកលេងគុនខ្មែរ(ចន្ទ្រា) ឱបក្រៀកកីឡាករថៃខ្ទប់ទៅនឹងសង្វៀនរួចប្រើកែវឆ្វេងចំផ្ទៃមុខ មុននឹងថែមមួយជង្គង់ស្តាំទៅលើកីឡាករថៃ។

ចំណែកកីឡាករជើងខ្លាំងមកពីក្លិបតាឡីដំរីមានរិទ្ធ ផល សោភ័ណ្ឌ បានចំណាយរយៈពេល៤ទឹក្នុងការផ្តួលកីឡាករថៃ Petchborey Sakmuengkraeng ឲ្យសន្លប់។ ការផ្តួលនេះបន្ទាប់ពីអ្នកលេងគុនខ្មែររូបនេះបានទាត់កីឡាករថៃខូចជើងក្រោកលេងរួច។ ប៉ុន្តែមុននឹងឈានដល់ចំណុចនេះកីឡាករ ផល សោភ័ណ្ឌ បានវាយកីឡាករថៃឲ្យអាជ្ញាកណ្តាលរាប់ពីដង និងបានបន្សល់ស្នាមបែកនៅលើជញ្ជាំងឲ្យកីឡាករថៃទៀតផង។

គួរបញ្ជាក់ថា ការផ្តួលអ្នកលេងឆ្លងដែនថៃរបស់អ្នកលេងគុនខ្មែរជួរមុខ ឡៅ ចន្ទ្រា និង ផល សោភ័ណ្ឌ នេះ ធ្វើឡើងក្នុងជំនួបមិត្តភាពអន្តរជាតិកាលពីយប់ថ្ងៃទី២២ ខែមករា នៅលើសង្វៀនបាយ័នស្ទឹងមានជ័យ៕

ថ្មីៗ
អត្ថបទ : សឿន វណ្ណឌេត

ឡៅ ចន្ទ្រា និង ផល សោភ័ណ្ឌ ផ្តួលថៃឲ្យសន្លប់ដូចគ្នាតែរយៈពេលខុសគ្នា

កីឡា១០ប្រភេទត្រូវបានដាក់ឲ្យប្រកួតជើងឯកថ្នាក់ជាតិប៉ុន្តែអវត្តមានកីឡាសក្តានុពលមួយចំនួន

ក្រសួងអប់រំ យុវជន និងកីឡា កាលពីថ្ងៃទី១៨ ខែមករា បានចេញលិខិតឧទ្ទេសនាមប្រភេទកីឡាទាំង១០ដែលត្រូវរៀបចំប្រកួតកីឡាមហាជនជ្រើសរើសជើងឯកថ្នាក់ជាតិប្រចាំឆ្នាំ២០១៧។ ប៉ុន្តែក្នុងលិខិតនោះមិនមានវត្តមានប្រភេទកីឡាសក្កានុពលមួយចំនួនដែលបានដាក់ឲ្យចូលរួមប្រកួតកីឡាជាតិលើកទី១ឆ្នាំ២០១៦ នោះឡើយ។

យោងតាមលិខិតឧទ្ទេសនាមរបស់ក្រសួងអប់រំ យុវជន និងកីឡាកាលពីថ្ងៃទី១៨ ខែមករា កីឡាទាំង១០ប្រភេទដែលដាក់ឲ្យរៀបចំការប្រកួតកីឡាមហាជ្រើសរើសជើងឯកថ្នាក់ជាតិឆ្នាំ២០១៧ រួមមានសូហ្វតិន្នីស, សីប៉ាក់តាក្រ, ស្គីទឹកកក, ទាញព្រ័ត្រ, វូស៊ូ, យូដូ, វ៉ូវីណាម, តេក្វាន់ដូ(ITF), តុងហ្គីលម៉ូដូ, និងកីឡាទូកប្រពៃណីខ្នាតអន្តរជាតិ និងកានូកាយ៉ាក់។ គួររំលឹកថា ប្រភេទកីឡាទាំងនេះសុទ្ធតែមិនបានចូលរួមប្រកួតកីឡាជាតិលើកទី១ឆ្នាំ២០១៦។

ទោះបីឆ្នាំនេះមិនមែនជាឆ្នាំដែលត្រូវរៀបចំការប្រកួតកីឡាជាតិលើកទី២ក៏ដោយ ប៉ុន្តែប្រភេទកីឡាសក្តានុពលមួយចំនួនដូចជា តេក្វាន់ដូ WTF, ប៉េតង់, ចំបាប់ និងល្បុក្កតោជាដើម មិនមានវត្តមានក្នុងបញ្ជីឧទ្ទេសនាមការប្រកួតកីឡាមហាជននេះឡើយ ពោលគឺប្រភទេកីឡាដែលចូលរួមប្រកួតកីឡាជាតិលើកទី១កាលពីឆ្នាំ២០១៦។

លិខិតឧទ្ទេសនាមដដែលបានបញ្ជាក់យ៉ាងដូច្នេះថា៖«សហព័ន្ធត្រូវទទួលខុសត្រូវលើផ្នែកបច្ចេកទេស ដោយធ្វើលិខិតស្នើសុំគោលការណ៍រៀបចំការប្រកួត ភ្ជាប់មកជាមួយនូវបទបញ្ជា និងសេចក្តីជូនដំណឹងស្តីពីការរៀបចំការប្រកួតបញ្ជូនមកក្រសួងអប់រំ តាមរយៈនាយកដ្ឋានកីឡាឲ្យបានមុនពីរខែនៃការប្រកួត។ មន្ទីរអប់រំ យុវជន និងកីឡារាជធានី-ខេត្តត្រូវសហការជាមួយសមាគម-ក្លិបរៀបចំការប្រកួត ដើម្បីចម្រាញ់ជ្រើសរើសកីឡាករដែលមានសមត្ថភាព សម្រាប់បញ្ជូនចូលរួមប្រកួតជើងឯកនេះ»។

ក្រៅពីការប្រកួតកីឡាមហាជនជ្រើសរើសជើងឯកថ្នាក់ជាតិប្រចាំឆ្នាំ២០១៧ ក៏មានការប្រកួតកីឡាដើម្បីទាំងអស់គ្នាសម្រាប់រាជធានី-ខេត្ត និងសម្រាប់នាយដ្ឋានអប់រំកាយ និងកីឡា ផងដែរ៕

ថ្មីៗ
អត្ថបទ : សឿន វណ្ណឌេត

កីឡា១០ប្រភេទត្រូវបានដាក់ឲ្យប្រកួតជើងឯកថ្នាក់ជាតិប៉ុន្តែអវត្តមានកីឡាសក្តានុពលមួយចំនួន

កម្មវិធី «កំពូលអ្នកប្រដាល់ស្រាបៀរលីអូ» រដូវកាលទី៥ រៀបចំប្រកួតដណ្តើមខ្សែក្រវ៉ាត់អន្តរជាតិ នៅស្ថានីយទូរទស្សន៍បាយ័ន

(ភ្នំពេញ)៖ កម្មវិធី «កំពូលអ្នកប្រដាល់ ស្រាបៀរលីអូ» រដូវកាលទី៥ បានមកដល់ជាសារជាថ្មីទៀតហើយ ជាមួយនឹងការប្រកួតដណ្ដើខ្សែរក្រវ៉ាត់អន្ដរជាតិ នៅស្ថានីយទូរទស្សន៍បាយ័ន ដែលឧបត្ថម្ភទាំងស្រុងដោយ ស្រាបៀរលីអូ។

ថ្លែងក្នុងសន្និសីទ កាសែតនៅសង្វៀនទូរទស្សន៍បាយ័នបឹងស្នោរនៅថ្ងៃទី២២ ខែមករា លោក ព្រាប សុវណ្ណ អ្នកតំណាងស្រាបៀរលីអូ បានថ្លែងថា កម្មវិធី «កំពូលអ្នកប្រដាល់ស្រាបៀរលីអូ» រដូវកាលទី៥នេះ មិនមែនជាការប្រដាល់លក្ខណៈថ្នាក់ជាតិ ដូចរដូវកាលមុនៗទេ តែជាការប្រកួត ដណ្តើមខ្សែក្រវ៉ាត់អន្តរជាតិ។

លោកក៏បានណែនាំ កំពូលអ្នកប្រដាល់កម្ពុជាចំនួនប្រាំ៤ រូបគឺ ដន រដ្ឋា, ឯម វុត្ថា, នន ជំនិត និងរ៉ែន សុវត្ថិ និងកំពូលអ្នកប្រដាល់ មកពីប្រទេសថៃចំនួន២ រូបទៀត គឺ ឡាយ ផាយាក់ និងហា ឈៀងសៀន ដែលនឹងឡើងមកអង្រួនសង្វៀន ក្នុងរដូវកាលថ្មីនេះ។

លោកបន្ដថា «ការឧបត្ថម្ភនេះ បានបង្ហាញពីការប្តេជ្ញាចិត្តរបស់ស្រាបៀរលីអូ ក្នុងការគាំទ្រកីឡាប្រដាល់កម្ពុជា និងកីឡាករកម្ពុជា ហើយយើងជឿជាក់ ថា កីឡាករកម្ពុជាទាំងអស់សុទ្ធតែខ្លាំង មានការតស៊ូ និងពូកែទាំងការប្រកួតថ្នាក់ជាតិ និងអន្តរជាតិ។ នេះជាមោទនភាពមួយ សម្រាប់ប្រជាជនកម្ពុជាទូទាំងប្រទេស ដើម្បីចូលរួមទស្សនាការប្រកួត របស់កំពូលកីឡាករកម្ពុជា និងកីឡាករអន្តរជាតិល្បីៗ និងខ្លាំងៗជាច្រើនរូប ស្រាបៀរលីអូ នឹងនៅទីនេះ ដើម្បីលើកទឹកចិត្ត និងអបអរ រាល់ជ័យជំនះ របស់កីឡាករកម្ពុជាទាំងអស់»។

លោក តែម ម៉ឺន ប្រធានសហព័ន្ធប្រដាល់កម្ពុជា បានថ្លែងថាផងដែរថា «ការប្រកួតដណ្ដើមខ្សែក្រវា៉ត់ កំពូលអ្នកប្រដាល់ស្រាបៀរលីអូនៅពេលនេះ ជាពេលវេលាមួយ ដែលប្អូនៗជាកីឡាករ ត្រូវបញ្ចេញនូវសមត្ថភាព ទេពកោសល្យ និងបច្ចេកទេសព្រមជាមួយគ្នា ទើបទទួលបានជ័យជំនះ ទន្ទឹមនឹងនោះផងដែរ កីឡាករយើង សំខាន់បំផុត គឺសុខភាព ដែលប្អូនៗត្រូវប្រុងប្រយ័ត្នខ្ពស់ ទាំងមុនប្រកួត និងក្រោយការប្រកួត ដូច្នេះសូមឲ្យប្អូនៗទទួលលទ្ធផលល្អក្នុងការប្រកួតនេះ»។

គួរបញ្ជាក់ថា ការប្រកួតនេះ មានរៀងរាល់ថ្ងៃអាទិត្យ ចាប់ពីម៉ោង៤រសៀល ដល់ម៉ោង៦ល្ងាច នៅសង្វៀនស្ថានីយទូរទស្សន៍បាយ័នបឹងស្នោរ ហើយក៏មានការផ្សាយបន្តរផ្ទាល់នៅលើកញ្ចក់ទូរស្សន៍បាយ័នផងដែរ សូមទស្សនាចាប់ពីសប្ដាហ៍នេះតទៅ៕

Fresh News

កម្មវិធី «កំពូលអ្នកប្រដាល់ស្រាបៀរលីអូ» រដូវកាលទី៥ រៀបចំប្រកួតដណ្តើមខ្សែក្រវ៉ាត់អន្តរជាតិ នៅស្ថានីយទូរទស្សន៍បាយ័ន

ប៉ះជើងឯករងថៃ៦ជំនាន់ មាស ច័ន្ទមាន បានត្រឹមស្មើ

មាស ច័ន្ទមាន (ក្រហម) និង Den Phechhit (សុខ ឆាយ)

ការប្រកួតប៉ះគ្នានៅលើសង្វៀនទូរទស្សន៍អាស៊ីអាគ្នេយ៍កាលពីថ្ងៃទី១៥ មករា ម្ចាស់ខ្សែក្រវាត់ល្បីឈ្មោះក្នុងប្រភេទទម្ងន់៦៣,៥គីឡូក្រាមរបស់កម្ពុជាគឺ មាស ច័ន្ទមាន បានត្រឹមតែស្មើពិន្ទុប៉ុណ្ណោះជាមួយកីឡាករថៃដែលត្រូវគេប្រកាសថាជាជើងឯករងនៅលើសង្វៀនប្រទេសថៃចំនួន៦លើក។ ក្នុងនោះ កីឡាករកម្ពុជាដែលមានឈ្មោះជាម្ចាស់ជើងឯក ក៏ត្រូវគេឃើញឆ្លងផុតទឹកទី៥ ដោយលំបាកផងដែរ។

លោក ថៃ អ៊ូ អ្នកដឹកនាំកីឡាករថៃអោយមកប្រកួតនៅលើសង្វៀនទូរទស្សន៍អាគ្នេយ៍អាគ្នេយ៍បានអះអាងថា កីឡាករថៃ Den Phechhit ដែលបានប៉ះប្រកួតជាមួយកីឡាករកម្ពុជា មាស ច័ន្ទមាន មិនធ្លាប់ទទួលបានខ្សែក្រវាត់ឬជើងឯកណាមួយនៅក្នុងប្រទេសថៃនោះទេ។ ប៉ុន្តែលោកថានៅក្នុងទីក្រុងបាងកក កីឡាកររូបនេះមានកេរ្តិ៍ឈ្មោះបោះសំឡេងសម្រាប់ប្រភេទ៦៣,៥គីឡូក្រាមដូចគ្នានឹង មាស ច័ន្ទមាន នៅកម្ពុជាដែរ បើទោះជាគេមិនធ្លាប់មានឈ្មោះជាម្ចាស់ខ្សែក្រវាត់ក្រោយឆ្លងកាត់ការប្រកួតខ្សែក្រវាត់ច្រើនលើក។

លោកថាកីឡាករ Den Phechhit ឡើងប្រកួតខ្សែក្រវាត់ចំនួន៦លើកមុនមកដល់កម្ពុជា ប៉ុន្តែមិនមានការប្រកួតណាមួយដែលជួយអោយគេបានឈ្នះជាម្ចាស់ខ្សែក្រវាត់នោះទេ គឺបានត្រឹមតែលេខ២ដូចគេរាប់។ លោកថាជារឿងចាប់អារម្មណ៍ដែលកីឡាកររូបនេះឡើងប្រកួតខ្សែក្រវាត់៦លើក ហើយបានតំណែងជើងឯករងទាំង៦ដូចគ្នា បើទោះមិនធ្លាប់បានខ្សែក្រវាត់ឬពានជើងឯកសូម្បីតែម្ដង។

លោកនិយាយថា៖ «អា Phechhit ហ្នឹងមិនដឹងវាមិចទេដូចស៊យម្មងថាឡើងចូលប្រកួតខ្សែក្រវាត់៦លើក(នៅថៃ) បានតែរង(ជើងឯក)រហូត តែវាឃើញស្រាប់ហើយគឺល្អសមត្ថភាពវាមែនទែន»។

លោកថាកីឡាករថៃរូបនេះមានសមត្ថភាពខ្លាំងជាពិសេសខាងម៉ាត់និងទាត់ស្ដាំគឺល្អ ហើយបើនិយាយពីកម្លាំងវាយបំបុកវិញ ក៏លោតមិនធម្មតាផងដែរ ទើបលោកយល់ថាលទ្ធផលស្មើរបស់កីឡាករ មាស ច័ន្ទមាន ក៏ជាលទ្ធផលមិនធម្មតា។

លោកនិយាយថា៖ «ដ្បិតថាវាមិនមានខ្សែក្រវាត់ដូច មាស ច័ន្ទមាន តែអាបស់ខ្ញុំ(កីឡាករថៃ)វាបានជើងឯករងដល់៦លើកក៏មិនមែនធម្មតាដែរ ខ្ញុំថាបើ មាស ច័ន្ទមាន វាមិនខ្លាំងដែរ ប្រហែលចប់ក្រោមដៃអាបស់ខ្ញុំបាត់ហើយ ព្រោះឃើញហើយថាអាថៃខ្ញុំល្អ!»។

យោងតាមការប្រកួតជាក់ស្ដែង កីឡាករ មាស ច័ន្ទមាន ជាម្ចាស់ខ្សែក្រវាត់ បើទោះជាមានកណ្ដាប់ដៃល្អ ក៏មិនសូវមានឱកាសវាយបំបុកទៅលើកីឡាករថៃដែលមានឈ្មោះត្រឹមជាជើងឯករងនោះបានប៉ុន្មានទេ។

ក្នុងទឹកទី៣ និងទី៤ កីឡាករកម្ពុជា សឹងត្រូវផ្ងារជើងម្ដងៗ ដោយសារតែកណ្ដាប់ដៃរបស់កីឡាករថៃវាយត្រូវគោលដៅបានល្អ។ អ្នកទស្សនាភាគច្រើនបុកពោះនៅក្នុងទឹកទាំងនោះ តែសម្រាប់ទឹកទី២ និងទី៥ កីឡាករថៃកម្ពុជាមានឱកាសវាយសងបានល្អធ្វើអោយអ្នកគាំទ្រផ្ទុះសំឡេងលើកទឹកចិត្តយ៉ាងកងរំពងផងដែរ ទើបបណ្ដាលអោយលទ្ធផលចាញ់ពិន្ទុមិនអាចកើតឡើង។

លទ្ធផលស្មើរបស់គូនេះត្រូវឃើញមានការចាប់អារម្មណ៍ច្រើនជាងប្រកាសអោយម្នាក់ចាញ់ឬឈ្នះ ដោយសារតែកីឡាករថៃក៏វាយចេញបានល្អ ហើយកីឡាករកម្ពុជាវាយបំបុកដោយការតស៊ូនៅលើសង្វៀនពេញរយៈពេល៥ទឹក។

លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍ បានអះអាងថា គូខាងលើវាយលុកបានល្អ ដោយកីឡាករកម្ពុជា និងកីឡាករថៃ ដ្បិតថាម្នាក់ជាម្ចាស់ខ្សែក្រវាត់ ហើយម្នាក់ទៀតបានត្រឹមជាជើងឯករង គឺមានសមត្ថភាពប្រហាក់ប្រហែលគ្នា។ លោកថាកីឡាករ មាស ច័ន្ទមាន វាយល្អក្នុងទឹកទី២ និងទី៥ តែកីឡាករថៃក៏ល្អក្នុងទឹក៣ និងទី៤ផងដែរ ទើបលទ្ធផលស្នើពិន្ទុរបស់កីឡាករទាំងពីមានការពេញចិត្តភាគច្រើន។

លោកថាគូនេះវាយគ្នាពេញទំហឹងពេញរយៈពេល៥ទឹក ដោយលោកប្រកាសថាអ្នកទាំងពីប្រកួតជក់ចិត្តសម្រាប់គូប្រកួតអន្តរជាតិដែលទូរទស្សន៍អាស៊ីអាគ្នេយ៍ធ្វើឡើងកាលពីថ្ងៃទីអាទិត្យ។ លោកប្រកាសអោយគូទាំងពីប៉ះគ្នាម្ដងទៀត ដោយផ្អែកតាមអ្នកទាំងពីប្រកួតគ្នាបានស្វិតស្វាញតាំងពីទឹកទី១ រហូតដល់បញ្ចប់ទឹកទី៥។ យ៉ាងណាមិញ លោកថាអ្នកទំាងពីរក៏រាងព្រលែងដៃនៅទឹកចុងក្រោយបន្តិចដែរ ដែលអាចបណ្ដាលមកពីពួកគេអស់កម្លាំងរៀងខ្លួន ហើយលែងហ៊ានស្ទុះបំបុកគ្នាទៅវិញទៅមកដូចគ្នានឹង៤ទឹកដំបូង។

លោកថាកីឡាករថៃដ្បិតថាមិនធ្លាប់មានខ្សែក្រវាត់ តែគេល្អកណ្ដាប់ដៃ ហើយមានកម្ពស់ល្អជាង ទើបជំនួបប្រកួតជាមួយម្ចាស់ខ្សែក្រវាត់របស់កម្ពុជាធ្វើអោយកីឡាករកម្ពុជាពិបាកទប់។

លោកថាពួកគេប្រកួតគ្នាទាក់ទាញគឺ ដាច់ខាតត្រូវតែអោយប៉ះគ្នាឆាប់ បើទោះមិនទាន់ច្បាស់ថានឹងដាក់អោយប្រកួតថ្ងៃណា ដោយរង់ចាំអោយកីឡាករ មាស ច័ន្ទមាន និងកីឡាករថៃ Den Phechhit ទំនេរត្រូវគ្នាដើម្បីឈានដល់ការផ្គូរផ្គង៕

VOD
ដោយ លោក សុខ ឆាយ

ប៉ះជើងឯករងថៃ៦ជំនាន់ មាស ច័ន្ទមាន បានត្រឹមស្មើ

កម្ពុជាទទួលបានចំណាត់ថ្នាក់លេខ២នាព្រឹត្តិការណ៍ជើងឯកអាស៊ីអាគ្នេយ៍

ក្រោយប្រកួតប្រជែងអស់រយៈពេល២ថ្ងៃនៅលើទឹកដីខេត្តសៀមរាបក្រុមអត្តពលិកកីឡាវ៉ូវីណាមកម្ពុជាបានឈរចំណាត់ថ្នាក់លេខ២ក្នុងព្រឹត្តិការណ៍ជើងឯកអាស៊ីអាគ្នេយ៍ឆ្នាំ២០១៧ ក្រោយដណ្តើមបានមេដាយមាស៨ ប្រាក់៧ និងសំរឹទ្ធ១១។ កម្ពុជាបានឈរលើ៥ប្រទេសក្នុងចំណោម៧ប្រទេសដែលចូលរួមប្រកួតក្នុងព្រឹត្តិការណ៍នេះ។

ក្រុមអត្តពលិកកីឡាវ៉ូវីណាមកម្ពុជាក្រោយដណ្តើមបានមេដាយមាស៨ ប្រាក់៧ និងសំរឹទ្ធ១១ បានធ្វើឲ្យក្រុមម្ចាស់ផ្ទះកម្ពុជាមួយនេះឈរចំណាត់ថ្នាក់លេខ២ក្នុងព្រឹត្តិការណ៍ប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍ប្រចាំឆ្នាំ២០១៧។ ចំណែកវៀតណាមឈរចំណាត់ថ្នាក់លេខ១ក្រោយដណ្តើមបានមេដាយមាស១២ ប្រាក់១៣ និងសំរឹទ្ធ១ និងឡាវឈរចំណាត់ថ្នាក់លេខ៣ក្រោយដណ្តើមបានមាស៣ និងសំរឹទ្ធ១៥។

ដោយឡែក ប្រទេសមីយ៉ាន់ម៉ា ដណ្តើមបានមេដាយមាស២ និងសំរឹទ្ធ៣ រីឯសឥណ្ឌូនេស៊ី ឈ្នះមេដាយមាស១ និងសំរឹទ្ធ៤ ខណៈប្រទេសថៃ ទទួលបានមេដាយប្រាក់តែ១ប៉ុណ្ណោះ ចំណែកហ្វីលីពីន មិនដណ្តើមបានមេដាយពីការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៤នេះទេ។

ក្រុមអត្តពលិកកីឡាវ៉ូវីណាមកម្ពុជាក្រោយដណ្តើមបានមេដាយមាស៨ ប្រាក់៧ និងសំរឹទ្ធ១១ បានធ្វើឲ្យក្រុមម្ចាស់ផ្ទះកម្ពុជាមួយនេះឈរចំណាត់ថ្នាក់លេខ២ក្នុងព្រឹត្តិការណ៍ប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍ប្រចាំឆ្នាំ២០១៧។ ចំណែកវៀតណាមឈរចំណាត់ថ្នាក់លេខ១ក្រោយដណ្តើមបានមេដាយមាស១២ ប្រាក់១៣ និងសំរឹទ្ធ១ និងឡាវឈរចំណាត់ថ្នាក់លេខ៣ក្រោយដណ្តើមបានមាស៣ និងសំរឹទ្ធ១៥។

ដោយឡែក ប្រទេសមីយ៉ាន់ម៉ា ដណ្តើមបានមេដាយមាស២ និងសំរឹទ្ធ៣ រីឯសឥណ្ឌូនេស៊ី ឈ្នះមេដាយមាស១ និងសំរឹទ្ធ៤ ខណៈប្រទេសថៃ ទទួលបានមេដាយប្រាក់តែ១ប៉ុណ្ណោះ ចំណែកហ្វីលីពីន មិនដណ្តើមបានមេដាយពីការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៤នេះទេ។

ថ្មីៗ
អត្ថបទ : សឿន វណ្ណឌេត

កម្ពុជាទទួលបានចំណាត់ថ្នាក់លេខ២នាព្រឹត្តិការណ៍ជើងឯកអាស៊ីអាគ្នេយ៍

ក្លឹបជប៉ុន Fujieda ចុះកិច្ចសន្យាខ្ចីជើងកីឡាករឆ្នើមកម្ពុជា ចាន់ វឌ្ឍនាកា ១ឆ្នាំ តែមិនព្រមទម្លាយតម្លៃខ្លួន

(ភ្នំពេញ)៖ តំណាងក្លឹបបាល់ទាត់បឹងកេតអង្គរ របស់កម្ពុជា និងក្លឹប Fujieda MYFC របស់ប្រទេសជប៉ុន បានព្រម ព្រៀងចុះកិច្ចសន្យារយៈពេល ១ឆ្នាំជាលក្ខណៈខ្ចីជើង ដើម្បីផ្ទេរកីឡាករខ្សែប្រយុទ្ធវ័យក្មេង ចាន់ វឌ្ឍនាកា ទៅលេងនៅទឹកដីជប៉ុន ដោយមិនព្រមទម្លាយពីតម្លៃខ្លួនឡើយ។

ថ្លែងក្នុងសន្និសីទសារព័ត៌មានរួមគ្នាមួយកាលពីរសៀលថ្ងៃសុក្រ ទី១៣ ខែមករា ឆ្នាំ២០១៧ នៅសណ្ឋាគារភ្នំពេញ ដែលមានការចូលរួមពីសាម៉ីខ្លួន ចាន់ វឌ្ឍនាកា និងឪពុករបស់គេផងនោះ តំណាងក្លឹបទាំងពីរខាងលើមិនបានប្រាប់ពី តម្លៃពលកម្មដែលកីឡាករជំនាញជើងឆ្វេង កម្ពស់ ១,៧៣ម៉ែត្រ ចាន់ វឌ្ឍនាកា ក៏ដូចជាភាគីខាងក្លឹបបឹងកេតដែលមាន មូលដ្ឋាននៅខេត្តកំពង់ចាមទទួលបាននោះទេ ដោយគ្រាន់តែបង្ហើបប្រាប់ពីកិច្ចសន្យាខ្ចីជើងរយៈពេលខ្លី ១ឆ្នាំប៉ុណ្ណោះ។

ដូច្នេះ បញ្ហាតម្លៃខ្លួន ក៏ដូចជាប្រាក់ពលកម្មដែលជា Idol របស់អ្នកគាំទ្រកម្ពុជាគ្រប់រូប «បន្តស្ថិតក្នុងភាពអាថ៌កំបាំងដដែល» ព្រោះជារឿងដ៏ស្រួចស្រាលបំផុត ដែលគួរឲ្យចង់ដឹង ត្បិតកម្ពុជា ទើបតែបំបែកប្រវត្តិសាស្រ្ត ដែលមានកីឡាករទៅលេងនៅប្រទេសដែលរីកចំរើនខាងវិស័យបាល់ទាត់មួយនេះ។

តែបើកក្រឡេកទៅមើលការដោះដូរកីឡាករនៅលើពិភពលោក ជាពិសេសនៅតំបន់អឺរ៉ុប បើគេមិនបង្ហើបប្រាប់ពីតម្លៃនៃ ការផ្ទេរ ឬខ្ចីជើងនោះ យ៉ាងហោចណាស់ ក៏គេប្រាប់ពីប្រាក់កម្រៃប្រចាំសប្តាហ៍ ឬខែដែរ ព្រោះនេះជារឿងធម្មតាទៅ ហើយសម្រាប់កីឡាករគ្រប់រូប ទៅតាមជំនាញ និងសមត្ថភាពផ្ទាល់ដែលគេធ្វើបាននៅលើទីលាន ក៏ដូចជាស៊ុតបញ្ចូលទី ជាដើមនោះ។

សូមរំលឹកផងដែរថា កីឡាករវ័យទើបតែ ២២ឆ្នាំ មកពីខេត្តកំពត ចាន់ វឌ្ឍនាកា បានសាងកេរ្តិ៍ឈ្មោះល្បីរន្ទឺឡើង ចាប់តាំងពីឆ្នាំ២០១០ និងបានចូលលេងក្នុងក្រុមជម្រើសជាតិឈុតតូច U-19 និង U-23 រហូតដល់ក្រុមជម្រើសជាតិ គោព្រៃនាពេលបច្ចុប្បន្ន ដែលបានជួយឲ្យជម្រើសជាតិកម្ពុជាឡើងដល់ជុំទី២ នៃវគ្គជម្រុះ World Cup 2018 និងវគ្គចែកពូលជុំផ្តាច់ព្រ័ត្រនៃពានរង្វាន់អាស៊ាន AFF Suzuki Cup 2016 ដែលទើបបញ្ចប់ទៅថ្មីៗនេះ និងធ្វើក្លឹបនៅ អាស៊ី ជាពិសេសក្លឹបមកពីប្រទេសថៃ ម៉ាឡេស៊ី សិង្ហបុរី និងជប៉ុនចង់បាន ដើម្បីយកទៅពង្រឹងក្លឹបរបស់គេ។

ចាប់ពីថ្ងៃនេះតទៅ កីឡាករជំនាញជើងឆ្វេង ចាន់ វឌ្ឍនាកា បានក្លាយជាកីឡាករបរទេសតែម្នាក់គត់នៃក្លឹបលេង ក្នុងលីគលំដាប់ទី៣ របស់ជប៉ុន Japan-J League 3 និងជាកីឡាករលេងក្នុងតំណែងខ្សែប្រយុទ្ធទី៦ ក្នុងចំណោម កីឡាករសរុប ២៨នាក់របស់ក្លឹបអាជីព Fujieda MYFC៕

Fresh News

ក្លឹបជប៉ុន Fujieda ចុះកិច្ចសន្យាខ្ចីជើងកីឡាករឆ្នើមកម្ពុជា ចាន់ វឌ្ឍនាកា ១ឆ្នាំ តែមិនព្រមទម្លាយតម្លៃខ្លួន

ក្រុមជម្រើសជាតិកម្ពុជា ប៉ះក្រុមខ្លាំងអារ៉ាប់ប៊ីសាអូឌីត ម៉ោង ១០យប់នេះ ក្នុងមិត្តភាព ដោយអវត្តមានកីឡាករឆ្នើម ឈិន ឈឿន, ប្រាក់ មុន្នីឧត្តម និង ចាន់ វឌ្ឍនាកា

(ភ្នំពេញ)៖ ក្រុមបាល់ទាត់ជម្រើសជាតិកម្ពុជា ដែលមានរហស្សនាមថា «គោព្រៃ» នឹងជួបក្រុមខ្លាំងក្នុងតំបន់អាស៊ី អារ៉ាប់ប៊ីសាអូឌី (Saudi Arabia) នៅម៉ោង ១០យប់នេះ (ម៉ោងនៅកម្ពុជា) ក្នុងជំនួបមិត្តភាពអន្ដរជាតិ ដែលនឹងធ្វើឡើងនៅពហុកីឡដ្ឋាន Zayed Sports City លើទឹកដីកណ្ដាលនៃប្រទេសអារ៉ាប់រួម (AUE) ដោយពុំមានវត្តមានកីឡាករឆ្នើមៗ ឈិន ឈឿន, ប្រាក់ មុន្នីឧត្តម និង ចាន់ វឌ្ឍនាកា។

បើតាមសំដីរបស់អ្នកចាត់ទូទៅក្រុមជម្រើសជាតិកម្ពុជា បានថ្លែងក្នុងឱកាសកំពុងហ្វឹកហាត់កាលពី ២ថ្ងៃមុនបានឲ្យដឹង ថា កីឡាករជួរមុខទាំង៣នាក់នោះ មិនបានរួមដំណើរទៅប្រទេសដែលស្ថិតនៅតំបន់អាស៊ីបូព៌ា ដើម្បីធ្វើការប្រកួតមិត្ត ភាពជាលក្ខណៈអន្តរជាតិនោះឡើយ ដោយបានបញ្ជាក់យ៉ាងច្បាស់ថា ឈិន ឈឿន កំពុងមានជំងឺ គ្រាដែលមិត្តរួម ក្រុម ប្រាក់ មុន្នីឧត្តម ជិតដល់ថ្ងៃចូលរោងការ និង ចាន់ វឌ្ឍនាកា វិញ ត្រូវបានក្លឹបមកពីជប៉ុន Fujieda MYFC ខ្ចីជើង រយៈពេល ១ឆ្នាំ (ឆ្នាំ២០១៧)។

នេះជាការប្រកួតបើកទំព័រដើមឆ្នាំថ្មី ហើយក៏ជាជំនួបប្រវត្តិសាស្ដ្រលើកទី១ផងដែរ ដែលក្រុមគោព្រៃកម្ពុជា មានឱកាសសាកថ្វី ជើងជាមួយក្រុមអារ៉ាប់ប៊ីសាអូឌីត ដែលកំពុងឈរចំណាត់ថ្នាក់លេខ៤៨ លើពិភពលោក និងឈរចំណាត់ថ្នាក់លេខ៥ ក្នុងទ្វីបអាស៊ី ដើម្បីទទួលបាននូវបទពិសោធន៍ថ្មីមួយទៀតពីការប្រកួតនេះ។

ប៉ុន្ដែមុនការប្រកួតចាប់ផ្ដើម គ្រូបង្វឹកក្រុមគោព្រៃកម្ពុជា លោក Lee Tae Hoon បានបង្ហើបពីក្ដីបារម្ភមួយចំនួន ជុំវិញកូនក្រុមរបស់ខ្លួន និងការប្រមូលផ្ដុំ ដែលមានរយៈពេលខ្លី ដែលជាបញ្ហាដ៏ពិបាកក្នុងការត្រៀមទប់ទល់ជាមួយ ក្រុមអារ៉ាប់ប៊ីសាអូឌីត។ តែយ៉ាងណាគ្រូបង្វឹកជនជាតិកូរ៉េខាងត្បូងរូបនេះ នៅតែប្ដេជ្ញាធ្វើឲ្យបានល្អបំផុត ដើម្បីកិត្តិយសប្រទេសជាតិកម្ពុជា៕

Fresh News

ក្រុមជម្រើសជាតិកម្ពុជា ប៉ះក្រុមខ្លាំងអារ៉ាប់ប៊ីសាអូឌីត ម៉ោង ១០យប់នេះ ក្នុងមិត្តភាព ដោយអវត្តមានកីឡាករឆ្នើម ឈិន ឈឿន, ប្រាក់ មុន្នីឧត្តម និង ចាន់ វឌ្ឍនាកា

ក្លឹបដ៏ល្បីមួយនៅជប៉ុន អាចនឹងទិញកីឡាករជើងខ្លាំងរបស់កម្ពុជា ចាន់ វឌ្ឍនាកា ?

(ភ្នំពេញ)៖ ក្លឹបលេងនៅលីគលំដាប់ទី៣ របស់ប្រទេសជប៉ុន Fujieda MYFC អាចនឹងប្រកាសទិញយកកីឡាករបាល់ទាត់ដ៏ល្បីរបស់កម្ពុជា ចាន់ វឌ្ឍនាកា នៅក្នុងសន្និសីទសារព័ត៌មាននៅចន្លោះម៉ោង ៣-៤ រសៀលថ្ងៃទី១៣ ខែមករា ឆ្នាំ២០១៧ស្អែកនេះនៅសណ្ឋាគារភ្នំពេញ រវាងក្លឹបបឹងកេតអង្គររបស់កម្ពុជា និងតំណាងក្លឹប Fujieda របស់ជប៉ុន។

ជុំវិញព័ត៌មានស្រពេចស្រពិលរបស់អ្នកគាំទ្រអំពីជោគវាសនារបស់ខ្សែប្រយុទ្ធ ចាន់ វឌ្ឍនាកា ជាមួយក្លឹបបឹងកេតអង្គរ នឹងត្រូវលាតត្រដាងនៅថ្ងៃទី១៣ ខែមករា ឆ្នាំ២០១៧ស្អែកនេះ។ ចាំមើល តើកីឡាករដែលមានស្រុកកំណើតមកពីខេត្តកំពតរូបនេះ នឹងត្រូវបន្ដរួមរស់ជាមួយក្លឹបជើងឯកលីគកំពូលកម្ពុជា ២ជំនាន់នេះ ឬត្រូវចាកចេញទៅបន្ដអាជីពនៅក្រៅប្រទេស?

ប្រភពព័ត៌មានពីថ្នាក់ដឹកនាំក្លឹបបឹងកេតអង្គរបានឲ្យដឹងថា នៅវេលាម៉ោង ៣-៤រសៀលថ្ងៃទី១៣ ខែមករាស្អែកនេះ ក្លឹបនឹងធ្វើសន្និសីទសារព័ត៌មានមួយ នៅសណ្ឋាគារភ្នំពេញ ដើម្បីបង្ហាញពីការពិតជុំវិញការវិវត្តន៍រឿងអនាគតកីឡាករវ័យ២៤ឆ្នាំ ចាន់ វឌ្ឍនាកា ជាមួយនឹងក្លឹប។ ប្រភពច្បាស់ការដដែលបន្ដថា នៅថ្ងៃស្អែកនេះ អ្នកគាំទ្រគ្រប់គ្នានឹងដឹងថា ខ្សែប្រយុទ្ធក្នុងក្រុមជម្រើសជាតិគោព្រៃកម្ពុជារូបនេះ ត្រូវបន្ដនៅបឹងកេត ឬត្រូវចេញទៅជប៉ុន ថៃ សិង្ហបុរី ឬម៉ាឡេស៊ី? ព្រោះក្លឹបនៃប្រទេសទាំង៤នេះ លេចលឺថា មានបំណងចង់ទិញកីឡាករ ចាន់ វឌ្ឍនាកា។

នេះគឺជាដំណឹងគួរឲ្យភ្ញាក់ផ្អើលមួយ និងជាប្រវត្តិសាស្រ្តផងដែរសម្រាប់កីឡាករបាល់ទាត់កម្ពុជា ខណៈដែលអ្នកគាំទ្រកម្ពុជាកំពុងចង់ដឹង។ ប៉ុន្ដែយ៉ាងណាមានប្រភពជិតស្និទ្ធជាមួយសាម៉ីខ្លួន ចាន់ វឌ្ឍនាកា ផ្ទាល់បានអះអាងថា រដូវកាលថ្មីនេះ វឌ្ឍនាកា នឹងមិនលេងនៅលីគកំពូលកម្ពុជានោះទេ ដែលបញ្ជាក់ឲ្យឃើញថា គេនឹងចាកចេញពីបឹងកេត។ ប៉ុន្ដែនេះគ្រាន់តែជាការលើកឡើងរបស់អ្នកដទៃប៉ុណ្ណោះ តែការពិតយ៉ាងណានឹងដឹងច្បាស់នៅថ្ងៃស្អែក។

តែយ៉ាងណាមិញ តំណាងក្លឹបបឹងកេត ដែលមានមូលដ្ឋានក្នុងខេត្តកំពង់ចាមរបស់កម្ពុជា និងតំណាងក្លឹបមកពីជប៉ុន Fujieda មិនទាន់បានបង្ហើបពីតម្លៃខ្លួន ក៏ដូចជាកិច្ចសន្យារបស់កីឡាករវ័យក្មេងជំនាញជើងឆ្វេង ចាន់ វឌ្ឍនាកា នៅឡើយទេ ដោយដឹងច្បាស់នៅរសៀលថ្ងៃស្អែកនេះ។

សូមរំលឹកផងដែរថា កាលពីយប់ថ្ងៃទី៣១ ខែតុលា ឆ្នាំ២០១៦ កន្លងទៅថ្មីៗនេះ ចាន់ វឌ្ឍនាកា និងរួមជាមួយលោក បែ មករា អ្នកចាត់ការទូទៅក្លឹបបឹងកេតអង្គរ បានធ្វើដំណើរទៅទស្សនកិច្ចក្លឹប Fujieda រយៈពេល១សប្តាហ៍ ដើម្បីសិក្សាពីការហ្វឹកហាត់ ក៏ដូចជាសិក្សាពីគម្រោងទិញ-ដូរកីឡាករផងដែរ៕

Fresh News

ក្លឹបដ៏ល្បីមួយនៅជប៉ុន អាចនឹងទិញកីឡាករជើងខ្លាំងរបស់កម្ពុជា ចាន់ វឌ្ឍនាកា ?

សហព័ន្ធកីឡាទូកក្ដោងកម្ពុជា គណៈប្រតិភូកីឡាករ ទៅចូលរួមប្រកួតកីឡាទូកក្ដោងលើកទី៣៦ នៅប្រទេសសិង្ហបុរី

(ភ្នំពេញ)៖ ឆ្លើយតបតាមការអញ្ជើញរបស់សហព័ន្ធកីឡាទូកក្តោង របស់ប្រទេសសិង្ហបុរី សហព័ន្ធកីឡាទូកក្តោងកម្ពុជា បានបញ្ជូនគណៈប្រតិភូកីឡាករមួយ ដឹកនាំដោយលោក ថោង រដ្ឋស័ក្កិ អនុប្រធានសហព័ន្ធ ទៅចូលរួមប្រកូតកីឡាទូកក្តោង 36th Singapore Open Windsurfing Championship ដែលធ្វើឡើងនៅប្រទេសសិង្ហបុរី ចាប់ពីថ្ងៃទី១១ ដល់ថ្ងៃទី១៥ ខែមករា ឆ្នាំ២០១៧ខាងមុខនេះ ជាលក្ខណៈអន្តរជាតិ ដែលមានកីឡាករចូលរួមចំនួន១០០រូប មកពីបណ្តាប្រទេសផ្សេងៗ នៅលើពិភពលោក។

កីឡាករកម្ពុជា សហព័ន្ធបានបញ្ជូនទៅ២រូបនោះ ទី១៖ឈ្មោះ ហៀង ស៊ុនហេង ភេទប្រុស អាយុ១៤ឆ្នាំ និងទី២៖ឈ្មោះ សូត្រ មេសា ភេទប្រុស អាយុ១៤ឆ្នាំ ហើយនេះគឺជាលើកដំបូងរបស់សហព័ន្ធកីឡាទូកក្តោងកម្ពុជា ដែលបានបញ្ជូនកីឡាករ ទៅចូលរួមប្រកួតជាលក្ខណៈអន្តរជាតិ។

ជាមួយគ្នានោះ សហព័ន្ធកីឡាទូកក្តោងកម្ពុជា ក៏បានបញ្ជូនកីឡាករមួយរូបទៀតដែលមានឈ្មោះ ឌុច ប៊ុនធឿន ទៅចូលរួមប្រកួតទូកក្តោងប្រភេទ Laser 470 នៅប្រទេសសិង្ហបុរី នោះផងដែ។

សូមបញ្ជាក់ថា សហព័ន្ធកីឡាទូកក្តោងកម្ពុជា ចាប់តាំងពីពេលកកើតនៅថ្ងៃទី១៥ ខែសីហា ឆ្នាំ២០១៥ រហូតពេលនេះមានអាយុត្រឹមតែ១ឆ្នាំ ៤ខែតែប៉ុណ្ណោះ ប៉ុន្តែសហព័ន្ធទទួលបានលទ្ធផលល្អគួរឲ្យកត់សំគាល់។ កន្លងមកសហព័ន្ធកីឡាទូកក្តោងកម្ពុជា ធ្លាប់បានបញ្ជូនកីឡាករទៅហ្វឹកហាត់ ផ្លាស់ប្តូរបទពិសោធន៍ជាមួយកីឡាករជម្រើសជាតិរបស់ ប្រទេសថៃនៅ ទីក្រុងប៉ាតាយា ប្រទេសថៃរយៈពេល២សប្តាហ៌ផងដែរ៕

Fresh News

សហព័ន្ធកីឡាទូកក្ដោងកម្ពុជា គណៈប្រតិភូកីឡាករ ទៅចូលរួមប្រកួតកីឡាទូកក្ដោងលើកទី៣៦ នៅប្រទេសសិង្ហបុរី

Buriram ថៃបន្តគ្រងជើងឯកពានរង្វាន់ Toyota Mekong Club 2016

ក្រុមការពារតំណែងជើងឯកថៃ Buriram United បានបន្តគ្រងជើងឯកពានរង្វាន់ Toyota Mekong Club Championship ប្រចាំឆ្នាំ២០១៦ ក្រោយបំបាក់ក្រុមម្ចាស់ជើងឯករបស់ឡាវ Lanexang United ក្នុងលទ្ធផល ២-០ ក្នុងវគ្គផ្តាច់ព្រ័ត្រជើងទី២ នៅកីឡដ្ឋាន Thammasat កាលពីយប់ថ្ងៃទី៨ ខែមករា ម្សិលមិញ។

នាការប្រកួតវគ្គផ្តាច់ព្រ័ត្រជើងទី២នៅកីឡដ្ឋាន Thammasat កាលពីថ្ងៃទី៨ ខែមករា ម្សិលមិញ កីឡាករ Diogo Luis Santo បានរកគ្រាប់បាល់នាំមុខដោយទាត់បាល់ពិន័យ១១ម៉ែត្រឲ្យក្រុម Buriram United នៅនាទី៣៨ មុនកីឡាករ Ko Seul Ki សម្រេចគ្រាប់ទី២ដែលជាគ្រាប់បាល់ជ័យជម្នះលើក្រុមក្រុម Lanexagn United ២-០ នៅនាទី៥១។

ជ័យជម្នះនេះ បានធ្វើឲ្យក្រុមការពារតំណែងជើងឯកថៃ Buriram United បន្តគ្រងតំណែងជើងឯកពានរង្វាន់ Toyota Mekong Club Championship ប្រចាំឆ្នាំ២០១៦។ រីឯក្រុមជើងឯកឡាវ Lanexang United ក្រោយឈ្នះ(១-០) ១ជើង និងចាញ់(២-០) ១ជើងទទួលបានចំណាត់ថ្នាក់លេខ២ ខណៈក្រុមជើងឯករង បឹងកេតអង្គរ ទទួលបានចំណាត់ថ្នាក់លេខ៣។

សម្រាប់ពានរង្វាន់ ក្រុមជើងឯកថៃ Buriram United ទទួលបានប្រាក់រង្វាន់លើកទឹកចិត្តចំនួន៧៥,០០០ដុល្លារ រីឯកក្រុមជើងឯករងឡាវ Lanexang United បាន៥ម៉ឺនដុល្លារ។ ចំណែកក្រុមលេខ៣ បឹងកេតអង្គរ ៣ម៉ឺនដុល្លារ ខណៈលេខ៤ មីយ៉ាន់ម៉ា ទទួលបាន១៥,០០០ដុល្លារ៕

ថ្មីៗ
អត្ថបទ : សឿន វណ្ណឌេត

Buriram ថៃបន្តគ្រងជើងឯកពានរង្វាន់ Toyota Mekong Club 2016

ផាន់ គ្រាន់ និយាយរឿងឡើងទម្ងន់ខ្លាំង

កីឡាករជើងខ្លាំងលោក ផាន់ គ្រាន់ (សុខ ឆាយ)

ការប្រកួតដែលបានធ្វើឡើងកាលពីថ្ងៃទី៨ មករា គេសម្គាល់កីឡាករជើងខ្លាំងលោក ផាន់ គ្រាន់ មានការធ្លាក់ដៃយ៉ាងខ្លាំង ដោយសារតែលោកបណ្ដោយខ្លួនអោយឡើងគីឡូខ្លាំង។ នេះជាការប្រែប្រួលមួយដែលគួរអោយចាប់អារម្មណ៍ បន្ទាប់ពីទម្ងន់ខ្លួនរបស់ខ្លួនបង្កផលប៉ះពាល់ដល់សមត្ថភាពការប្រកួតរបស់ខ្លួន រហូតធ្វើអោយអ្នកគាំទ្រខកចិត្តដដែលជាដដែល។

កីឡាករ ផាន់ គ្រាន់ សារភាពក្រោយប្រកួតចាញ់កីឡាករថៃដោយពិន្ទុនៅសង្វៀនទូរទស្សន៍អាស៊ីអាគ្នេយ៍ថា លោកពិតជាស្ទក់ដៃជើងនិងឆាប់ហត់ប្លែក បន្ទាប់ពីលោកបណ្ដោយខ្លួនអោយឡើងគីឡូខ្លាំងខុសពីមុន។ ការបណ្ដោយខ្លួនអោយឡើងគីឡូខ្លាំង លោកថាមានការប៉ះពាល់ចំពោះសមត្ថភាពប្រកួត បន្ទាប់ពីលោកហ្វឹកហាត់មិនបានជាប់លាប់ ដែលជាឥទ្ធិពលបណ្ដាលមកពីធាត់បែកសាច់និងឡើងទម្ងន់ខ្លួនរហូតដល់ជាង៦៩គីឡូក្រាមនាពេលនេះ។

លោកថា គីឡូដើមរបស់លោក គឺត្រឹមតែជាង៥០គីឡូក្រាមប៉ុណ្ណោះ តែក្រោយមកលោកក៏បានវិវត្តន៍ទៅប្រកួតប្រភេទទម្ងន់៦៣គីឡូក្រាមដើម្បីបានឡើងប្រកួតដណ្ដើមខ្សែក្រវាត់នៅលើសង្វៀនទូរទស្សន៍ ជាពិសេសការប្រកួតក្នុងប្រភេទទម្ងន់៦៣,៥គីឡូក្រាម។

លោកថាហេតុផលក្នុងក្លឹបដែលលោកហ្វឹកហាត់ មិនសូវមានឧបករណ៍ហ្វឹកហាត់ ក៏ជាហេតុធ្វើអោយលោកមិនសូវចង់ហ្វឹកហាត់ផងដែរ ទើបលោកចេះតែប្រហែសខ្លួនបណ្ដោយអោយធាត់ ហើយបណ្ដាលអោយប៉ះពាល់ដល់សមត្ថភាពប្រកួតក្រោយពេលបែកសាច់។

លោកថាកីឡាករប្រដាល់ ខុសពីអាជីពផ្សេងទៀត ពោលគឺអោយតែភ្លាត់ឡើងទម្ងន់នោះប៉ះពាល់ភ្លាម ដោយសារតែពេលបែកសាច់គឺសរសៃសសូងមានភាពស្ពឹកស្រពន់លែងសូវរស់រវើក។

លោកថាបើទោះជាបានប្រតិបត្តិសកម្មភាពហ្វឹកហាត់ដូចគ្នានឹងមុនពេលឡើងរេញមុនៗក៏នៅតែមិនសូវរស់រវើក ដូចមុនដែលលោកមិនទាន់បែកសាច់។

លោកថាហេតុផលផ្ទះឆ្ងាយពីក្លឹបដែលលោកហ្វឹកហាត់ ក៏ជាហេតុផលធ្វើឡើងលោកមិនសូវចង់ហ្វឹកហាត់ជាប់លាប់ផងដែរ ទើបគីឡូរបស់លោកចេះតែឡើងគីឡូក្រោយទប់មិនជាប់។

ក្នុងនោះបញ្ហាផ្គូរផ្គងមិនសូវបានច្រើនដូចមុនក្នុងមួយខែៗ ក៏ជាមូលហេតុធ្វើអោយលោកមិនសូវប្រយ័ត្នប្រយែងរឿងរក្សាទម្ងន់ខ្លួន។

លោកនិយាយថា៖ «រយៈពេលមួយឆ្នាំហ្នឹង ក្លឹបដែលខ្ញុំហ្វឹកហាត់អត់សូវមានអីហាត់ ហើយផ្គូរផ្គងក៏មិនសូវច្រើន ទើបចេះតែបណ្ដោយៗចឹងទៅ តែលូវអត់ទុកចឹង ព្រោះប៉ះពាល់ច្រើនណាស់!»។

លោកសារភាពថាដៃជើងចាប់ផ្ដើមស្ពឹកៗនិងមានសភាពឆាប់ហត់ បន្ទាប់ពីលោកបណ្ដោយអោយឡើងគីឡូក្នុងពេលហ្វឹកហាត់មិនសូវជាប់លាប់ស្របគ្នា។

លោកប្រកាសស្វែងរកទីតាំងហ្វឹកហាត់នៅក្នុងក្លឹបដែលល្អជាងក្លឹបចាស់ ដើម្បីកែខៃសមត្ថភាពចុះខ្សោយអោយផុតពីការរិះគន់ បន្ទាប់ពីការប្រកួតនៅលើសង្វៀនកាលពីថ្ងៃទី៨ មករា ទទួលបរាជ័យ។

លោកនិយាយថា៖ «ចាំមើលខ្ញុំដូរក្លឹប ព្រោះក្លឹបខ្ញុំហាត់រាល់ថ្ងៃខ្វះខាតសម្ភារៈ ទើបចេះតែខ្ជិល!»។

លោកប្រកាសសម្រកទម្ងន់អោយនៅត្រឹម៦៤គីឡូក្រាមក្នុងពេលខាងមុខ ដោយលោកបញ្ជាក់ថាមិនអាចបណ្ដាលទម្ងន់ខ្លួននៅតែធាត់បែបហ្នឹងបានទេ។

យ៉ាងណាលោកក៏សម្ដែងក្ដីបារម្ភរឿងសម្រកទម្ងន់មិនបានដូចការគ្រោងទុក ដោយសារតែលោកយល់ថាក្នុងរយៈពេលចុងក្រោយ បើទោះជាលោកមិនសូវហូបច្រើននិងមិនសូវផឹក ក៏នៅតែធាត់បែកសាច់។ លោកនិយាយថាតាំងពីធាត់ខ្លាំងមក ការប្រកួតលែងមានលំនឹងដូចមុនទៀតហើយ ជាពិសេសនៅពេលដៃជើងកក៏ស្ទក់ ហើយនៅពេលសម្រុកខ្លាំងក៏ឆាប់ហត់ប្លែក មិនខុសពីបញ្ជាដៃជើងលែងសូវបាន។

យោងតាមការប្រកួតដែលបានធ្វើឡើងកីឡាករ ផាន់ គ្រាន់ ដែលជាកីឡាករល្បីម្នាក់ត្រូវបានកីឡាករថៃឈ្មោះPhath Say Fa វាយត្រូវខ្ចប់ៗ បើទោះជាកីឡាករកម្ពុជាបញ្ចេញថ្វីដៃមិនសូវទំនេរ។

លោក ញាណ សុធី អ្នករៀបចំព្រឹត្តិការប្រដាល់ប្រចាំនៅទូរទស្សន៍អាស៊ីអាគ្នេយ៍ បានអះអាងថាធៀបនឹងការប្រកួតមុនៗ កីឡាករ ផាន់ គ្រាន់ ធ្លាក់ដៃខុសប្លែក ជាពិសេសបន្ទាប់ពីកីឡាករកម្ពុជារូបនេះឡើងទម្ងន់។ លោកថាកីឡាករ ផាន់ គ្រាន់ ធ្លាប់តែប្រកួតក្នុងប្រភេទទម្ងន់ក្រោម៦៥គីឡូក្រាម ចឹងហើយទើបក្រោយពេលឡើងប្រកួតក្នុងប្រភេទ៦៩គីឡូក្រាម ទើបមានការប្រែប្រួលសមត្ថភាព។

លោកថាការប្រកួតរបស់ ផាន់ គ្រាន់ ចាប់ផ្ដើមបាត់ភាពទាក់ទាញ ដោយលោកប្រកាសថាតាំងពីទូរទស្សន៍អាស៊ីអាគ្នេយ៍ប៉ុន្មានលើកចុងក្រោយ គឺចាញ់ច្រើនជាងឈ្នះ។ លោកបានថ្លែងថា លោកកំណត់អោយ ផាន់ គ្រាន់ សម្រកទម្ងន់ ដ្បិតថាបើលោកនៅតែទុកខ្លួនអោយធាត់បែបនោះ គឺគណៈកម្មការទូរទស្សន៍អាស៊ីអាគ្នេយ៍នឹងផ្អាកផ្គូរផ្គងអោយលោកឡើងប្រកួត។

លោកនិយាយថា៖ «ផាន់ គ្រាន់ ប្រកួតអត់ល្អសោះតាំងឡើងគីឡូ តែមុនខ្ញុំអោយស្រកចឹង បើនៅតែចឹងអត់ផ្គូរផ្គងទេ ខ្ញុំអោយសម្រកព្រោះស្ដាយវាវ៉ៃល្អ!»។

កីឡាករ ផាន់ គ្រាន់ ក៏បានបង្ហាញជំហរសម្រកទម្ងន់អោយខានតែបាន ដោយសារតែលោកក៏មិនចង់បាត់បង់អាជីពប្រដាល់ដោយសារឡើងគីឡូនោះដែរ៕

VOD
ដោយ លោក សុខ ឆាយ

ផាន់ គ្រាន់ និយាយរឿងឡើងទម្ងន់ខ្លាំង

ក្រុមកីឡាករអត្តពលកម្ម ជាប់ចំណាត់ថ្នាក់លេខ១ ក្នុងព្រឹត្តិការណ៍ប្រកួតកីឡាកងទ័ព

ក្រោយធ្វើការប្រកួតយ៉ាងស្វិតស្វាញនៅសាលមហោស្រពកោះពេជ្រនៅថ្ងៃទី៨ ខែមករា ក្រុមកីឡាករអត្តពលកម្មបានក្លាយជាម្ចាស់ជើងឯកលើប្រភេទវិញ្ញាសាទី២(សម្រាប់មហាជន) ប្រចាំព្រឹត្តិការណ៍ប្រកួតកីឡាកងយោធពលខេមរភូមិន្ទប្រចាំឆ្នាំ២០១៧ ដែលធ្វើឡើងដើម្បីអបអរខួបលើកទី៣៨នៃជ័យជម្នះ៧មករា។ ចំណែកក្រុមកីឡាករមកពីនាយទាហ៊ានសកម្មជាម្ចាស់ជើងឯកលើប្រភេទវិញ្ញាសាទី១(សម្រាប់កងទ័ព)។

ក្រុមកីឡាករអត្តពលកម្មបានក្លាយជាម្ចាស់ជើឯប្រចាំព្រឹត្តិការណ៍ប្រកួតកីឡាកងយោធពលខេមរភូមិន្ទប្រចាំឆ្នាំ២០១៧ លើវិញ្ញាសាប្រភេទទី២(សម្រាប់មហាជន) គឺរត់កុម្មង់ដូ ៣ គីឡូម៉ែត្រ, សែងហ្វ្រង់កា ទម្ងន់៥០គីឡូក្រាមរត់ចម្ងាយ១គីឡូម៉ែត្រ និងឆ្លងឧបសគ្គ។ រីឯក្រុមគុរសិស្សក្លាហាន១ទទួលបានចំណាត់ថ្នាក់លេខ២ ខណៈលេខ៣បានទៅក្រុមសាមគ្គី០០១(NDU)។

កីឡាការិនី ហេង ម៉ីជូ សមាជិកម្នាក់ក្នុងចំណោម២០នាក់របស់ក្រុមអត្តពលកម្មបានបញ្ជាក់ថា ខ្លួននិងសមាជិកក្រុមទាំងអស់បានសម្តែងការអបអរចំពោះលទ្ធផល និងមានអារម្មណ៍រំភើបសប្បាយរីករាយយ៉ាងខ្លាំងដែលបានចូលរួមប្រកួតកីឡាកងទ័ព។ ហើយ នាង បានបញ្ជាក់ថា ការប្រកួតនេះមានការលំបាកជាងការប្រកួតដែលរូបគេបានឆ្លងកាត់នាពេលកន្លងមក។

ទោះបីការប្រកួតនេះមានស្ថានភាពលំបាក ប៉ុន្តែកីឡាការិនី ហេង ម៉ីជូ យល់ថា វាជាព្រឹត្តិការណ៍ប្រកួតមួយដ៏ល្អសម្រាប់កីឡាករក្នុងការអភិវឌ្ឍន៍សមត្ថភាព ព្រោះកីឡាករទទួលបានបទពិសោធន៍ និងបច្ចេកទេសល្អៗ ជាពិសេសសាមគ្គីភាព។ ម្យ៉ាងទៀត វាធ្វើឲ្យកីឡាករមានភាពអំណត់ តស៊ូ និងចេះអត់ធ្មត់ ហើយពួកគេបានបញ្ចេញអស់ពីសមត្ថភាពសម្រាប់ការប្រកួតមួយនេះ។

ចំណែកក្រុមនាយទាហ៊ានសកម្មបានក្លាយជាម្ចាស់ជើងឯកលើវិញ្ញាសាប្រភេទទី១(សម្រាប់កងទ័ព) គឺរត់កម្មង់ដូ៤គីឡូម៉ែត្រ សែងហ្វ្រង់កាទម្ងន់៥០គីឡូក្រាមរត់ចម្ងាយ១,៥គីឡូម៉ែត្រ និងឆ្លងឧបសគ្គ។ រីឯក្រុមកងពលតូចពិសេសឆ័ត្រយោង៩១១ទទួលបានចំណាត់ថ្នាក់លេខ២ ខណៈលេខ៣បានទៅក្រុមកងពលតូចកាពារឆ្នេរកោះ៣១។

គួរបញ្ជាក់ថា ក្រោយប្រកួតអស់រយៈពេលជិតមួយថ្ងៃការប្រកួតកីឡាកងយោធពលខេមរភូមិន្ទដែលធ្វើឡើងដើម្បីអបអរទិវាជ័យជម្នះ៧មករា បានបញ្ចប់យ៉ាងជោគជ័យនៅថ្ងៃរសៀលថ្ងៃទី៨ ខែមករា នេះ។ ព្រឹត្តិការណ៍មានមានចូលរួមចំនួន៣៤ក្រុម ដែលមានអត្តពលិកប្រមាណជាជាង៦នាក់ ដែលមកពីតាមបណ្តាអង្គការ ក្រុមហ៊ុន ស្ថានប័ន និងអង្គភាពផ្សេងៗ៕

ថ្មីៗ
អត្ថបទ : សឿន វណ្ណឌេត

ក្រុមកីឡាករអត្តពលកម្ម ជាប់ចំណាត់ថ្នាក់លេខ១ ក្នុងព្រឹត្តិការណ៍ប្រកួតកីឡាកងទ័ព

បើកការប្រកួតកីឡាកងយោធពលខេមរភូមិន្ទជាផ្លូវការ

ភ្នំពេញ ៖ រហូតមកដល់ម៉ោង៨ និង៥០នាទីព្រឹកថ្ងៃទី០៨ ខែមករា ឆ្នាំ២០១៧នេះ ការប្រកួតកីឡាកងយោធពលខេមរភូមិន្ទ បានចាប់ផ្តើមក្រោមអធិបតីភាពលោក ថោង ខុន ប្រធានគណៈកម្មាធិការជាតិអូឡាំពិកកម្ពុជា និងលោកឧត្តមសេនីយ៍ ហ៊ុន ម៉ាណែត ដោយមានការចូលរួមពីស្ថាប័នពាក់ព័ន្ធជាច្រើន។

មានមតិចូលរួមក្នុងពិធីនោះ លោកថោង ខុន បានលើកឡើងថា សកម្មភាពនៃការប្រកួតនេះ គឺដើម្បីសុខសន្តិភាពរបស់ប្រជាជន និងបុព្វហេតុជាតិ។ តាមលោក ថោង ខុន បើគ្មានការដឹកនាំដ៏ត្រឹមត្រូវ និងអង់អាចក្លាហានរបស់គណបក្សប្រជាជនកម្ពុជានោះទេ ពិតជាមិនអាចយកជ័យជម្នះលើពួកប៉ុល ពតបានឡើយ ហើយបើគ្មានការដឹកនាំដ៏ត្រឹមត្រូវប្រកបដោយឆន្ទៈមោះមុត អង់អាចរបស់គណបក្សប្រជាជនកម្ពុជាទេ និងគ្មានពលកម្មដ៏ធំធេងរបស់អតីតយុទ្ធជនទេ ពិតជាមិនអាចយកជ័យជម្នះលើរបបប្រល័យពូជសាសន៍ ប៉ុល ពត និងពុំអាចមានថ្ងៃ៧មករា ជាថ្ងៃកំណើតទី២ របស់យើងទាំងអស់គ្នាផងដែរ។ លោកបានបន្តថា ក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យកម្ពុជារស់នៅក្នុងសន្តិភាព មានការអភិវឌ្ឍលើគ្រប់វិស័យ ក្នុងនោះវិស័យកីឡា ត្រូវបានរាជរដ្ឋាភិបាល ពិសេសសម្តេចនាយករដ្ឋមន្ត្រី យកចិត្តទុកដាក់ខ្ពស់ក្នុងការជំរុញ និងឧបត្ថម្ភគាំទ្រឲ្យមានការរីកចម្រើន មានការទាក់ទាញគាំទ្រពីយុវជន ពីមហាជនយ៉ាងផុលផុស និងតែងតែដណ្តើមបានជយលាភីលើឆាកជាតិ និងអន្តរជាតិ។

លោកថោង ខុន បានបញ្ជាក់ថា លទ្ធផល និងសមិទ្ធផលដ៏ធំធេងលើវិស័យកីឡាជាតិនេះ ទើបគណៈកម្មការអូឡាំពិកអន្តរជាតិ បានវាយតម្លៃយ៉ាងច្បាស់លាស់ក្នុងការសម្រេចប្រគល់ពានរង្វាន់ខ្ពស់បំផុតរបស់ប្រធានគណៈកម្មការអូឡាំពិកអន្តរជាតិ ជូនសម្តេចនាយករដ្ឋមន្ត្រី ហ៊ុន សែន នៅថ្ងៃទី២៥ ខែមករា ឆ្នាំ២០១៧ វេលាម៉ោង៣ និង៣០នាទីរសៀ នៅវិមានសន្តិភាព ហើយក្នុងនាមគណៈកម្មការជាតិអូឡាំពិកកម្ពុជា ក៏ដូចជាមហាគ្រួសារមានមោទនភាពណាស់ ចំពោះពានរង្វាន់ដ៏ឧត្ដុង្គឧត្ដមនេះ។

សូមបញ្ជាក់ថា ការប្រកួតនេះមានពីរប្រភេទ គឺប្រភេទទី១ ក្រុមទាហានមាន១៣ក្រុម(ឯកសណ្ឋានប្រយុទ្ធប៉ារ៉ា និងមួកដែក) និងក្រុមមហាជន មាន៧ក្រុម (ឯកសណ្ឋានកីឡាដៃវែង) និងមានសាក់ដាដូ៥គីឡូក្រាម។ ការប្រកួតនេះរត់លក្ខណៈជាក្រុមដើម្បីជួយគ្នាទៅវិញទៅមក។ ប្រភេទទី២ ក្រុមទាហានមាន២ក្រុម និងក្រុមមហាជនមាន១២ក្រុម៕

កម្ពុជាថ្មី
កោះកែវ

បើកការប្រកួតកីឡាកងយោធពលខេមរភូមិន្ទជាផ្លូវការ

ក្រុមបាល់ទះជើងខ្លាំងចំនួន៦នឹងប្រជែងដណ្តើមជើងឯកពានរង្វាន់ខេមបូឌានលីកឆ្នាំ២០១៧

ក្រុមបាល់ទះជើងខ្លាំងចំនួន៦ នឹងធ្វើការប្រកួតប្រជែងគ្នាដណើ្តមជើងឯកពានរង្វាន់ខេមបូឌានលីកឆ្នាំ២០១៧ ចាប់ពីថ្ងៃទី៨ ខែមករា ដល់ថ្ងៃទី១៨ ខែកុម្ភៈ ឆ្នាំ២០១៧។ ក្រុមទាំងនេះនឹងប្រកួតប្រជែងគ្នានៅលើទីលាន៥ផ្សេងគ្នា ហើយការប្រកួតធ្វើឡើងតាមរូបមន្តជម្រុះវិលជុំ។

ក្រុមបាល់ទះជើងខ្លាំងចំនួន៦ប្រចាំកម្ពុជារួមមានក្រុមវិសាខា, កងពលធំអន្តរាគមន៍លេខ៣, ខេត្តកំពង់ចាម, ក្រសួងមហាផ្ទៃ, ស្នងការនគរបាលខេត្តបាត់ដំបង និងក្រុមបញ្ជាការដ្ឋានអង្គរក្ស នឹងធ្វើការប្រកួតប្រជែងដណ្តើមជើងឯកពានរង្វាន់ខេមបូឌានលីកឆ្នាំ២០១៧ (The 1st Cambodia Beer Volleyball League 2017)។

កាប្រកួតដែលចាប់ផ្តើមពីថ្ងៃទី៨ ខែមករា ដល់ថ្ងៃទី១៨ ខែកុម្ភៈ នឹងធ្វើឡើងតាមរូបមន្តប្រកួតជម្រុះវិលជុំ ដោយក្រុមនីមួយៗត្រូវជួបគ្នាម្នាក់មួយម្តង និងធ្វើជាម្ចាស់ផ្ទះម្នាក់ម្តងផងដែរ។ ក្នុងនោះដោយចាប់ផ្តើមពីខេខេត្តព្រៃវែង បន្ទាប់មកខេត្តកំពង់ចាម ខេត្តព្រះវិហារ ខេត្តបាត់ដំបង និងរាជធានីភ្នំពេញ។ ក្រុមដែលមានពិន្ទុខ្ពស់ជាងគេក្នុងវគ្គនេះ នឹងឡើងមកប្រកួតក្នុងវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រនៅពហុកីឡដ្ឋានជាតិ។

ពាក់ពាន់ទៅនឹងប្រាក់រង្វាន់ក្រុមជើងឯកទទួលបាន៥ពាន់ដុល្លារ, លេខ២បាន៣ពាន់ដុល្លារ, លេខ៣បាន២ពាន់ដុល្លារ និងលេខ៤បាន១ពាន់ដុល្លារ ហើយក្រៅពីនេះក៏មានរង្វាន់សម្រាប់ក្រុម Fair Play និងកីឡាករលេងបានល្អជាងគេប្រចាំព្រឹត្តិការណ៍ផងដែរ៕

ថ្មីៗ
អត្ថបទ : សឿន វណ្ណឌេត

ក្រុមបាល់ទះជើងខ្លាំងចំនួន៦នឹងប្រជែងដណ្តើមជើងឯកពានរង្វាន់ខេមបូឌានលីកឆ្នាំ២០១៧

Menu